புது டெல்லி: “இந்த பட்ஜெட்டில் தேர்தல் நடைபெறவுள்ள மாநிலங்களுக்கும் மற்றும் தேர்தல் நடைபெறாத மாநிலங்களுக்கும் அறிவிப்புகள் வெளியாகியுள்ளது” என நிதியமைச்சர் நிர்மலா சீதாராமன் தெரிவித்தார்.
மத்திய பட்ஜெட்டுக்குப் பிந்தைய செய்தியாளர் சந்திப்பில் பேசிய நிதியமைச்சர் நிர்மலா சீதாராமன், “ நாட்டின் பொருளாதார வளர்ச்சி வேகத்தைத் தக்கவைக்க அரசாங்கம் உந்துதல் அளித்து வருகிறது. முதன்மையாக, நாங்கள் கட்டமைப்பு சீர்திருத்தங்கள் மூலம் சூழலமைப்பை உருவாக்குவதில் கவனம் செலுத்துகிறோம், இது தொடரும்.
நாங்கள் சீர்திருத்த நடவடிக்கைகளைத் தொடர்ந்து மேற்கொண்டு வருகிறோம். உற்பத்தித்திறனை மேம்படுத்துவதற்கும், வேலைவாய்ப்புகள் உருவாக்கப்படுவதை உறுதி செய்வதற்கும் போதுமான சூழலை உருவாக்குவதை நோக்கமாகக் கொண்டு இது தொடரும்.
21 ஆம் நூற்றாண்டு முற்றிலும் தொழில்நுட்பத்தால் இயக்கப்படுகிறது. எனவே, பொதுமக்களுக்குப் பயனளிக்கும் வகையில் தொழில்நுட்பங்கள் கொண்டுவரப்படுவதை நாங்கள் உறுதி செய்வோம்.
நகரங்கள் இந்தியாவின் வளர்ச்சி, புத்தாக்கம் மற்றும் வாய்ப்புகளின் இயந்திரங்களாக உள்ளன. அரசாங்கம் இப்போது இரண்டாம் மற்றும் மூன்றாம் நிலை நகரங்கள் மற்றும் நவீன உள்கட்டமைப்பு மற்றும் அடிப்படை வசதிகள் தேவைப்படும் கோயில் நகரங்கள் மீது கவனம் செலுத்துகிறது. இந்த பட்ஜெட், நகரப் பொருளாதாரப் பகுதிகளை (CER) அவற்றின் குறிப்பிட்ட வளர்ச்சி இயக்கிகளின் அடிப்படையில், பொருளாதார ஆற்றலை பெருக்கும் நோக்கம் கொண்டுள்ளது.
சீர்திருத்தம் மற்றும் முடிவுகளின் அடிப்படையிலான நிதி செயல்முறையுடன் திட்டங்களைச் செயல்படுத்த, ஒரு நகரப் பொருளாதாரப் பகுதிக்கு 5 ஆண்டுகளில் ரூ. 5000 கோடி ஒதுக்கீடு செய்ய முன்மொழியப்பட்டுள்ளது. ஒரு நகரத்திற்கு ஆண்டுக்கு ரூ. 1000 கோடி வழங்கப்படுகிறது. இந்த முக்கியத்துவம் பெரும்பாலும் இரண்டாம் மற்றும் மூன்றாம் நிலை நகரங்களுக்கு அளிக்கப்பட உள்ளது.
செமிகண்டக்டர் திட்டத்துக்கு இரண்டு முக்கிய அறிவிப்புகள் வெளியாகியுள்ளது. அவை இந்தியாவின் பங்களிப்பு மற்றும் அறிவுசார் சொத்துரிமை தொடர்பான விஷயங்களை மேம்படுத்தும். 40,000 கோடி ரூபாய் மதிப்பிலான மின்னணு பாகங்கள் உற்பத்தித் திட்டம், மின்னணுத் துறையில் தற்சார்பு நிலையை அடைய பெரிய ஊக்கமளிக்கிறது. இந்தியா தனது சொந்த உற்பத்திப் பொருட்களைக் கொண்டு தனது தேவைகளைப் பூர்த்தி செய்துகொள்ளும் வகையில், அரிய மண் உலோகங்களுக்கான வழித்தடங்களை அமைப்பதையும் நாங்கள் அறிவித்துள்ளோம்.
எனவே, இத்தகைய கனிமங்களை நாங்கள் கண்டறிந்து, அவற்றை ஆய்வு செய்து, பதப்படுத்தி, நமக்குக் கிடைக்கச் செய்யும்போது, அரிய மண் உலோகங்களை வெளிநாடுகளிலிருந்து இறக்குமதி செய்வதற்கான நமது சார்புநிலை குறையும். இந்த அரிய மண் உலோக வழித்தடங்கள் ஒடிசா, கேரளா, ஆந்திரப் பிரதேசம் மற்றும் தமிழ்நாட்டில் அமைய உள்ளன.
எனவே, இவை மிகவும் முக்கியமான முன்னேற்றங்கள். இவை இந்தியப் பொருளாதாரத்தில் பலதரப்பட்ட, ஆழமான தாக்கங்களை ஏற்படுத்தப் போகின்றன. இதனால் காந்தங்கள் மற்றும் அரிய மண் உலோகங்களுக்கான நமது சார்புநிலை குறைக்கப்படும்" என்று அவர் கூறினார்.
மேலும், “ இந்தியாவில், செயற்கை நுண்ணறிவு நமக்கு வாய்ப்புகளைத் தர வேண்டும். அதாவது நமது மக்களுக்கு இதனால் வேலைவாய்ப்பு இருக்க வேண்டும். அது மனித முயற்சிகளுக்கு மாற்றாக இருக்க முடியாது. எனவே, செயற்கை நுண்ணறிவை எவ்வாறு பயன்படுத்துவது, நாம் என்ன திறனை உருவாக்க வேண்டும் மற்றும் அதிலிருந்து என்னென்ன தயாரிப்புகள் வெளிவருகின்றன என்பதை நமக்காக நாமே மறுவரையறை செய்கிறோம். செயற்கை நுண்ணறிவை சிந்திக்காமல் பின்பற்றுவதற்குப் பதிலாக, அதிலிருந்து நாம் நன்மைகளை உருவாக்க வேண்டும்."
இந்த வரவு செலவுத் திட்டத்தில் தேர்தல் நடைபெறவுள்ள மாநிலங்களுக்கும் மற்றும் தேர்தல் நடைபெறாத மாநிலங்களுக்கும் அறிவிப்புகள் வெளியாகியுள்ளன” என்றார்.
