சென்னை: சென்னை குடிநீர் வாரியம் வெளியிட்ட செய்திக்குறிப்பில் கூறியிருப்பதாவது: சென்னை மாநகராட்சிக்குட்பட்ட புதிதாக இணைக்கப்பட்ட மணலி, மாதவரம், வளசரவாக்கம், ஆலந்தூர், பெருங்குடி, சோழிங்கநல்லூர் ஆகிய மண்டலங்களில் குடிநீர் விநியோகக் குழாய்கள் அமைக்கப்பட்டுள்ளன.
பாதாள சாக்கடை கட்டமைப்பும் ஏற்படுத்தப்பட்டுள்ளது. புதிய குடிநீர் மற்றும் கழிவுநீர் இணைப்பு பெற சென்னை குடிநீர் வாரிய இணையதளத்தில் (https://wsc.chennaimetrowater.in/#/nc/login) மட்டும் விண்ணப்பிக்க வேண்டும். செலுத்த வேண்டிய கட்டண விவரங்கள் இணைய வழியில் தகவல் தெரிவிக்கப்படும். விண்ணப்பதாரர் இணையவழியில் மட்டுமே கட்டணத்தை செலுத்த வேண்டும்.
விண்ணப்பிக்கும்போது சென்னை மாநகராட்சி சொத்து வரி மதிப்பீட்டு நகல், சிஎம்டிஏ, மாநகராட்சி மூலம் வழங்கப்பட்ட திட்ட அனுமதி, கட்டிட அனுமதி மற்றும் வரைபடம், கட்டிடப் பணிகள் நிறைவு சான்றிதழ் நகல், ஏற்கெனவே உள்கட்டமைப்பு மேம்பாட்டுக் கட்டணம் செலுத்தியிருந்தால் அதற்கான ஆதாரம் அல்லது ரசீது நகல் இணைக்கப்பட வேண்டும்.
மாநகராட்சியின் வரி மதிப்பீடு செய்யப்படாத கட்டிடங்களுக்கு, ஒவ்வொரு சமமான குடியிருப்பு அலகுக்கும் ரூ.3 ஆயிரம் முன் வரியாக செலுத்த வேண்டும். மழைநீர் சேகரிப்பு தொடர்பான உறுதிமொழி அல்லது அறிவிப்பு படிவத்தையும் சமர்ப்பிக்க வேண்டும்.
தனி வீடுகள் 46.47 ச.மீ (500 சதுர அடி) வரை குடிநீர் கட்டணம், கழிவுநீர் கட்டணம் தலா ரூ.100 மட்டும் செலுத்த வேண்டும். 100 சதுர மீட்டர் வரை தலா ரூ.5 ஆயிரம், 101 முதல் 200 சதுர மீட்டர் வரை தலா ரூ.7500 செலுத்த வேண்டும். சாலைத் துண்டிப்பு, குழாய் பதிக்கும் கட்டணங்கள் மற்றும் குடிநீர் அளவு மானிகள் பொருத்தும் கட் ணங்கள் நடைமுறை விதிமுறைகளின்படி வசூலிக்கப்படும்.
அடுக்குமாடி குடியிருப்புகள் 200 சதுர மீட்டர் வரை குடிநீர், கழிவுநீர் கட்டணம் என தலா ரூ.7500 செலுத்த வேண்டும். குடியிருப்பு அல்லாத வணிக வளாகங்கள் போன்ற வணிகக் கட்டிடங்களுக்கு ஒவ்வொரு 100 சதுர மீட்டருக்கும் தலா ரூ.7,500/- கட்டணம் வசூலிக்கப்படும்.
ஓட்டல்கள், விடுதிகளுடன் கூடிய கல்வி நிறுவனங்கள் உள்ளிட்ட கட்டிடங்களுக்கு ஒவ்வொரு 50 சதுர மீட்டருக்கும் தலா ரூ.7500 கட்டணம் வசூலிக்கப்படும். உள் நோயாளி வசதிகொண்ட மருத்துவமனைகளுக்கு ஒவ்வொரு 25 சதுர மீட்டருக்கு ரூ.7,500 கட்டணம் வசூலிக்கப்படும்.
தரைத்தளம் மற்றும் முதல் தளம் வரை 1800 சதுர அடி வரையிலான கட்டிடங்களுக்கான குடிநீர் மற்றும் கழிவுநீர் இணைப்பு கட்டணம், சாலை வெட்டு சீரமைப்புக் கட்டணம் அதிகபட்சம் 10 அரையாண்டுத் தவணைகளில் செலுத்தலாம்.
