சென்னை: பாஜக பொறுப்புகளில் இருந்து ஏஎன்எஸ். பிரசாத் நீக்கப்பட்ட உத்தரவு ரத்து செய்யப்பட்டுள்ளது. அவருக்கு மீண்டும் மாநில செய்தித் தொடர்பாளர் பொறுப்பை வழங்கி நயினார் நாகேந்திரன் உத்தரவிட்டுள்ளார்.
சட்டப்பேரவைத் தேர்தலையொட்டி என்டிஏ கூட்டணியில் இணைவது தொடர்பாக தவெகவிடம் திரைமறைவில் பேச்சுவார்த்தை நடந்து வருவதாக சமீபத்தில் தகவல்கள் வெளியாகின. இந்த சூழலில், தமிழக பாஜக செய்தித் தொடர்பாளர் ஏஎன்எஸ். பிரசாத் ஓர் அறிக்கை வெளியிட்டார்.
‘தமிழக அரசியலில் விஜய் ஒரு மாபெரும் சரித்திர நாயகனாக உருவெடுக்கவும், மக்கள் நல அரசியலை முன்னெடுக்கவும் இதுவே சரியான தருணம். என்டிஏ கூட்டணிக்கு வந்தால், அவருக்கு தகுதியான இடமும், உரிய மரியாதையும் நிச்சயம் வழங்கப்படும்’ என்று அந்த அறிக்கையில் அவர் தெரிவித்திருந்தார். கட்சியின் மேலிட அனுமதி இன்றி, தன்னிச்சையாக விஜய்க்கு அவர் அழைப்பு விடுத்தது சலசலப்பை ஏற்படுத்தியது.
இதைத் தொடர்ந்து, கட்சியின் கட்டுப்பாட்டை மீறியதாக, அனைத்துப் பொறுப்புகளில் இருந்தும் ஏஎன்எஸ். பிரசாத்தை நீக்கி மாநிலத் தலைவர் நயினார் நாகேந்திரன் உத்தரவிட்டார். இந்நிலையில், அந்த ஒழுங்கு நடவடிக்கையை ரத்து செய்து, அவருக்கு மீண்டும் மாநில செய்தித் தொடர்பாளர் பொறுப்பை வழங்கி நயினார் நாகேந்திரன் உத்தரவிட்டுள்ளார்.
இதுதொடர்பாக அவர் வெளியிட்ட அறிவிப்பில், ‘பாஜக மாநில செய்தித் தொடர்பாளர் ஏஎன்எஸ். பிரசாத், கட்சியின் ஒழுங்கு நடவடிக்கைக்கு உள்ளானதால் பொறுப்பில் இருந்து நீக்கப்பட்டிருந்தார். தற்போது அவர் மீதான நீக்கம் ரத்து செய்யப்படுகிறது. அவர் மீண்டும் கட்சி மற்றும் தேர்தல் பணிகளை மிகவும் சிறப்பான முறையில் மேற்கொள்ளுமாறு கேட்டுக் கொள்கிறேன்’ என்று தெரிவித்துள்ளார்.
