பாமக தலைவர் அன்புமணி
சென்னை: தமிழகத்தில் முதல் முயற்சியில் எம்பிபிஎஸ் சேரும் அரசு பள்ளி மாணவர்களின் வெற்றி 5 சதவீதமாக சரிந்துள்ளது என்று பாமக தலைவர் அன்புமணி தெரிவித்துள்ளார்.
இதுதொடர்பாக அவர் வெளியிட்ட அறிக்கையில் கூறியிருப்பதாவது: “தமிழகத்தில் 2025- 26-ம் கல்வியாண்டில் அரசு பள்ளி மாணவர்களுக்கான 7.5 சதவீத இட ஒதுக்கீட்டில் மருத்துவப் படிப்பில் சேர முயற்சித்த 650 மாணவர்களில் வெறும் 33 பேர் (5 சதவீதம்) மட்டுமே முதல் முயற்சியில் வெற்றி பெற்றுள்ளனர். மீதமுள்ள 617 மாணவர்களில் 235 பேர் 2-வது முறையாகவும், 283 பேர் 3-வது முறையாகவும், 91 பேர் 4-வது முறையாகவும் மீதமுள்ளோர் அதற்கு மேற்பட்ட முறைகளும் எழுதி மருத்துவப் படிப்பில் சேர்ந்துள்ளனர்.
ஐந்து ஆண்டுகளுக்கு முன்பு 50 சதவீதத்துக்கும் அதிகமாக இருந்த அரசு பள்ளி மாணவர்களின் முதல் முயற்சி வெற்றி விகிதம், தற்போது 5 சதவீதமாக வீழ்ச்சியடைந்துள்ளது. இதேபோல், பொது அரசு ஒதுக்கீட்டு இடங்களில் சேர்ந்த 8,053 மாணவர்களில் 20 சதவீதம் பேரும் (1,613 பேர்), தனியார் கல்லூரி நிர்வாக ஒதுக்கீட்டில் சேர்ந்த 2,570 மாணவர்களில் 30 சதவீதம் பேரும் (768 பேர்) மட்டுமே முதல் முயற்சியில் வெற்றி பெற்றுள்ளனர். சராசரியாக 3 முறை நீட் தேர்வு எழுத வேண்டிய கட்டாயம் ஏற்பட்டுள்ளதால், 17 வயதில் மருத்துவக் கல்லூரிக்குச் செல்ல வேண்டிய மாணவர்கள் 20 முதல் 22 வயதில்தான் சேர முடிகிறது.
இதற்கிடையே நிகர்நிலை பல்கலைக்கழகங்கள் ஆண்டு கட்டணத்தை ரூ.29 லட்சம் வரையிலும், மொத்த கட்டணத்தை ரூ.1.58 கோடியாகவும் உயர்த்தியுள்ளன. எனவே, மருத்துவக் கல்வியை அனைவருக்கும் சாத்தியமானதாக மாற்ற, நீட் தேர்வின் தாக்கம் குறித்து ஆய்வு செய்து அதை ரத்து செய்யவும், ஏழை மற்றும் நடுத்தர மக்களுக்கு எட்டும் வகையில் மருத்துவக் கல்வி கட்டணத்தைக் குறைக்கவும் மத்திய, மாநில அரசுகள் இணைந்து நடவடிக்கை எடுக்க வேண்டும். இவ்வாறு அவர் வலியுறுத்தியுள்ளார்.
