Published : 13 Oct 2021 14:32 pm

Updated : 13 Oct 2021 14:32 pm

 

Published : 13 Oct 2021 02:32 PM
Last Updated : 13 Oct 2021 02:32 PM

காலக்கெடுவுக்குள் சொத்து வரி செலுத்தும் உரிமையாளர்களுக்கு ரூ.5 ஆயிரம் வரை ஊக்கத்தொகை: சென்னை மாநகராட்சி

property-tax-incentive

சென்னை

இரண்டாம் அரையாண்டு தொடங்கிய அக்டோபர் 1 முதல் 10-ம் தேதிக்குள் சொத்து வரியைச் செலுத்திய சொத்து உரிமையாளர்களுக்கு 5 சதவீத ஊக்கத்தொகையாக ரூ.5.94 கோடி வழங்கப்பட்டுள்ளது என்று சென்னை மாநகராட்சி தெரிவித்துள்ளது.

சொத்து உரிமையாளர்கள் 15.10.2021க்குள் சொத்து வரியைச் செலுத்தி ஊக்கத்தொகையைப் பெற்றுப் பயனடையுமாறு கேட்டுக் கொள்ளப்படுகிறது.


இதுகுறித்துப் பெருநகர சென்னை மாநகராட்சி இன்று வெளியிட்டுள்ள அறிவிப்பு:

''பெருநகர சென்னை மாநகராட்சிக்கு ஒவ்வொரு குறிப்பிட்ட அரையாண்டின் முதல் 15 தினங்களுக்குள் சொத்து வரி செலுத்தும் சொத்து உரிமையாளர்களுக்கு, ஊக்கத்தொகையாக சொத்து வரியில் 5 சதவீதம் அதிகபட்சமாக ரூ.5,000 வரை அளிக்கப்பட்டு வருகின்றது.

அதன்படி, பெருநகர சென்னை மாநகராட்சிக்கு நடப்பு இரண்டாம் அரையாண்டிற்குரிய (II-2021/22) சொத்து வரியை, அரையாண்டு காலம் தொடங்குவதற்கு முன்பாகவே 30.09.2021க்குள் 4,01,260 சொத்து உரிமையாளர்களும் மற்றும் இரண்டாம் அரையாண்டு காலம் தொடங்கிய தேதி முதல் அதாவது அக்டோபர் 1 முதல் 10-ம் தேதி வரையில் 1,37,760 சொத்து உரிமையாளர்களும் செலுத்தியுள்ளனர். மேற்படி, இரண்டாம் அரையாண்டிற்கான சொத்து வரியை இரண்டாம் அரையாண்டு தொடங்கிய 15-ம் தேதிக்குள் செலுத்திய சொத்து உரிமையாளர்களுக்கு அவர்கள் செலுத்திய சொத்து வரியில் 5 சதவீதம் (அதிகபட்சமாக ரூ.5,000/-) ஊக்கத்தொகையாக ரூ.5.94 கோடி வழங்கப்பட்டுள்ளது.

நடப்பு இரண்டாம் அரையாண்டுக்குரிய (II-2021/22) சொத்து வரியை, 5 சதவீதம் ஊக்கத்தொகை பயன்பெற்றுச் செலுத்த அக்டோபர் 15-ம் தேதி இறுதி நாளாகும். அக்டோபர் மாதம் 15-ம் தேதிக்குப் பிறகு செலுத்தப்படும் சொத்துவரித் தொகைக்குக் கூடுதலாக 2 சதவீதம் தனி வட்டியுடன் சேர்த்துச் செலுத்த வேண்டும்.

எனவே, சொத்து உரிமையாளர்கள் பெருநகர சென்னை மாநகராட்சிக்குச் செலுத்த வேண்டிய இரண்டாம் அரையாண்டுக்குரிய சொத்து வரியை இரண்டு நாட்களுக்குள் (15.10.2021க்குள்) செலுத்தி ஊக்கத்தொகையைப் பெற்றுப் பயனடையவும், 15-ம் தேதிக்குப் பிறகு தனி வட்டியுடன் சொத்து வரி செலுத்துவதைத் தவிர்க்குமாறும் கேட்டுக் கொள்ளப்படுகிறது''.

இவ்வாறு சென்னை மாநகராட்சி தெரிவித்துள்ளது.


தவறவிடாதீர்!



ரூ.5 ஆயிரம்PROPERTY TAXINCENTIVEகாலக்கெடுவுக்குள் சொத்து வரிகாலக்கெடுசொத்து வரிசொத்து உரிமையாளர்கள்ஊக்கத்தொகைசென்னை மாநகராட்சிதனிவட்டி

Sign up to receive our newsletter in your inbox every day!

More From This Category

More From this Author

x