டாஸ்மாக் பணியாளர்கள் காத்திருப்பு போராட்டம் அக்.28-ம் தேதிக்கு தள்ளிவைப்பு
சென்னை: டாஸ்மாக் பணியாளர்கள் காலவரையற்ற காத்திருப்பு போராட்டம் அக்.28-ம் தேதி்க்கு ஒத்திவைக்கப்படுவதாக, டாஸ்மாக் பணியாளர் சங்கம் அறிவித்துள்ளது. தமிழ்நாடு டாஸ்மாக் பணியாளர் சங்கத்தின் மாநில நிர்வாகக் குழுக் கூட்டம் தலைவர் பெரியசாமி தலைமையில் சென்னையில் நேற்று நடைபெற்றது. கூட்டத்தில் ஏஐடியூசி தேசிய செயலாளர் மூர்த்தி, டாஸ்மாக் பணியாளர் சங்க பொதுச் செயலாளர் தனசேகரன், பொருளாளர் கோவிந்தராஜன் மற்றம் நிர்வாகக்குழு உறுப்பினர்கள் கலந்து கொண்டனர்.
தமிழ்நாடு டாஸ்மாக் பணியாளர்கள் சங்கம் பணி நிரந்தரம், காலமுறை ஊதியம், ஓய்வூதியம் உள்ளிட்ட கோரிக்கைகளை முன் வைத்து அக்.2 ம் தேதி தலைமைச் செயலகம் முன்பு காலவரையற்ற போராட்டம் மற்றும் விதிப்படி பணி செய்யும் இயக்கத்தை அறிவித்திருந்தது. கடந்த 26ம் தேதி டாஸ்மாக் மேலாண்மை இயக்குநருடன் நடைபெற்ற பேச்சு வார்த்தையில் முடிவு எட்டப்படாத நிலையில், அமைச்சர் முத்துசாமி சங்க நிர்வாகிகளை தொடர்பு கொண்டு கோரிக்கைகள் தொடர்பாக பேசி தீர்வு காணலாம் என தெரிவித்தார்.
அமைச்சருடன் பேசி தீர்வு காண அவகாசம் அளிக்கும் முறையில் அறிவிக்கப்பட்டிருந்த காலவரையற்ற காத்திருப்பு போராட்டத்தை அக்.28-ம் தேதிக்கு ஒத்திவைப்பது என மாநில நிர்வாகக் குழு கூட்டத்தில் முடிவு செய்யப்பட்டது. மேலும் இந்த கூட்டத்தில், அக்.28-ம் தேதி போராட்டத்தை வெற்றிகரமாக நடத்துவதற்கான ஆயத்தப் பணிகளை மாவட்ட நிர்வாகிகள் தொடர்ந்து முனைப்புடன் மேற்கொள்ள வேண்டும்.
பொதுமக்களிடம் துண்டறிக்கை விநியோகித்து ஆதரவு திரட்டுவது, டாஸ்மாக் பணியாளர்களின் கோரிக்கைகளின் நியாயங்களை பொதுமக்களிடம் விளக்கிக் கூறி, ஆதரவு திரட்டும் வகையில் துண்டறிக்கை விநியோகம் செய்வது என்ற முடிவு செய்யப்பட்டது. மேலும், தமிழ்நாடு அரசு தொழிலாளர் கொள்கை வெளியிட வலியுறுத்தி தமிழ்நாடு ஏஐடியூசி மேற்கொள்ளும் ஆர்ப்பாட்டத்தில் டாஸ்மாக் பணியாளர்களை திரட்டி பங்கேற்பது என முடிவு செய்யப்பட்டது.