சென்னை: ஆயுதபூஜை மற்றும் தொடர் விடுமுறை தினத்தையொட்டி சென்னையில் இருந்து 13 லட்சம் பேர் சொந்த ஊர்களுக்கு பயணித்துள்ளனர்.
ஆயுதபூஜை, விஜயதசமி பண்டிகையை முன்னிட்டு பலரும் சொந்த ஊர்களுக்குப் புறப்பட்டு சென்றுள்ளனர். இதற்காக சென்னையில் 5 இடங்களில் கடந்த 15-ம் தேதி முதல் சிறப்பு பேருந்துகள் இயக்கப்பட்டன.
அதன்படி 4 நாட்களில் சென்னையிலிருந்து வழக்கமாக இயக்கக் கூடிய 8,764 பேருந்துகளுடன், கூடுதலாக 6,199 சிறப்புப் பேருந்துகள் என மொத்தமாக 14,963 பேருந்துகள் இயக்கப்பட்டன.
இதில் கடந்த 15-ம் தேதி 1.15 லட்சம் பயணிகளும், 16-ம் தேதி 1.47 லட்சம் பயணிகளும், 17-ம் தேதி 1.53 லட்சம் பயணிகளும் மற்றும் நேற்றைய தினம் 1.08 லட்சம் பயணிகளும் என மொத்தமாக 5.23 லட்சம் பேர் போக்குவரத்து துறை மூலமாக இயக்கப்பட்ட பேருந்துகளில் பயணித்துள்ளனர்.
பண்டிகை முடிந்த பின்னர் நாளை மற்றும் நாளை மறுநாள் பல்வேறு ஊர்களிலிருந்து பொதுமக்கள் சென்னை திரும்ப வசதியாக 9,191 பேருந்துகள் இயக்கப்பட உள்ளன.
இதேபோல், சென்னை எழும்பூர், சென்ட்ரல், தாம்பரம் உள்ளிட்ட ரயில் நிலையங்களில் மக்கள் கூட்டம் அலைமோதியது.
பல்வேறு நகரங்களுக்கு சிறப்பு ரயில்களும், முன்பதிவில்லாத சிறப்பு ரயில்களும் இயக்கப்பட்டன. ஒட்டுமொத்தமாக விமானங்கள், ரயில்கள், பேருந்துகள் மற்றும் சொந்த வாகனங்கள் மூலமாக சென்னையில் இருந்து 13 லட்சம் பேர் சொந்த ஊர்களுக்கு பயணித்துள்ளதாக தகவல்கள் வெளியாகி உள்ளன.
பண்டிகையை கொண்டாட லட்சக்கணக்கானோர் சென்றதால் கோயம்பேடு, கிண்டி, தாம்பரம், வடபழனி, அண்ணா சாலை உள்ளிட்ட பகுதிகளில் நெரிசல் குறைந்திருந்தது.
