வெளிப்படை தன்மையுடன் தேர்தலை நடத்த வேண்டும்: ஆணையத்துக்கு திருமாவளவன் கடிதம்

சென்னை: வாக்குப்பதிவு விவரங்களை வெளியிடுவதில் ஏற்படும் முரண்களை களைந்து, மீதமுள்ள தேர்தல்களை வெளிப்படை தன்மையுடன் நடத்தவேண்டும் என இந்திய தேர்தல் ஆணையத்துக்கு விசிக தலைவர் திருமாவளவன் கடிதம் எழுதியுள்ளார்.

இது தொடர்பாக இந்திய தலைமை தேர்தல் ஆணையருக்கு எழுதிய கடிதத்தில் கூறியுள்ளதாவது: இந்திய தேர்தல் ஆணையம் 2024 மக்களவை தேர்தலுக்கான முதல் 2 கட்ட தேர்தல்களின் இறுதிவாக்காளர் எண்ணிக்கை தரவுகளைகடந்த ஏப்.30-ம் தேதிதான் வெளியிட்டது.

அதன்படி மக்களவை தேர்தலில் முதல்கட்ட வாக்குப்பதிவு முடிந்து 10 நாட்களுக்கு பிறகும், 2-ம் கட்ட வாக்குப்பதிவு முடிந்து 4 நாட்களுக்கு பிறகும் வாக்குப்பதிவு விவரங்களை தேர்தல் ஆணையம் அறிவித்துள்ளது.

வாக்கு எண்ணிக்கையை சிலமணி நேரங்களில் முடிக்கும் தேர்தல்ஆணையம், வாக்குப்பதிவுவிவரங்களை வெளியிடுவதில் இவ்வளவு தாமதம் செய்தது ஏன்,முந்தைய சந்தர்ப்பங்களில், வாக்குப்பதிவு முடிந்த 24 மணிநேரத்துக்குள் வாக்குப்பதிவு விவரங்களை ஆணையம் வெளியிட்டது.

ஆனால் இப்போது ஏன் இந்தமாற்றம், மேலும் தாமதத்தை நியாயப்படுத்துவதற்கான எந்த விளக்கத்தையும் தேர்தல் ஆணையம் வழங்கவும் இல்லை.

தயக்கம் ஏன்: இது தொடர்பான விளக்கங்களை அளிப்பதற்கு தேர்தல் ஆணையம் தயங்குவது ஏன், திருத்தி அறிவிக்கப்பட்ட முதற்கட்ட வாக்குப்பதிவில் 5.5 சதவீதமும், 2-ம் கட்ட வாக்குப்பதிவில் 5.74 சதவீதமும் வாக்காளர்களின்எண்ணிக்கை உயர்ந்திருப்பதற்கான தகுந்த காரணங்களையும் தேர்தல் ஆணையம் விளக்க முன்வர வேண்டும்.

மேலும் தேர்தல் ஆணையத்தால் வெளியிடப்பட்ட வாக்காளர் எண்ணிக்கைத் தரவுகள், ஒவ்வொரு மக்களவை தொகுதி, சட்டப்பேரவைத் தொகுதிகளில் பதிவானவாக்குகள் போன்ற புள்ளிவிவரங்களை குறிப்பிடவில்லை. எனவே வாக்குப்பதிவு சதவீதத்தில் ஏற்படும் முரண்களை களைவதற்கு ஏதுவாக ஒவ்வொரு வாக்குச்சாவடி வாரியாக வாக்காளர்களின் எண்ணிக்கை விவரங்களை வெளியிட வேண்டும்.

மீதமுள்ள கட்டங்களில் நடக்கும் தேர்தல்களின் வாக்குப்பதிவு விவரங்களை வாக்குப்பதிவு முடிந்த 24 மணி நேரத்துக்குள் வெளியிடவும், தேர்தல்களை வெளிப்படைதன்மையுடன் நடத்தவும் நடவடிக்கை எடுக்க வேண்டும். இவ்வாறு அதில் வலியுறுத்தியுள்ளார்.