சுற்றுலா என்றாலே வரலாற்று நினைவுச்சின்னங்களும், கடற்கரைகளும், ஆடம்பர உணவகங்களும் தானே நினைவுக்கு வரும்? ஆனால், 2026-ல் இந்தக் கருத்து முற்றிலும் மாறியுள்ளது. இந்தியப் பயணிகளிடையே இப்போது உருவாகியிருக்கும் பிரபலமான புதிய டிரெண்ட் 'சூப்பர் மார்க்கெட் சுற்றுலா' (Grocery Store Tourism).
ஆம், வெளிநாட்டுக்குச் செல்லும்போது ஒரு சாதாரண சூப்பர் மார்க்கெட்டை சுற்றிப் பார்ப்பது இப்போது ஒரு முழுமையான பயண அனுபவமாக மாறிவிட்டது. சமீபத்திய டிராவல் அண்ட் டூர் வேர்ல்ட் வெளியிட்ட ஆய்வுகளின்படி, 77% இந்தியப் பயணிகள் இந்த அனுபவத்தை விரும்புகின்றனர், மேலும் 35% பயணிகள் தங்களது அடுத்த பயணத்தில் கண்டிப்பாக தாங்கள் செல்லும் ஊரில் உள்ள பிரபலமான சூப்பர் மார்க்கெட்டைப் பார்க்கத் திட்டமிட்டுள்ளனர்.
ஒரு நாட்டை அறிய சிறந்த வழி எது?
ஒரு நாட்டு மக்கள் என்ன சாப்பிடுகிறார்கள் என்று தெரிந்தால், அவர்கள் எப்படி வாழ்கிறார்கள் என்று புரிந்துவிடும். "இதை அந்தந்த ஊர் சூப்பர் மார்க்கெட் (பல்பொருள் அங்காடி) நமக்கு காட்டிவிடும். ஜப்பானுக்குப் போனால், மிசோ சூப் மட்டும் பல வகைகளில் கிடைக்கும். கொரியாவில் ராமென் நூடுல்ஸ் வகைகள் வரிசையாக அடுக்கி வைக்கப்பட்டிருக்கும்.
பிரான்ஸில் நூறுக்கும் மேற்பட்ட சீஸ் வகைகள் இருக்கும். இந்தக் கடை அலமாரிகளை பார்த்தாலே போதும் — அந்த நாட்டு மக்கள் எப்படிப்பட்டவர்கள், எதை விரும்புகிறார்கள், எப்படி வாழ்கிறார்கள் என்று தெரிந்துவிடும்.
இன்றைய இந்தியப் பயணிகள் பல்பொருள் அங்காடிகளை வெறும் கடை என்று நினைக்காமல், மக்களின் அன்றாட வாழ்க்கையைச் சொல்லும் ஒரு `வாழ்க்கை முறை அருங்காட்சியகமாக' பார்க்கிறார்கள்.
