மருங்குளம் பண்ணையில் உள்ள டிராகன் பழச் செடிகள்.
முன்பெல்லாம் கிராமப்புறங்களில் சப்பாத்திக்கள்ளிச் செடிகளில் காய்க்கும் பழங்களைச் சிறுவர்கள் விரும்பிச் சாப்பிடுவது உண்டு. காலப்போக்கில் மக்கள் இச்செடிகளை அழித்தனர்.
அதேநேரத்தில், கள்ளி வகைகளில் ஒன்றானதும் மருத்துவக் குணங்கள் நிறைந்ததுமான டிராகன் பழங்களைச் சீனா உள்ளிட்ட பல நாடுகள் சாகுபடி செய்து உலகெங்கும் விற்பனைக்கு அனுப்பி வருகின்றன.
பெரும்பாலும் வறட்சியைத் தாங்கி வளரக்கூடிய டிராகன் பழச் செடிகள், தற்போது இந்தியாவிலும் பல இடங்களில் சாகுபடி செய்யப்பட்டு வருகின்றன. குறிப்பாக, நீர்ப்பற்றாக்குறை உள்ள பகுதிகளில் இச்சாகுபடி மூலம் விவசாயிகள் நல்ல மகசூல் பெற்று வருகின்றனர்.
அந்த வகையில், காவிரி டெல்டா மாவட்டங்களிலும் சாகுபடிக்கான நீர்ப்பற்றாக்குறை ஏற்படும் சூழலில், விவசாயிகள் டிராகன் பழச் சாகுபடியை மேற்கொண்டு அதிக லாபம் பெறத் தோட்டக்கலைத்துறை சார்பில் பயிற்சிகளும் ஆலோசனைகளும் வழங்கப்பட்டு வருகின்றன.
மேலும், விவசாயிகளுக்குத் தேவையான டிராகன் பழச் செடிகளை வழங்கிடவும், சாகுபடி முறைகளை அவர்கள் நேரில் கண்டு உணரும் வகையிலும் தஞ்சாவூர் அருகே மருங்குளத்தில் உள்ள அரசுத் தோட்டக்கலை பண்ணையில் 10 ஆயிரம் சதுர அடி பரப்பளவில் மாதிரித் தோட்டம் அமைக்கப்பட்டுள்ளது.
