ஒட்டப்பிடாரம் என்பது முற்றிலும் கிராமப்புறப் பின்னணியைக் கொண்ட பகுதியாகும். ‘வானம் பார்த்த பூமி’ எனப்படும் மானாவாரி நிலங்கள் நிறைந்த இந்தப் பகுதியில், கிணற்றுப் பாசனம் மற்றும் ஆழ்துளைக் கிணற்றுப் பாசனத்தை மட்டுமே நம்பி விவசாயிகள் பூஞ்செடிகளைப் பயிரிட்டு வருகிறார்கள்.
ஆரைக்குளம், குலசேகரநல்லூர், குப்பனாபுரம், ஓசனூத்து, கீழமங்கலம், மேலமங்கலம், கீழமுடிமண், மேலமுடிமண், சிலோன் காலனி, சங்கரராஜாபுரம், அக்கநாயக்கன்பட்டி, ஓட்டுடன்பட்டி, லட்சுமிபுரம் என ஒட்டப்பிடாரத்தைச் சுற்றியுள்ள பல்வேறு கிராமங்களில், சுமார் 1000-க்கும் மேற்பட்ட ஏக்கர் நிலப்பரப்பில் மலர் சாகுபடி தீவிரமாக நடைபெற்று வருகிறது.
இங்கு ஆண்டுக்குச் சுமார் 8 மாதங்கள் வரை மல்லிகைப்பூக்கள் அரும்பி மணக்கின்றன. அத்துடன், மஞ்சள் மற்றும் ஆரஞ்சு நிறங்களில் கண் கவரும் கேந்திப்பூக்கள் (செண்டுப்பூ) ஆண்டு முழுவதுமே சாகுபடி செய்யப்படுகின்றன.
இங்கு தினசரி அறுவடை செய்யப்படும் மலர்கள் அனைத்தும் உடனடியாகத் தூத்துக்குடி மலர் சந்தைக்குக் கொண்டு செல்லப்பட்டு விற்பனை செய்யப்படுகின்றன. இச்சாகுபடி தொழில், ஒட்டப்பிடாரம் பகுதியில் உள்ள 1000-க்கும் மேற்பட்ட குடும்பங்களுக்கு முதன்மை வாழ்வாதாரமாகத் திகழ்கிறது.
மல்லிக்கு மழை ஆகாது
இதுகுறித்து ஆரைக்குளத்தைச் சேர்ந்த முன்னணி மலர் விவசாயி செ.பாலமுருகன் தனது அனுபவங்களைப் பகிர்ந்து கொண்டார். “எங்கள் ஒட்டப்பிடாரம் பகுதி ஒரு கந்தக பூமியாகும். இங்குள்ள நிலங்களில் நாங்கள் மல்லிகைப் பூ, கேந்திப்பூ, கோழிக்கொண்டைப் பூ ஆகியவற்றைச் சாகுபடி செய்கிறோம். இவை அனைத்துமே கிணற்றுப் பாசனம் அல்லது ஆழ்துளைக் கிணற்றுப் பாசன நீரை நம்பியே வளர்க்கப்படுகின்றன.
