வேலை வேண்டுமா? - எல்.ஐ.சி.யில் நிர்வாக அதிகாரி ஆகலாம்

மத்திய அரசின் பொதுத்துறை நிறுவனமான இந்திய ஆயுள் காப்பீட்டுக்கழகம் (எல்.ஐ.சி.) விரைவில் 650 உதவி நிர்வாக அதிகாரி (Assistant Administrative Officer-AAO) காலிப் பணியிடங்களை நேரடி நியமன முறையில் நிரப்ப இருக்கிறது.

தேவையான தகுதி

இந்தப் பணிக்குப் பட்டதாரிகள் விண்ணப்பிக்கலாம். வயது 21 முதல் 30-க்குள் இருக்க வேண்டும். எஸ்.சி., எஸ்.டி. வகுப்பினருக்கு 5 ஆண்டுகளும், இதர பிற்படுத்தப்பட்ட பிரிவினருக்கு (ஓ.பி.சி.) 3 ஆண்டுகளும், மாற்றுத் திறனாளிகளுக்கு 10 ஆண்டுகளும் வயது வரம்பில் தளர்வு அளிக்கப்படும். எழுத்துத் தேர்வு மற்றும் நேர்முகத் தேர்வு அடிப்படையில் தகுதியான நபர்கள் உதவி நிர்வாக அதிகாரி பணிக்குத் தேர்வுசெய்யப்படுவார்கள்.

என்ன கேட்பார்கள்?

ஆன்லைன் வழியில் நடத்தப்படும் எழுத்துத் தேர்வில் ரீசனிங், கணிதத் திறன், பொது அறிவு, நடப்பு நிகழ்வுகள், கணினி, பொது ஆங்கிலம் ஆகிய பகுதிகளில் இருந்து வினாக்கள் கேட்கப்படும். எழுத்துத் தேர்வுக்கு மொத்தம் 300 மதிப்பெண். ஒவ்வொரு பகுதியிலும் தனித்தனியே தேர்ச்சி பெற வேண்டும். எழுத்துத் தேர்வில் தேர்ச்சி பெறுவோர் நேர்காணலுக்கு அழைக்கப்படுவார்கள். பொது ஆங்கிலம் பகுதியில் விண்ணப்பதாரர் எடுக்கும் மதிப்பெண் ரேங்க் பட்டியலுக்குக் கணக்கில் எடுக்கப்படாது என்ற போதிலும், அதில் குறைந்தபட்சத் தேர்ச்சி மதிப்பெண் பெற வேண்டியது அவசியம்.

எழுத்துத் தேர்வில் தேர்ச்சி பெறுவோர் நேர்காணலுக்கு அழைக்கப்படுவார்கள். எழுத்துத் தேர்வு மதிப்பெண், நேர்காணல் மதிப்பெண் அடிப்படையில் மெரிட் பட்டியல் தயாரிக்கப்பட்டுத் தகுதியானோர் பணிக்குத் தேர்வுசெய்யப்படுவார்கள்.

தொடக்கச் சம்பளம் 40 ஆயிரம்

உதவி நிர்வாக அதிகாரி நியமனம் தொடர்பான அறிவிப்பு விரைவில் எல்.ஐ.சி. இணையதளத்தில் (www.licindia.in) வெளியிடப்பட இருக்கிறது. தேர்வுக்கு ஆன்லைனில்தான் விண்ணப்பிக்க வேண்டும். ஆன்லைனில் விண்ணப்பிக்கும் முறை, தேர்வுமுறை, போட்டித் தேர்வுக்காக இடஒதுக்கீட்டுப் பிரிவினருக்கு அளிக்கப்படும் சிறப்புப் பயிற்சி உள்ளிட்ட விவரங்களை எல்.ஐ.சி. இணையதளத்தில் விரிவாகத் தெரிந்துகொள்ளலாம்.

உதவி நிர்வாக அதிகாரி பணியில் சேருவோருக்கு ஆரம்ப நிலையில் ரூ.40 ஆயிரத்துக்கும் மேல் சம்பளம் கிடைக்கும். சம்பளம் தவிர, பங்களிப்பு ஓய்வூதியம், சிறப்பு தேர்வு தேர்ச்சிக்குத் தனி அலவன்ஸ், கிராஜுவிட்டி, குழு காப்பீடு மற்றும் குழு மருத்துவக் காப்பீடு, வாகனக் கடன் உதவி எனப் பல்வேறு சலுகைகளும் பெறலாம் என்பது குறிப்பிடத்தக்கது.