சென்னை: சென்னையில் இன்று (நவம்பர் 2) முதல் நவம்பர் 8-ம் தேதி வரை சென்னை ஓபன் மகளிர் சர்வதேச டென்னிஸ் போட்டி நடைபெறவுள்ளது.
சென்னை நுங்கம்பாக்கத்தில் உள்ள எஸ்டிஏடி டென்னிஸ் மைதானத்தில் இப்போட்டிகள் நடைபெறும். இந்தப் போட்டியில் வைல்டு கார்டு(நேரடி தகுதி) மூலம் இந்திய வீராங்கனைகள் வைஷ்ணவி அத்கர், சஹாஜா யமலபள்ளி, மாயா ராஜேஸ்வரன் ரேவதி ஆகியோர் களமிறங்க உள்ளனர்.
இந்தப் போட்டியில் இந்தோனேசிய வீராங்கனை ஜானிஸ் டிஜென் முதல் நிலை வீராங்கனையாகவும், ஆஸ்திரிய வீராங்கனை லில்லி டாகர் 2-ம் நிலை வீராங்கனையாகவும் களமிறங்க உள்ளனர்.
இந்த சென்னை ஓபன் மகளிர் டென்னிஸ் போட்டி கடைசி ஆண்டாக இம்முறை சென்னையில் நடைபெறவுள்ளது. இதன்பிறகு இந்தப் போட்டி பிலிப்பைன்ஸுக்கு மாற்றப்படவுள்ளது.
கடந்த ஆண்டு சென்னையில் நடைபெற்ற மகளிர் டென்னிஸ் போட்டியில் ஆஸ்திரிய வீராங்கனை கிம்பர்லி பிரில்லை 6-4, 6-3 என்ற செட் கணக்கில் வீழ்த்தி தனது முதல் டபிள்யூடிஏ ஒற்றையர் பட்டத்தை இந்தோனேசிய வீராங்கனை ஜானிஸ் டிஜென் வென்றார். அவர் இந்த ஆண்டும் சென்னையில் களம் காண்கிறார். இதையடுத்து பட்டத்தைத் தக்கவைத்துக் கொள்ள அவர் கடுமையாக போராடுவார் என எதிர்பார்க்கலாம்.
