கிறைஸ்ட்சர்ச்: நியூஸிலாந்து - மேற்கு இந்தியத் தீவுகள் அணிகள் இடையிலான முதல் டெஸ்ட் கிரிக்கெட் போட்டி கிறைஸ்ட்சர்ச் நகரில் நடைபெற்று வந்தது. இதன் முதல் இன்னிங்ஸில் நியூஸிலாந்து அணி 231 ரன்களும், மேற்கு இந்தியத் தீவுகள் 167 ரன்களும் எடுத்தன.
64 ரன்கள் முன்னிலையுடன் 2-வது இன்னிங்ஸை விளையாடிய நியூஸிலாந்து அணி 109 ஓவர்களில் 8 விக்கெட்கள் இழப்புக்கு 466 ரன்கள் குவித்து டிக்ளேர் செய்தது.
இதையடுத்து 531 ரன்கள் இலக்குடன் பேட் செய்த மேற்கு இந்தியத் தீவுகள் அணி 4-வது நாள் ஆட்டத்தின் முடிவில் 74 ஓவர்களில் 4 விக்கெட்கள் இழப்புக்கு 212 ரன்கள் எடுத்தது. ஷாய் ஹோப் 116 ரன்களும், ஜஸ்டின் கிரீவ்ஸ் 55 ரன்களும் சேர்த்து ஆட்டமிழக்காமல் களத்தில் இருந்தனர்.
நேற்று கடைசி நாள் ஆட்டத்தை நியூஸிலாந்து அணி தொடர்ந்து விளையாடியது. ஷாய் ஹோப் 234 பந்துகளில், 2 சிக்ஸர்கள், 15 பவுண்டரிகளுடன் 140 ரன்கள் எடுத்த நிலையில் ஜேக்கப் டஃபி பந்தில் ஆட்டமிழந்தார். 5-வது விக்கெட்டுக்கு ஷாய் ஹோப், ஜஸ்டின் கிரீவ்ஸ் ஜோடி 384 பந்துகளில், 196 ரன்கள் சேர்த்தது.
இதையடுத்து களமிறங்கிய டெவின் இம்லாக் 4 ரன்களில் ஸாக் போஃக்ஸ் பந்தில் எல்பிடபிள்யூ ஆனார். 6-வது விக்கெட்டுக்கு களமிறங்கிய கேமர் ரோச், ஜஸ்டின் கிரீவ்ஸுடன் இணைந்து அபாரமான ஆட்டத்தை வெளிப்படுத்தினார். இந்த ஜோடி நியூஸிலாந்து அணியின் வெற்றியை தடுத்து பந்து வீச்சாளர்களை கடுமையாக சோதித்தது.
ஜஸ்டின் கிரீவ்ஸ் 338 பந்துகளில், 19 பவுண்டரிகளுடன் 202 ரன்களும், கேமர் ரோச் 233 பந்துகளில், 8 பவுண்டரிகளுடன் 58 ரன்களும் விளாசி மிரளச் செய்தனர். ஒரு வழியாக மேற்கு இந்தியத் தீவுகள் அணி 163.3 ஓவர்களில் 6 விக்கெட்கள் இழப்புக்கு 457 ரன்களை எடுத்திருந்த போது ஆட்டத்தை டிராவில் முடித்துக் கொள்ள நியூஸிலாந்து அணி சம்மதம் தெரிவித்தது.
6-வது விக்கெட்டுக்கு ஜஸ்டின் கிரீவ்ஸ், கேமர் ரோச் ஜோடி 410 பந்துகளை சந்தித்து 180 ரன்கள் எடுத்தது. . மேலும் அந்த அணியின் பிரதான பந்து வீச்சாளர்களான மேட் ஹென்றி, நேதன் ஸ்மித் ஆகியோர் காயம் காரணமாக பந்துவீச முடியாமல் போனது.
இதனால் அனுபவம் இல்லாத ஸாக் போஃக்ஸ், ஜேக்கப் டஃபி மற்றும் பகுதிநேர சுழற்பந்து வீச்சாளர்களை கொண்டு சமாளித்தது. இவர்களால் எந்தவித தாக்கத்தையும் ஏற்படுத்த முடியாமல் போனது. இது ஒருபுறம் இருக்க கேமர் ரோச் 30 மற்றும் 47 ரன்களில் கொடுத்த கேட்ச்சை நியூஸிலாந்து அணி தவறவிட்டது. இதற்கான பலனை அந்த அணி அனுபவித்தது. மேலும் சில ரிவ்யூக்களையும் அந்த அணி வீணடித்து இருந்தது.
1930-ம் ஆண்டுக்கு பின்னர் தற்போதுதான் மேற்கு இந்தியத் தீவுகள் அணி 4-வது இன்னிங்ஸில் அதிக ஓவர்களை (163.3 ஓவர்கள்) விளையாடி உள்ளது.
அதேவேளையில் டெஸ்ட் கிரிக்கெட் வரலாற்றில் 4-வது இன்னிங்ஸில் அதிக ரன்கள் குவித்த 2-வது அணி என்ற பெருமையையும் மேற்கு இந்தியத் தீவுகள் அணி பெற்றுள்ளது. ஜஸ்டின் கிரீவ்ஸ் ஒட்டுமொத்தமாக 9.5 மணி நேரம் களத்தில் நின்று போராடி வரலாறு படைத்து ஆட்டத்தை டிரா செய்து கொடுத்துள்ளார்.
ஒரு கட்டத்தில் 33 ஓவர்கள் மீதம் இருந்த நிலையில் மேற்கு இந்தியத் தீவுகள் அணியின் வெற்றிக்கு 132 ரன்கள் தேவையாக இருந்தது. ஆனால் ஜஸ்டின் கிரீவ்ஸ், கேமர் ரோச் ஜோடி எந்தவித அவசரமும் காட்டாமல் விக்கெட்களை இழந்துவிடக்கூடாது என்பதில் கவனம் செலுத்தி பொறுமையாக விளையாடி ஆட்டத்தை டிரா செய்தது.
கேமர் ரோச் 53 ரன்களில் இருந்த போது மைக்கேல் பிரேஸ்வெல் பந்தில் இரு முறை ஆட்டமிழப்பதில் இருந்து தப்பித்தார். நூலிழையில் பந்து எட்ஜ் ஆகி விக்கெட் கீப்பரிடம் கேட்ச் ஆனது. ஆனால் நடுவர் அவுட் கொடுக்கவில்லை. நியூஸிலாந்து அணியிடம் ரிவ்யூ இல்லாததால் ஒன்றும் செய்ய முடியாமல் போனது.
