ராஜ்கோட்: விஜய் ஹசாரே கோப்பைக்கான கிரிக்கெட் லீக் போட்டியில் உத்தரபிரதேச அணி 54 ரன்கள் வித்தியாசத்தில் பரோடா அணியை வீழ்த்தியது. இந்தப் போட்டியில் உ.பி. அணி வீரர் துருவ் ஜூரெல் சதம் விளாசினார்.
ராஜ்கோட்டிலுள்ள சமோசரா மைதானத்தில் இந்தப் போட்டி நேற்று நடைபெற்றது. முதலில் விளையாடிய உ.பி. அணி 50 ஓவர்களில் 7 விக்கெட் இழப்புக்கு 369 ரன்கள் குவித்தது. துருவ் ஜூரெல் 101 பந்துகளில் 15 பவுண்டரிகள், 8 சிக்ஸர்களுடன் 160 ரன்கள் விளாசி ஆட்டமிழக்காமல் இருந்தார். கோஸ்வாமி 51, ஆர்யன் ஜுயால் 26, கேப்டன் ரிங்கு சிங் 63, பிரசாந்த் வீர் 35 ரன்கள் குவித்தனர். பரோடா அணியின் ராஜ் லிம்பானி 4 விக்கெட்களைச் சாய்த்தார்.
பின்னர் விளையாடிய பரோடா அணி 50 ஓவர்களில் 315 ரன்களுக்கு அனைத்து விக்கெட்களையும் இழந்து 54 ரன்கள் வித்தியாசத்தில் தோல்வி கண்டது. அந்த அணியின் சஷ்வத் ரவாத் 60, சிவாலிக் சர்மா 30, கேப்டன் கிருணல் பாண்டியா 82, விஷ்ணு சோலங்கி 43, அதித் சேத் 46 எடுத்தனர். உ.பி. அணியின் ஜீஷன் அன்சாரி 3, சமீர் ரிஸ்வி, விப்ராஜ் நிகம் ஆகியோர் தலா 2, குணால் தியாகி, ரிங்கு சிங், பிரசாந்த் வீர் ஆகியோர் தலா ஒரு விக்கெட்டை வீழ்த்தினர்.
