அலெக்ஸாண்டர் ஜிவேரேவ்
நியூயார்க்: அமெரிக்க ஓபன் டென்னிஸ் தொடரில் முதல் நிலை வீரரான ஜெர்மனியின் அலெக்ஸாண்டர் ஜிவேரேவ் அரை இறுதி சுற்றுக்கு முன்னேறினார்.
அமெரிக்காவின் நியூயார்க் நகரில் நடைபெற்று வரும் இந்தத் தொடரின் 11-வது நாளான நேற்று முன்தினம் ஆடவர் ஒற்றையர் பிரிவு கால் இறுதி சுற்றில் முதல் நிலை வீரரான ஜெர்மனியின் அலெக்ஸாண்டர் ஜிவேரேவ், 70-ம் நிலை வீரரான நெதர்லாந்தின் போடிக் வான் டி ஜாண்ட்சுல்புடன் மோதினார். இதில் ஜிவேரேவ் 6-2, 7-5, 6-1 என்ற செட் கணக்கில் வெற்றி பெற்று அரை இறுதி சுற்றுக்கு முன்னேறினார்.
அரை இறுதியில் ஜிவேரேவ், 50-ம் நிலை வீரரான ரஷ்யாவின் கரேன் கச்சனோவுடன் மோதுகிறார். கரேன் கச்சனோவ், கால் இறுதி சுற்றில் 28-ம் நிலை வீரரான பெல்ஜியத்தின் அலெக்ஸாண்டர் பிளாக்ஸுடன் மோதினார். இதிதில் கரேன் கச்சனோவ் 6-2, 7-5, 3-2 என்ற செட் கணக்கில் முன்னிலையில் இருந்த போது காயம் காரணமாக அலெக்ஸாண்டர் பிளாக்ஸ் போட்டியில் இருந்து விலகினார். இதனால் கரேன் கச்சனோவ் வெற்றி பெற்றதாக அறிவிக்கப்பட்டது.
மகளிர் ஒற்றையர் பிரிவு கால் இறுதி சுற்றில் 4-ம் நிலை வீராங்கனையான அமெரிக்காவின் கோ கோ காஃப், 5-ம் நிலை வீராங்கனையான ரஷ்யாவின் மிர்ரா ஆண்ட்ரீவாவை எதிர்த்து விளையாடினார். இதில் கோ கோ காஃப் 2-6, 7-6 (9-7), 6-2 என்ற செட் கணக்கில் வெற்றி பெற்று அரை இறுதி சுற்றுக்கு முன்னேறினார்.
மற்றொரு கால் இறுதி சுற்றில் 2-ம் நிலை வீராங்கனையான கஜகஸ்தானின் எலெனா ரைபகினா, 121-ம் நிலை வீராங்கனையான சீனாவின் ஜெங் குயின்வென்னுடன் மோதினார். இதில் ரைபகினா 3-6, 6-1, 6-4 என்ற செட் கணக்கில் வெற்றி பெற்றார். அரை இறுதி சுற்றில் ரைபகினா, கோ கோ காஃபுடன் மோதுகிறார்.
நம்பர் 1 இடம் உறுதி
நடப்பு அமெரிக்க ஓபன் டென்னிஸ் தொடரில் 2-ம் நிலை வீராங்கனையான கஜகஸ்தானின் எலெனா ரைபகினா அரை இறுதி சுற்றுக்கு முன்னேறி உள்ளார். இதன் மூலம் அவர், டென்னிஸ் தரவரிசையில் முதலிடத்தை கைப்பற்றுவதை உறுதி செய்துள்ளார்.
