கிறைஸ்ட்சர்ச்: 5 டி20 போட்டி, 5 ஒருநாள் போட்டி, 2 டெஸ்ட் போட்டிகள் கொண்ட தொடரில் விளையாடுவதற்காக இந்திய அணி, நியூஸிலாந்து சென்றுள்ளது. இதில் டி20 தொடர் இன்று தொடங்குகிறது. கிறைஸ்ட்சர்ச் நகரில் பகல் 12.30 மணிக்கு நடைபெறும் ஆட்டத்தில் ஸ்ரேயஸ் ஐயர் தலைமையிலான இந்திய அணி, மிட்செல் சாண்ட்னர் தலைமையிலான நியூஸிலாந்து அணியை சந்திக்கிறது.
மேற்கு இந்தியத் தீவுகளுக்கு எதிரான தொடர் முடிவடைந்த சில நாட்களிலேயே அனுபவம் இல்லாத வீரர்களை உள்ளடக்கிய ஸ்ரேயஸ் ஐயர் தலைமையிலான இந்திய அணி பயிற்சி பெற போதுமான நேரமும், சூழ்நிலைகளை அறிந்து கொள்ள அவகாசமும் இல்லாத நிலையில் நியூஸிலாந்து மண்ணில் விளையாட உள்ளது.
தற்போதைய இந்திய அணியில் இடம் பெற்றுள்ள வீரர்களில் ஸ்ரேயஸ் ஐயர், இஷான் கிஷன், சஞ்சு சாம்சன், ஷிவம் துபே ஆகியோர் மட்டுமே நியூஸிலாந்தில் இதற்கு முன்னர் விளையாடி உள்ளனர். அபிஷேக் சர்மா, திலக் வர்மா, 15 வயதாகும் வைபவ் சூர்யவன்ஷி போன்றவர்கள் அதிரடியாக ரன் குவிக்கக் கூடியவர்களாக இருந்தாலும், நியூஸிலாந்தின் வேகத்துக்கும் ஸ்விங் பந்துவீச்சுக்கும் சாதகமான ஆடுகளம் மற்றும் தட்பவெப்ப நிலைக்கு ஏற்ப தங்களை மாற்றிக்கொள்ள வேண்டியிருக்கும்.
ஹர்திக் பாண்டியா, பும்ரா ஆகியோர் இல்லாதது இந்திய அணிக்கு பின்னடைவாகவே கருதப்படுகிறது. எனினும் அனுபவம் வாய்ந்த புவனேஷ்வர் குமார் 4 வருடங்களுக்கு பிறகு அணிக்கு திரும்பி இருப்பது பலம் சேர்க்கக்கூடும். மேலும் வருண் சக்ரவர்த்தியும் காயத்தில் இருந்து மீண்டு வந்துள்ளார்.
நியூஸிலாந்து அணியில் அதிரடி பேட்டர்களான கிளென் பிலிப்ஸ், ஃபின் ஆலன், ரச்சின் ரவீந்திரா, டெவன் கான்வே ஆகியோர் இந்திய பந்துவீச்சு துறைக்கு சவால்தரக்கூடும். பந்துவீச்சில் ஜேக்கப் டஃபி, மேட் ஹென்றி, ஆடம் மில்னே, லாக்கி பெர்குசன், கைல் ஜேமிசன், பிளேர் டிக்னர் ஆகியோர் இந்திய அணியின் பேட்டிங் வரிசைக்கு அழுத்தம் கொடுக்கக்கூடும்.
