ஸ்பெயினின் வலப்புற இரும்புச் சுவர்... உலகக் கோப்பை கனவை சுமந்து நிற்கும் பெட்ரோ போரோ!

பிரான்ஸை மவுனமாக்கிய அந்த ஒரு தருணம்... உலகக் கோப்பை போன்ற பெரிய மேடைகளில் சில தருணங்கள் ஒரு வீரரின் வாழ்க்கையையே மாற்றிவிடும். பெட்ரோ போரோவுக்கும் அது அப்படிப்பட்ட ஒரு இரவாகவே அமைந்தது. 2026 ஃபிஃபா உலகக் கோப்பை அரையிறுதியில் உலக சாம்பியன் பட்டத்தை நோக்கி முன்னேற வேண்டும் என்ற ஒரே இலக்குடன் ஸ்பெயினும், பிரான்ஸும் மோதிக்கொண்டிருந்தன. ஒரு கோல் முன்னிலையில் இருந்த ஸ்பெயினுக்கு ஒவ்வொரு நிமிடமும் ஒரு சோதனையாக மாறியது.

பிரான்ஸ் தாக்குதலைத் தீவிரப்படுத்திக் கொண்டிருந்த அந்த நேரத்தில், 58-வது நிமிடத்தில் வலதுபுறம் மின்னல் வேகத்தில் முன்னேறிய பெட்ரோ போரோ, டானி ஓல்மோவுடன் இணைந்து உருவாக்கிய தாக்குதலை கோலாக மாற்றினார். அந்த கோல், பிரான்ஸின் மீள்வதற்கான நம்பிக்கையை முறியடித்ததோடு, ஸ்பெயினின் உலகக் கோப்பை இறுதிப்போட்டி கனவையும் நனவாக்கியது. அந்த ஆட்டத்தின் சிறந்த வீரர் என்ற விருதையும் கைப்பற்றிய போரோ, உலகம் முழுவதும் பேசப்படத்தொடங்கினார். ஆனால், அந்த ஒரு கோலுக்குப் பின்னால் இருந்ததோ பல ஆண்டுகால போராட்டங்களால் நிரம்பிய வாழ்க்கைப் பயணம்.

வறுமையிலிருந்து உலக மேடைக்கு…

1999-ம் ஆண்டு செப்டம்பர் 13-ம் தேதி ஸ்பெயினின் டான் பெனிட்டோ நகரில் லூயிஸ் மற்றும் ஈவா தம்பதியருக்கு மகனாகப் பிறந்தார் பெட்ரோ அன்டோனியோ போரோ சாஸெடா. ஜிம்னாஸ்டிகோ டான் பெனிட்டோ (Gimnástico Don Benito) மற்றும் ராயோ வலேகானோ (Rayo Vallecano) இளைஞர் அணிகளில் தனது கால்பந்து பயணத்தைத் தொடங்கினார். பொருளாதாரச் சவால்களுக்கு மத்தியிலும், மகனின் கனவை நனவாக்க வேண்டும் என்ற உறுதியுடன் அவரது பெற்றோர் இருவரும் இடைவிடாமல் உழைத்தனர். அவர்கள் வேலைக்குச் சென்ற நேரங்களில் அவரது தாத்தா அன்டோனியோதான் ஒவ்வொரு பயிற்சிக்கும் போட்டிக்கும் அழைத்துச் சென்று பேரனின் கால்பந்து கனவை வளர்த்தார்.

உலகத் தர வீரராக உயர்ந்த பிறகு, தாத்தா கண்ணீருடன், “என் பேரன் உலகக் கால்பந்தின் உச்சியை அடைந்ததை பார்த்துவிட்டேன்; இப்போது நான் நிம்மதியாக இறக்கலாம்” என்று கூறியதாக போரோ பகிர்ந்தது, அவரது குடும்பத்தின் தியாகத்தை வெளிப்படுத்துவதாக அமைந்தது.

2017-18 பருவத்தில் ஜிரோனா அணிக்காக லா லிகாவில் அறிமுகமான போரோ, தனது முதல் சீசனிலேயே 32 போட்டிகளில் விளையாடி ஒரு கோல் அடித்தார். வெறும் 19 வயதிலேயே ஐரோப்பிய கிளப்புகளின் கவனத்தை ஈர்த்த அவரது அதிரடி ஆட்டம்தான் பின்னர் மான்செஸ்டர் சிட்டிக்கான கதவைத் திறந்தது. வேகமான ஓட்டம், துல்லியமான கிராஸ்கள், தாக்குதலிலும் பாதுகாப்பிலும் சமநிலையான ஆட்டம் ஆகியவை அவரை இளம் வயதிலேயே ஸ்பெயினின் சிறந்த வலதுபுற பாதுகாவலர்களில் ஒருவராக அடையாளப்படுத்தின.

மறக்கப்பட்ட வீரரின் மறுபிறவி

2019-ல் சுமார் 13 மில்லியன் யூரோ மதிப்பில் மான்செஸ்டர் சிட்டி அவரை ஒப்பந்தம் செய்தது. இளம் வயதிலேயே பிரீமியர் லீக் சாம்பியன்களின் கவனத்தை ஈர்த்த இந்த வாய்ப்பு, அவரது கனவு நனவான தருணமாகக் கருதப்பட்டது.

ஆனால், அந்த கனவு நிஜமாகவில்லை. முதல் அணிக்காக ஒரு போட்டியில்கூட விளையாட முடியாமல், உடனடியாக ரியல் வல்லடொலிட் அணிக்கு கடனில் அனுப்பப்பட்டார். காயங்களால் பாதிக்கப்பட்ட அந்த பருவம் அவரது வாழ்க்கையில் ஏமாற்றமாக அமைந்தது. பின்னர் அவர் கூறிய, “நான் ஒப்பந்தம் செய்யப்பட்டதே பெப் குவார்டியோலாவுக்கு தெரிந்திருக்காது என்று நினைக்கிறேன்” என்ற வார்த்தைகள், அந்த வேதனையை வெளிப்படுத்துவதாக அமைந்தன.

2019-20 பருவத்தில் ரியல் வல்லடொலிட் அணிக்காக 14 லா லிகா போட்டிகளில் மட்டுமே களமிறங்கிய அவர், காயங்களும் தொடர்ச்சியான வாய்ப்பின்மையும் காரணமாக எதிர்பார்த்த முன்னேற்றத்தை பெற முடியவில்லை. அந்த நேரத்தில் பலர் அவரது பயணம் அங்கேயே முடிந்துவிட்டதாகவே நினைத்தனர். ஆனால், அங்கேயே அவர் நின்றுவிடவில்லை.

2020-ல் ஸ்போர்ட்டிங் சிபியில் இணைந்த போரோவின் வாழ்க்கை புதிய திருப்பம் கண்டது. 2020-21-ம் ஆண்டு, 19 ஆண்டுகளுக்குப் பிறகு அந்த அணிக்கு ப்ரிமேரா லிகா (primeira liga) பட்டத்தை வென்று கொடுத்ததில் முக்கிய பங்காற்றினார். அந்த சீசனில் 37 போட்டிகளில் களமிறங்கி 4 கோல்கள், 4 அசிஸ்ட்கள் பதிவு செய்த அவர், லீக்கின் சிறந்த ஃபுல் பேக்களில் ஒருவராக உருவெடுத்தார்.

அந்த அசத்தலான ஆட்டத்துக்காக தொடர்ந்து இரண்டு ஆண்டுகள் ப்ரிமேரா லிகா டீம் ஆப் தி இயரில் (Primeira Liga Team of the Year) இடம்பிடித்தார். அதுமட்டுமல்லாமல், இரண்டு லீக் கோப்பை பட்டங்களையும் வென்றார். மான்செஸ்டர் சிட்டியில் கிடைக்காத அங்கீகாரம், போர்ச்சுகலில் அவரை புதிய வீரராக உலகுக்கு அறிமுகப்படுத்தியது.

டாட்டன்ஹாமில் நிரூபித்த தரம்

2023 ஜனவரியில் சுமார் 45 மில்லியன் யூரோ மதிப்பில் டாட்டன்ஹாம் ஹாட்ஸ்பரில் இணைந்த போரோவுக்கு, அந்த ஒப்பந்தம் அவரது வாழ்க்கையின் மிகப்பெரிய திருப்புமுனையாக அமைந்தது. விரைவிலேயே அவர் அணியின் முக்கிய வீரராக மாறினார். 2025-26ம் ஆண்டின் பிரீமியர் லீக்கில் 34 போட்டிகளில் விளையாடி, 1 கோல், 2 அசிஸ்ட்கள், 252 கிராஸ்கள், 51 டாக்கிள்கள் என பாதுகாப்பிலும், தாக்குதலிலும் சமமான பங்களிப்பை வழங்கினார்.

யூஈஎஃப்ஏ (UEFA) சாம்பியன்ஸ் லீக்கில் 9 போட்டிகளில் 1 கோல், 2 அசிஸ்ட்கள் பதிவு செய்ததுடன், அதற்கு முந்தைய பருவத்தில் டாட்டன்ஹாமின் யூரோபோ லீக் (UEFA Europa League) வெற்றியிலும் முக்கிய பங்காற்றினார்.

உலகக் கோப்பையில் ஸ்பெயினின் நம்பிக்கை

2021-ல் ஸ்பெயின் தேசிய அணிக்காக அறிமுகமான போரோ, யூஈஎஃப்ஏ நேஷன்ஸ் மற்றும் யூரோ குவாலிஃபையர்ஸ் (Euro Qualifiers) தொடர்களில் தொடர்ந்து வாய்ப்புகளை பெற்ற அவர், 2026 உலகக் கோப்பைக்கு முன்னர் 20-க்கும் மேற்பட்ட சர்வதேச போட்டிகளில் விளையாடிய அனுபவத்துடன் களமிறங்கினார்.

2026 உலகக் கோப்பையில் முதல் வலதுபுற பாதுகாவலராக களமிறங்கினார். அடுத்த ஐந்து போட்டிகளில் 444 நிமிடங்கள் விளையாடிய அவர், 2 கோல்கள் அடித்து, 4 கிளீன் ஷீட்டுகளுக்கு பங்களித்ததுடன், 11 டாக்கிள்களையும் பதிவு செய்தார். பாதுகாப்பில் மட்டுமல்லாமல், தொடர்ந்து ஓவர்லேப் ஓட்டங்கள் மூலம் ஸ்பெயினின் தாக்குதலுக்கும் கூடுதல் வேகத்தை வழங்கிய அவரது ஆட்டம், நவீன ஃபுல் பேக் என்ற அடையாளத்தை முழுமையாக வெளிப்படுத்தியது.

ஆஸ்திரியாவுக்கு எதிரான நாக் அவுட் போட்டியில் உலகக் கோப்பையில் தனது முதல் கோலை அடித்த அவர், பிரான்ஸுக்கு எதிரான அரையிறுதியிலும் கோல் அடித்து ஸ்பெயினை இறுதிப்போட்டிக்கு அழைத்துச் சென்றார். அந்த ஆட்டத்தில் ‘மேன் ஆப் தி மேட்ச்’ என்ற விருதும் பெற்றார்.

அதே நேரத்தில், இளம் நட்சத்திரமான லமின் யமாலுடன் வலதுபுறத்தில் உருவான அவரது புரிதல், ஸ்பெயின் தாக்குதலின் மிகப்பெரிய பலமாக மாறியது. யமாலின் டிரிப்ளிங்கும், போரோவின் ஓவர்லேப் ஓட்டங்களும் எதிரணி பாதுகாப்பை தொடர்ந்து சிதறடித்ததால், அந்த கூட்டணி ரசிகர்களிடமும் கால்பந்து நிபுணர்களிடமும் பெரும் வரவேற்பைப் பெற்றது. பாதுகாப்பில் உறுதியாக நின்றதோடு, ஒவ்வொரு தாக்குதலிலும் கூடுதல் வீரராக இணைந்த அவரது ஆட்டம்தான் ஸ்பெயினின் வலதுபுறத்தை எதிரணிகளுக்கு மிகப்பெரிய தலைவலியாக மாற்றியது.

பெட்ரோ போரோவின் வாழ்க்கை, திறமை மட்டுமே வெற்றியைத் தராது என்பதையும், தோல்விக்குப் பிறகு மீண்டும் எழும் மனநிலையே ஒரு வீரரை வரலாற்றில் நிலைநிறுத்தும் என்பதையும் நிரூபிக்கிறது. ஜிரோனாவில் தொடங்கிய பயணம், மான்செஸ்டர் சிட்டியில் கிடைக்காத வாய்ப்பு, ஸ்போர்ட்டிங்கில் கிடைத்த மறுபிறப்பு, டாட்டன்ஹாமில் நிரூபித்த தரம் என ஒவ்வொரு அத்தியாயமும் அவரை இன்னும் வலிமையான வீரராகவே மாற்றியது.

இன்று உலகக் கோப்பை இறுதிப்போட்டியில் ஸ்பெயினின் கனவை சுமக்கும் நம்பிக்கையின் தூணாக அவர் நிற்கிறார். உலகக் கோப்பையை அவர் உயர்த்துகிறாரா என்பது ஜூலை 19-ஆம் தேதி தெரியவரும்.

ஒரு காலத்தில் வாய்ப்புக்காக காத்திருந்த இளைஞன், இன்று ஒரு நாட்டின் உலகக் கோப்பை கனவை சுமக்கும் வீரராக மாறியிருக்கிறார். கிடைக்காத வாய்ப்புகளை விடாமல் பிடித்து, அவற்றையே தனது அடையாளமாக மாற்றிய வீரராக பெட்ரோ போரோ ஏற்கெனவே உலகக் கால்பந்தில் தனக்கென ஒரு இடத்தைப் பதித்துவிட்டார்