பிரிஸ்பன்: ஆஸ்திரேலியாவுக்கு எதிரான ஆஷஸ் டெஸ்ட் தொடரின் 2-வது டெஸ்டின் முதல் நாள் ஆட்டத்தில் இங்கிலாந்து அணி 9 விக்கெட்கள் இழப்புக்கு 325 ரன்கள் குவித்தது. ஆஸ்திரேலிய மண்ணில் முதன்முறையாக சதம் விளாசி அசத்தினார் சீனியர் பேட்ஸ்மேனான ஜோ ரூட்.
பிரிஸ்பனில் உள்ள காபா மைதானத்தில் பகலிரவு போட்டியாக நேற்று தொடங்கிய இந்த டெஸ்டில் டாஸ் வென்ற இங்கிலாந்து அணி பேட்டிங் செய்தது. அந்த அணியில் ஒரே ஒரு மாற்றம் செய்யப்பட்டு இருந்தது. காயம் அடைந்த மார்க் வுட்டுக்கு பதிலாக சுழற்பந்து வீச்சு ஆல்ரவுண்டரான வில் ஜேக்ஸ் சேர்க்கப்பட்டார். இதேபோன்று ஆஸ்திரேலிய அணியில் நேதன் லயன் நீக்கப்பட்டு மைக்கேல் நேசர் களமிறக்கப்பட்டார். பேட்டிங்கை தொடங்கிய இங்கிலாந்து அணிக்கு தொடக்கமே அதிர்ச்சியாக இருந்தது. பென் டக்கெட், ஆலி போப் ஆகியோர் ரன் ஏதும் எடுக்காத நிலையில் மிட்செல் ஸ்டார்க் பந்தில் ஆட்டமிழந்தனர்.
5 ரன்களுக்கு 2 விக்கெட்களை பறிகொடுத்த நிலையில் களமிறங்கிய ஜோ ரூட், ஸாக் கிராலியுடன் இணைந்து பார்ட்னர்ஷிப்பை கட்டமைத்தார். 117 ரன்கள் சேர்த்த இந்த ஜோடியை மைக்கேல் நேசர் பிரித்தார்.
தனது 20-வது அரை சதத்தை கடந்த ஸாக் கிராலி 93 பந்துகளில், 11 பவுண்டரிகளுடன் 76 ரன்கள் எடுத்த நிலையில் மைக்கேல் நேசர் பந்தை மிட்விக்கெட் திசையில் அடிக்க முயன்றபோது மட்டை விளிம்பில் பட்டு விக்கெட் கீப்பர் அலெக்ஸ் கேரியிடம் கேட்ச் ஆனது.
இதையடுத்து களமிறங்கிய ஹாரி புரூக் 33 பந்துகளில், 4 பவுண்டரிகளுடன் 31 ரன்கள் எடுத்த நிலையில் மிட்செல் ஸ்டார்க் பந்தில் 2-வது சிலிப் திசையில் நின்ற கேப்டன் ஸ்டீவ் ஸ்மித்திடம் பிடிகொடுத்து வெளியேறினார்.
இதையடுத்து களமிறங்கிய கேப்டன் பென் ஸ்டோக்ஸ் 49 பந்துகளில், 4 பவுண்டரிகளுடன் 19 ரன்கள் எடுத்த நிலையில் ரன் அவுட் ஆனார். அவரைத் தொடர்ந்து களமிறங்கிய ஜேமி ஸ்மித் ரன் ஏதும் எடுக்காத நிலையில் ஸ்காட் போலண்ட் பந்தில் ஸ்டெம்பை பறிகொடுத்தார்.
சீரான இடைவெளியில் விக்கெட்கள் சரிந்த போதிலும் நிதானமாக பேட் செய்த ஜோ ரூட் 181 பந்துகளில், 11 பவுண்டரிகளுடன் தனது 40-வது சதத்தை விளாசினார். டெஸ்ட் போட்டியில் ஆஸ்திரேலிய மண்ணில் அவர், அடித்த முதல் சதமாக இது அமைந்தது. இதற்கு முன்னர் 29 இன்னிங்ஸ்களில் இங்கு விளையாடி உள்ள அவரின் அதிகபட்ச ஸ்கோர் 89 ஆக இருந்தது. ஜோ ரூட் சதம் அடித்த பின்னர் வில் ஜேக்ஸ் (19), கஸ் அட்கின்சன் (4), பிரைடன் கார்ஸ் (0) ஆகியோரை சீரான இடைவெளியில் ஆட்டமிழக்கச் செய்து இங்கிலாந்து அணிக்கு அழுத்தம் கொடுத்தார் மிட்செல் ஸ்டார்க்.
அப்போது இங்கிலாந்து அணி 264 ரன்களுக்கு 9 விக்கெட்களை இழந்திருந்தது. இதனால் அந்த அணி விரைவாக ஆட்டமிழக்கக்கூடும் என எதிர்பார்க்கப்பட்டது. ஆனால் கடைசி விக்கெட்டுக்கு களமிறங்கிய ஜோப்ரா ஆர்ச்சர் அதிரடியாக விளையாடி மிரட்டினார். மிட்செல் ஸ்டார்க், ஸ்காட் போலண்ட் பந்துகளில் சிக்ஸர் விளாசி அசத்தினார். ஜோப்ரா ஆர்ச்சரின் அதிரடியால் இங்கிலாந்து அணி 71-வது ஓவரில் 300 ரன்களை கடந்தது. அவருடன் இணைந்து ஜோ ரூட்டும் விரைவாக ரன்கள் சேர்க்க முயன்றார்.
முதல் நாள் ஆட்டத்தின் முடிவில் இங்கிலாந்து அணி 9 விக்கெட்கள் இழப்புக்கு 325 ரன்கள் குவித்தது. ஜோ ரூட் 202 பந்துகளில், ஒரு சிக்ஸர், 15 பவுண்டரிகளுடன் 135 ரன்களும், ஜோப்ரா ஆர்ச்சர் 26 பந்துகளில், 2 சிக்ஸர்கள், ஒரு பவுண்டரியுடன் 32 ரன்களும் சேர்த்து களத்தில் இருந்தனர். ஆஸ்திரேலிய அணி தரப்பில் மிட்செல் ஸ்டார்க் 19 ஓவர்களை வீசி 71 ரன்களை வழங்கி 6 விக்கெட்களை வீழ்த்தினார். ஸ்காட் போலண்ட், மைக்கேல் நேசர் ஆகியோர் தலா ஒரு விக்கெட் கைப்பற்றினர். இன்று 2-வது நாள் ஆட்டம் நடைபெறுகிறது.
