மேக்கே: வங்கதேச கிரிக்கெட் அணி ஆஸ்திரேலியாவில் சுற்றுப்பயணம் செய்து விளையாடி வருகிறது. இரு அணிகள் இடையிலான முதல் டெஸ்ட் போட்டியில் வங்கதேச அணி 9 விக்கெட்கள் வித்தியாசத்தில் வெற்றி பெற்று சாதனை படைத்தது.
இந்நிலையில் 2-வது மற்றும் கடைசி டெஸ்ட் போட்டி வரும் 22-ம் தேதி மேக்கே நகரில் உள்ள கிரேட் பேரியர் ரீஃப் மைதானத்தில் தொடங்குகிறது.
இந்த போட்டிக்கான 13 பேர் கொண்ட ஆஸ்திரேலிய அணி நேற்று அறிவிக்கப்பட்டது. இதில் முதல் டெஸ்ட் போட்டியில் விளையாடிய தொடக்க வீரரான ஜேக் வெதரால்டு நீக்கப்பட்டுள்ளார். அவருக்கு பதிலாக மேட் ரென்ஷா சேர்க்கப்பட்டுள்ளார். மற்றபடி அணியில் மாற்றங்கள் செய்யப்படவில்லை.
ஜேக் வெதரால்டு முதல் டெஸ்ட் போட்டியில் முதல் இன்னிங்ஸில் 23 ரன்களும், 2-வது இன்னிங்ஸில் ரன் ஏதும் எடுக்காமலும் ஆட்டமிழந்து இருந்தார். இதுவரை 12 இன்னிங்ஸ்கள் விளையாடி உள்ள ஜேக் வெதரால்டின் சராசரி 20.36 ஆக உள்ளது.
30 வயதான மேட் ரென்ஷா 2016-ம் ஆண்டு ஆஸ்திரேலிய அணியில் அறிமுகமாகி இருந்தார். இதுவரை 14 டெஸ்ட் போட்டிகளில் விளையாடி ஒரு சதம், 3 அரை சதம் அடித்துள்ளார். அவரது சராசரி 29.31 ஆக உள்ளது. தொடரில் பின்தங்கியுள்ள ஆஸ்திரேலிய அணி கடைசி டெஸ்ட் போட்டியில் வெற்றி பெற வேண்டும் என்ற நெருக்கடியுடன் களமிறங்குகிறது.
ஆஸ்திரேலிய அணி விவரம்: பாட் கம்மின்ஸ் (கேப்டன்), டிராவிஸ் ஹெட், மேட் ரென்ஷா, ஸ்டீவ் ஸ்மித், மார்னஷ் லபுஷேன், அலெக்ஸ் கேரி, ஜோஷ் இங்லிஸ், மேகரூன் கிரீன், பியூ வெப்ஸ்டர், நேதன் லயன், ஸ்காட் போலன்ட், ஜோஷ் ஹேசில்வுட், மிட்செல் ஸ்டார்க்.
