ஐபிஎல் 2026 தொடரின் 16-வது லீக் ஆட்டத்தில், ராயல் சேலஞ்சர்ஸ் பெங்களூரு அணியை 6 விக்கெட் வித்தியாசத்தில் வீழ்த்தி ராஜஸ்தான் ராயல்ஸ் அணி புள்ளிப்பட்டியலில் தனது ஆதிக்கத்தைத் தொடர்கிறது
டாஸ் வென்ற ராஜஸ்தான் கேப்டன் ரியான் பராக் முதலில் பந்துவீச்சைத் தேர்வு செய்தார். பெங்களூரு அணிக்குத் தொடக்கமே அதிர்ச்சியாக அமைந்தது; பில் சால்ட் ரன் ஏதுமின்றி ஆட்டமிழந்தார். விராட் கோலி (32) நிதானமாக ஆட முயன்ற போதிலும், ரவி பிஷ்னோய் பந்துவீச்சில் ஆட்டமிழந்தார்.
ஒரு கட்டத்தில் 94 ரன்களுக்கு 6 விக்கெட்டுகளை இழந்து தவித்த பெங்களூரு அணியை, கேப்டன் ரஜத் பாட்டிதார் (63 ரன்கள்) மற்றும் இம்பாக்ட் பிளேயர் வெங்கடேஷ் ஐயர் (29 ரன்கள்) ஆகியோர் மீட்டெடுத்தனர். இதன் பலனாக பெங்களூரு அணி 20 ஓவர்களில் 201 என்ற இலக்கை எட்டியது. ராஜஸ்தான் தரப்பில் பிரிஜேஷ் சர்மா மற்றும் ஜோஃப்ரா ஆர்ச்சர் தலா 2 விக்கெட்டுகளை வீழ்த்தினர்.
202 ரன்கள் என்ற இலக்கை நோக்கி ஆடிய ராஜஸ்தான் அணிக்கு வைபவ் சூர்யவன்ஷி மின்னல் வேகத் தொடக்கத்தை அளித்தார். வெறும் 26 பந்துகளில் 8 பவுண்டரிகள் மற்றும் 7 சிக்ஸர்களுடன் 78 ரன்கள் குவித்த அவருக்கு, மைதானமே எழுந்து நின்று மரியாதை அளித்தது. துருவ் ஜூரல் 43 பந்துகளில் 81 ரன்கள் விளாசி இறுதிவரை ஆட்டமிழக்காமல் இருக்க, ராஜஸ்தான் அணி 18 ஓவர்களிலேயே 202 ரன்கள் எடுத்து அபார வெற்றி பெற்றது. பெங்களூரு தரப்பில் க்ருணால் பாண்டியா மற்றும் ஜோஷ் ஹேசில்வுட் தலா 2 விக்கெட்டுகளை வீழ்த்தினர்.
விளையாடிய 4 போட்டிகளிலும் வெற்றி பெற்றுள்ள ராஜஸ்தான் ராயல்ஸ் அணி 8 புள்ளிகளுடன் முதலிடத்தில் நீடிக்கிறது. பெங்களூரு அணி தனது முதல் தோல்வியைச் சந்தித்துள்ளது. அதிரடியாக விளையாடி வெற்றிக்கு வித்திட்ட வைபவ் சூர்யவன்ஷி ஆட்டநாயகனாகத் தேர்வு செய்யப்பட்டார்.
