நவி மும்பை: மகளிர் பிரிமீயர் லீக் டி 20 தொடரில் நேற்று நவிமும்பையில் நடைபெற்ற ஆட்டத்தில் குஜராத் ஜெயண்ட்ஸ் - யுபி வாரியர்ஸ் அணிகள் மோதின. முதலில் பேட் செய்த குஜராத் அணி 20 ஓவர்களில் 4 விக்கெட்கள் இழப்புக்கு 207 ரன்கள் குவித்தது.
கேப்டன் ஆஷ்லே கார்ட்னர் 41 பந்துகளில், 3 சிக்ஸர்கள், 6 பவுண்டரிகளுடன் 65 ரன்களும், அனுஷ்கா சர்மா 30 பந்துகளில், 7 பவுண்டரிகளுடன் 44 ரன்களும் விளாசினர். இறுதிக் கட்டத்தில் மட்டையை சுழற்றிய ஜார்ஜியா வார்ஹாம் 10 பந்துகளில், 3 சிக்ஸர்கள், ஒரு பவுண்டரியுடன் 27 ரன்கள் சேர்த்தார்.
208 ரன்கள் இலக்குடன் பேட் செய்த யுபி வாரியர்ஸ் அணி 20 ஓவர்களில் 8 விக்கெட்கள் இழப்புக்கு 197 ரன்கள் எடுத்து தோல்வி அடைந்தது. அதிகபட்சமாக ஃபோப் லிட்ச் ஃபீல்ட் 40 பந்துகளில், 5 சிக்ஸர்கள், 8 பவுண்டரிகளுடன் 78 ரன்கள் விளாசினார்.
கேப்டன் மெக் லேனிங் 30, ஸ்வேதா ஷேராவத் 25, ஆஷா சோபனா 27 ரன்கள் சேர்த்தனர். 10 ரன்கள் வித்தியாசத்தில் வெற்றி பெற்ற குஜராத் ஜெயண்ட்ஸ் அணி 2 புள்ளிகளை பெற்றது.
