சுஜீத் கல்கல்
ஆசிய விளையாட்டுப் போட்டியில் மல்யுத்தத்தில் ஆடவருக்கான 65 கிலோ எடைப்பிரிவில் தங்கம் வென்று வரலாற்றுச் சாதனை படைத்துள்ளார் இந்தியாவின் சுஜீத் கல்கல். இறுதிப் போட்டியில் அவர், தஜிகிஸ்தான் வீரர் அப்துல்மஜித் குடியேவுக்கு எதிராக 2-9 என பின்தங்கிய நிலையிலிருந்து மீண்டு வந்து தங்கப் பதக்கம் வென்றது அனைவரையும் மெய்சிலிர்க்க வைத்துள்ளது.
ஈரான் மற்றும் ஜப்பான் நாடுகளின் பலம் வாய்ந்த மல்யுத்த வீரர்களை வீழ்த்தி இறுதிப் போட்டிக்கு முன்னேறிய சுஜீத்துக்கு, தஜிகிஸ்தான் வீரர் அப்துல்மஜித் குடியேவ் கடுமையான சவாலை அளித்தார். போட்டியின் தொடக்கத்தில் தனது அசாத்திய வேகத்தால் மிரட்டிய குடியேவ் 9-2 என்ற கணக்கில் முன்னிலை பெற்று ஆதிக்கம் செலுத்தினார்.
முதல் பாதியில் சுஜீத்தின் தாக்குதல் யுக்திகளைத் தடுத்து கைப்பூட்டு உத்திகளைக் கையாண்ட குடியேவ்வுக்கு எதிராக, இரண்டாம் பாதியில் தனது மின்னல் வேகத்தைக் கையில் எடுத்தார் சுஜீத். எதிராளியின் பலத்தை அவரது வேகத்தால் முறியடித்த அவர், அடுத்தடுத்து புள்ளிகளைக் குவித்து இடைவெளியை 8-9 எனக் குறைத்தார்.
போட்டி முடிய வெறும் 20 விநாடிகள் மட்டுமே இருந்த நிலையில், அவர் தொடுத்த அதிரடியான டேக்-டவுன் மூவ் மூலம் வெற்றிக்கான புள்ளியைப் பெற்று, இறுதி வரை தனது ஒரு புள்ளி முன்னிலையைக் காப்பாற்றி 10-9 என்ற கணக்கில் சிலிர்ப்பூட்டும் வெற்றியைப் பதிவு செய்தார்.
இது சுஜீத்தின் முதல் ஆசிய விளையாட்டுத் தங்கமாகும். கடந்த 2023-ம் ஆண்டு ஹாங்சோவில் நடைபெற்ற ஆசிய விளையாட்டுப் போட்டிக்கான தேர்வின்போது, முறைப்படி தன்னை எதிர்த்துப் போட்டியிட அனுமதிக்காமல் பஜ்ரங் பூனியாவுக்கு நேரடி வாய்ப்பு வழங்கப்பட்டதை எதிர்த்து சுஜீத் நீதிமன்றத்தை அணுகி இருந்தார்.
ஆனால் இறுதியில் பஜ்ரங் பூனியாவே ஹாங்சோ போட்டிக்கு சென்றார். சுஜீத்துக்கு வாய்ப்பு கிடைக்கவில்லை. எனினும் அந்த சோதனைகளைக் கடந்து தற்போது தனது அசாத்திய திறமையால் தங்கம் வென்று நாட்டுக்கு பெருமை சேர்த்துள்ளார். மேலும் கடந்த 12 மாதங்களில் பங்கேற்ற அனைத்து வகையிலான சர்வேதச போட்டிகளிலும் சாம்பியன் பட்டம் வென்றுள்ளார். இதன் மூலம் 2028 ஒலிம்பிக் போட்டிக்கான இந்தியாவின் மிகப்பெரிய பதக்க நம்பிக்கையாக சுஜீத் உருவெடுத்துள்ளார்.
