கார்லோஸ் அல்கராஸ்
மெல்பர்ன்: ஆண்டின் முதல் கிராண்ட் ஸ்லாம் தொடரான ஆஸ்திரேலிய ஓபன் டென்னிஸ் தொடர் ஆஸ்திரேலியாவில் உள்ள மெல்பர்ன் நகரில் இன்று (18-ம் தேதி தொடங்குகிறது. வரும் பிப்ரவரி 1-ம் தேதி வரை நடைபெறும் இந்தத் தொடரில் உலகில் உள்ள முன்னணி வீரர், வீராங்கனைகள் கலந்து கொண்டு பட்டம் வெல்ல மோதுகின்றனர்.
போட்டித் தரவரிசையில் ஆடவர் ஒற்றையர் பிரிவில் ஸ்பெயினின் கார்லோஸ் அல்கராஸுக்கு முதலிடம் வழங்கப்பட்டுள்ளது. 2 முறை சாம்பியனான இத்தாலியின் ஜன்னிக் சின்னருக்கு 2-வது இடமும் ஜெர்மனியின் அலெக்ஸாண்டர் ஜிவேரேவுக்கு 3-வது இடமும், 10 முறை சாம்பியனான செர்பியாவின் நோவக் ஜோகோவிச்சுக்கு 4-வது இடமும் கொடுக்கப்பட்டுள்ளது.
இத்தாலியின் லோரென்சோ முசெட்டி, ஆஸ்திரேலியாவின் அலெக்ஸ் டி மனார், கனடாவின் பெலிக்ஸ் ஆகர்-அலியாசிம், அமெரிக்காவின் பென் ஷெல்டன், டெய்லர் ஃபிரிட்ஸ், கஜகஸ்தானின் அலெக்சாண்டர் பப்ளிக் ஆகியோர் முறையே 5 முதல் 10-வது இடங்களில் உள்ளனர்.
மகளிர் ஒற்றையர் பிரிவில் பெலாரஸின் அரினா சபலென்கா, போலந்தின் இகா ஸ்வியாடெக், அமெரிக்காவின் கோ கோ காஃப் ஆகியோருக்கு முறையே முதல் 3 இடங்கள் கொடுக்கப்பட்டுள்ளன. நடப்பு சாம்பியனான அமெரிக்காவின் மேடிசன் கீஸுக்கு 9-வது இடம் வழங்கப்பட்டுள்ளது.
தொடக்க நாளான இன்று ஆடவர் ஒற்றையர் பிரிவில் நடைபெறும் முக்கியமான ஆட்டங்களில் முதல் நிலை வீரரான ஸ்பெயினின் கார்லோஸ் அல்கராஸ், தரவரிசையில் 74-வது இடத்தில் உள்ள ஆஸ்திரேலியாவின் ஆடம் வால்டனுடன் மோதுகிறார். 22 வயதான அல்கராஸ் பிரெஞ்சு ஓபன், விம்பிள்டன், யு.எஸ். ஓபன் ஆகிய கிராண்ட்ஸ்லாம் தொடர்களில் தலா 2 முறை சாம்பியன் பட்டம் வென்றுள்ளார். ஆனால் இதுவரை அவர், ஆஸ்திரேலிய ஓபன் பட்டத்தை கைப்பற்றவில்லை.
இதற்கு முன்னர் 4 முறை அவர், ஆஸ்திரேலிய ஓபனில் விளையாடி உள்ளார். இதில் அதிகபட்ச மாக அவர், கடந்த 2024 மற்றும் 2025-ம் ஆண்டுகளில் கால் இறுதி சுற்று வரை முன்னேறியிருந்தார். 5-வது முறையாக ஆஸ்திரேலிய ஓபனில் களமிறங்கும் அல்கராஸ் இம்முறை கோப்பையை வெல்வதற்கு தீவிர முனைப்பு காட்டக்கூடும்.
அவருக்கு 2-ம் நிலை வீரரான இத்தாலியின் ஜன்னிக் சின்னர் கடும் சவால் அளிகக்கக்கூடும். ஏனெனில் கடந்த 2 வருடங்களாக பெரும்பாலான கிராண்ட் ஸ்லாம் தொடர்களின் இறுதிப் போட்டியில் இவர்களே நேருக்கு நேர் பலப்பரீட்சை நடத்தி உள்ளனர். நடப்பு சாம்பியனான ஜன்னிக் சின்னர் தனது முதல் சுற்றில் பிரான்ஸின் ஹியூகோ காஸ்டனுடன் நாளை மோதுகிறார். அதேவேளையில் 10 முறை சாம்பியனான செர்பியாவின் நோக் ஜோகோவிச், ஸ்பெயின் வீரர் பெட்ரோ மார்டினெஸுடன் நாளை பலப்பரீட்சை நடத்துகிறார்.
இன்று நடைபெறும் மற்ற ஆட்டங்களில் ஜெர்மனியின் அலெக்சாண்டர் ஜிவேரேவ், கனடாவின் கேப்ரியல் டயல்லோவுடனும், 10-ம் நிலை வீரரான கஜகஸ்தானின் அலெக்சாண்டர் பப்ளிக், அமெரிக்காவின் ஜென்சன் ப்ரூக்ஸ்பியுடனும், 29-ம் நிலை வீரரான அமெரிக்காவின் பிரான்செஸ் தியாபோ, தகுதி நிலை வீரரான ஆஸ்திரேலியாவின் ஜேசன் குப்லருடனும், 26-ம் நிலை வீரரான இங்கிலாந்தின் கேமரூன் நோரி, பிரான்ஸின் பெஞ்ஜமின் போன்ஸியுடனும் மோதுகின்றனர்.
மகளிர் ஒற்றையர் பிரிவில் முதல் நிலை வீராங்கனையான பெலாரஸின் அரினா சபலென்கா, 20-ம் நிலை வீராங்கனையான பிரான்ஸின் டியன்ட்சோவா ரகோடோமங்கா ராஜாவோனாவுடன் மோதுகிறார். 7-ம் நிலை வீராங்கனையான இத்தாலியின் ஜாஸ்மின் பவுலினி, தகுதி நிலை வீராங்கனையான பெலாரஸின் அலியாக்சாண்ட்ரா சஸ்னோவிச்சுடனும், கிரீஸின் மரியா சக்காரி, பிரான்ஸின் லியோலியா ஜீன்ஜீனுடனும், இங்கிலாந்தின் எம்மா ரடுகானு, தாய்லாந்தின் மனஞ்சயா சவாங்கேவுடனும், 12-ம் நிலை வீராங்கனையான உக்ரைனின் எலினா ஸ்விட்டோலினா, ஸ்பெயினின் கிறிஸ்டினா புக்சாவுடனும் மோதுகின்றனர்.
45 வயதான அமெரிக்காவின் வீனஸ் வில்லியம்ஸ் தகுதி நிலை வீராங்கனையாக களமிறங்குகிறார். இதன் மூலம் கிராண்ட் ஸ்லாம் தொடரில் களமிறங்கும் அதிக வயது வீராங்கனை என்ற சாதனையை வீனஸ் வில்லியம்ஸ் படைக்க உள்ளார். அவர், தனது முதல் சுற்றில் இன்று செர்பியாவின் ஒல்கா டேனிலோவிச்சுடன் மோதுகிறார்.
