2026 FIFA உலகக் கோப்பையின் 15-வது போட்டி நாளில் குரூப் டி, இ மற்றும் எஃப்-இன் லீக் சுற்றுப் போட்டிகள் நிறைவடைந்தன. இதன்மூலம் இந்த மூன்று பிரிவுகளிலும் நாக்-அவுட் சுற்றுக்கு முன்னேறும் அணிகள் பெரும்பாலும் உறுதி செய்யப்பட்டுள்ளன.
குரூப் இ: ஜெர்மனி முதலிடத்தையும், ஐவரி கோஸ்ட் இரண்டாவது இடத்தையும் பிடித்து நேரடியாக ரவுண்ட் ஆஃப் 32-க்கு முன்னேறின. மூன்றாவது இடத்தில் உள்ள ஈக்வடார் சிறந்த மூன்றாவது இட அணிகளில் ஒன்றாக அடுத்த சுற்றுக்குத் தகுதி பெற்றது. குராகோ போட்டியிலிருந்து வெளியேறியது.
குரூப் எஃப்: நெதர்லாந்து முதலிடத்திலும், ஜப்பான் இரண்டாவது இடத்திலும் முடித்து நாக்-அவுட் சுற்றை எட்டின. ஸ்வீடன் மூன்றாவது இடத்தில் இருந்தாலும் சிறந்த மூன்றாவது இட அணிகளில் ஒன்றாக அடுத்த சுற்றுக்குத் தகுதி பெற்றது. துனிசியா வெளியேறியது.
ஜப்பான் - பிரேசில் அணிகள் ரவுண்ட் 32 நாக்-அவுட் ஆட்டத்தில் ஜூன் 29-ம் தேதி மோதுகிறது. இந்திய நேரம் இரவு 10:30 மணிக்கு இந்தப் போட்டியை கண்டு ரசிக்கலாம்.
குரூப் டி: அமெரிக்கா முதலிடத்தையும், ஆஸ்திரேலியா இரண்டாவது இடத்தையும் பிடித்து அடுத்த சுற்றுக்கு முன்னேறின. பராகுவே மூன்றாவது இடத்தில் இருந்தாலும், அதன் தகுதி மற்ற குரூப் முடிவுகளைப் பொறுத்தே அமையும். துருக்கி போட்டியிலிருந்து வெளியேறியது.
பராகுவே 0–0 ஆஸ்திரேலியா
விறுவிறுப்பற்ற ஆட்டத்தில் பராகுவே மற்றும் ஆஸ்திரேலியா கோல் ஏதுமின்றி சமநிலையில் முடித்தன. இந்த டிரா முடிவு ஆஸ்திரேலியாவுக்கு போதுமானதாக அமைந்ததால், குரூப் டி-இல் இரண்டாவது இடத்தைப் பிடித்து ரவுண்ட் ஆஃப் 32-க்கு முன்னேறியது.
பராகுவே நான்கு புள்ளிகளுடன் (கோல் வித்தியாசம் - 8) மூன்றாவது இடத்தில் உள்ளது. சிறந்த மூன்றாவது இட அணிகளில் இடம்பிடிக்க இன்னும் மற்ற குரூப் முடிவுகளை எதிர்பார்க்க வேண்டிய நிலையில் இருந்தாலும், அதற்கான வாய்ப்பு நல்ல நிலையில் உள்ளது.
வெற்றியுடன் வெளியேறிய துருக்கி:
ஏற்கெனவே தங்களது குரூப் நிலைகள் உறுதியான நிலையில் களமிறங்கிய அமெரிக்கா மற்றும் துருக்கி அணிகள் விறுவிறுப்பான ஆட்டத்தை வெளிப்படுத்தின. இறுதியில் 3-2 என்ற கோல் கணக்கில் வெற்றி பெற்ற துருக்கி, உலகக் கோப்பை தொடரை வெற்றியுடன் நிறைவு செய்தது.
போட்டி தொடங்கிய மூன்றாவது நிமிடத்திலேயே செபாஸ்டியன் பெர்ஹால்டரின் கார்னரை அஸ்டன் டிரஸ்டி கோலாக மாற்றி அமெரிக்காவுக்கு முன்னிலை பெற்றுக் கொடுத்தார்.
அதன்பின் பாரிஸ் இல்மாஸுடன் இணைந்து அழகிய அணிசார் தாக்குதலை நிறைவு செய்த ஆர்டா குலர் அபார கோல் அடித்து துருக்கிக்குச் சமநிலை பெற்றுத் தந்தார். தொடர்ந்து 30-வது நிமிடத்தில் மீண்டும் சிறப்பான அணிசார் நகர்வை கோலாக மாற்றிய இல்மாஸ், துருக்கியை 2-1 என முன்னிலைப்படுத்தினார்.
இரண்டாம் பாதி தொடங்கிய நான்காவது நிமிடத்திலேயே பெர்ஹால்டர் கோல் அடித்து அமெரிக்காவை 2-2 என சமநிலைக்கு கொண்டு வந்தார். அதன் பிறகு இரு அணிகளும் பல வாய்ப்புகளை உருவாக்கின. கூடுதல் நேரத்தின் கடைசி நொடியில் ஆறு-யார்டு பகுதிக்குள் தளர்வாக வந்த பந்தை கான் அய்ஹான் கோலாக மாற்ற, துருக்கி 3-2 என்ற கணக்கில் வெற்றியைப் பதிவு செய்தது.
ஸ்வீடன் - ஜப்பான் 1-1 டிரா:
இரு அணிகளுக்கும் டிரா போதுமானதாக இருந்ததால், முதல் பாதி எச்சரிக்கையான ஆட்டமாக அமைந்தது. ஆனால் இரண்டாம் பாதியில் போட்டி சூடுபிடித்தது.
ரிட்சு டோவானின் துல்லியமான பாஸை பெற்ற டைசென் மயேடா, கோல்கீப்பருடன் நேருக்கு நேர் சந்தித்த வாய்ப்பை சிறப்பாக பயன்படுத்தி ஜப்பானுக்கு முன்னிலை பெற்றுத் தந்தார்.
ஜப்பான் வெற்றியை நோக்கி நகர்ந்த நிலையில், பெனால்டி பகுதியின் விளிம்பிலிருந்து ஆண்டனி எலாங்கா அடித்த அற்புதமான ஷாட்டால் ஸ்வீடன் சமநிலையை எட்டியது.
அதன்பிறகும் ஆட்டம் அதிவேகமாக தொடர்ந்தாலும், மேலும் கோல்கள் எதுவும் பதிவாகவில்லை. இதன் மூலம் இரு அணிகளும் நாக் அவுட் சுற்றுக்கு முன்னேறின.
ரவுண்ட் ஆஃப் 32-ல் ஜப்பான் பிரேசிலை எதிர்கொள்கிறது. நெதர்லாந்து மொரோக்கோவை சந்திக்கிறது. ஸ்வீடன் தனது எதிரணி யார் என்பது மற்ற குரூப் முடிவுகளுக்குப் பிறகே உறுதியாகும்.
துனிசியா 1–3 நெதர்லாந்து
ஏற்கனவே வெளியேறிய துனிசியாவுக்கு எதிராக நெதர்லாந்து 3-1 என்ற கோல் கணக்கில் எளிதாக வெற்றி பெற்று குரூப் F-இல் முதலிடத்தை உறுதி செய்தது.
போட்டி தொடங்கிய சில நிமிடங்களிலேயே நெதர்லாந்தின் அழுத்தமான தாக்குதலால் எல்யெஸ் ஸ்கிரியின் சுயகோல் பதிவானது. அதனைத் தொடர்ந்து நான்கு நிமிடங்களுக்குப் பிறகு பிரையன் ப்ரோப்பி அருகிலிருந்து கோல் அடித்து முன்னிலையை 2-0 ஆக உயர்த்தினார்.
முதல் பாதியில் பந்தைக் கட்டுப்பாட்டில் வைத்திருந்த நெதர்லாந்து ஆட்டத்தின் வேகத்தை திறமையாக கட்டுப்படுத்தியது.
இரண்டாம் பாதியில் புத்துணர்ச்சியுடன் விளையாடிய துனிசியாவுக்காக, ஹன்னிபால் மெஜ்ப்ரியின் துல்லியமான கிராஸை ஹஸெம் மஸ்தூரி தலையால் முடித்து கோலாக மாற்றி கணக்கை 2-1 ஆகக் குறைத்தார்.
ஆனால் அதற்கு எட்டு நிமிடங்களுக்குப் பிறகு திஜ்ஜானி ரெய்ன்டர்ஸின் கிராஸை யான் பால் வான் ஹெக்கே தலையால் வலையில் அனுப்பி நெதர்லாந்தின் 3-1 வெற்றியை உறுதி செய்தார்.
