இஷ்ரூப் நரங்
கிளாஸ்கோ: கிளாஸ்கோவில் நடைபெறும் காமன்வெல்த் விளையாட்டுப் போட்டியின் மகளிர் 78 கிலோ பிரிவு வெண்கலப் பதக்கத்துக்கான போட்டியில் இந்திய வீராங்கனை இஷ்ரூப் நரங் தோல்வி கண்டார்.
23-வது காமன்வெல்த் விளையாட்டுப் போட்டி ஸ்காட்லாந்தில் உள்ள கிளாஸ்கோ நகரில் நடைபெற்று வருகிறது. 8-வது நாள் போட்டி முடிவில் இந்தியா 5 தங்கம், 12 வெள்ளி, 6 வெண்கலம் என மொத்தம் 23 பதக்கங்களை பெற்று இருந்தது. மீராபாய் சானு (பளு தூக்குதல்), ஷர்மிளா தன்கர் (பாரா குண்டு எறிதல்), திலீப் கவிட் (பாரா 100 மீட்டர் ஓட்டம்), அஷ்மிதா டே, ஹர்ஷ் சிங் (ஜூடோ) ஆகியோர் தங்கம் வென்றிருந்தனர்.
தமிழகத்தை சேர்ந்த ராஜா முத்துப்பாண்டி, ரிஷி காந்த் சிங், ஞானேஸ்வரி யாதவ், அஜயா பாபு, ஹர்ஜிந்தர் கவுர், லவ்பிரீத்சிங் (பளு தூக்குதல்), சர்வேஷ் குஷாரே (உயரம் தாண்டுதல்), குல்வீர்சிங் (10 ஆயிரம் மீட்டர்), முரளி சங்கர் (நீளம் தாண்டுதல்), முகமது பசில் (பாரா 100 மீட்டர் ஓட்டம்), யாமினி மவுரியா (ஜூடோ), நீரஜ் சோப்ரா (ஈட்டி எறிதல்) ஆகியோர் வெள்ளிப் பதக்கமும், ஜண்டு குமார் (பாரா வலுதூக்குதல்), பிந்தியா ராணி தேவி (பளு தூக்குதல்), ஷில்பா ஷைலா (பாரா குண்டு எறிதல்), சீமா (வட்டு எறிதல்), தேஜஸ்வின் சங்கர் (டெகத்லான்), யஷ்வீர் சிங் (ஈட்டி எறிதல்) ஆகியோர் வெண்கல பதக்கமும் பெற்று இருந்தனர்.
இந்நிலையில் நேற்றைய தினம் நடைபெற்ற 9-வது நாள் போட்டியின்போது இந்தியாவுக்கு 8 தங்கம் உள்பட 16 பதக்கங்கள் கிடைத்தன. குத்துச்சண்டையில் 7 தங்கமும், 3 வெள்ளியும் கிடைத்தது. பிரீத்தி பவார், ஜாஸ்மின் லம்போரியா, சாக்சி சவுத்ரி, பிரியா கங்காஸ், அருந்ததி சவுத்ரி, சச்சின் சிவாச், அங்குஷ் பங்கல் ஆகியோர் தங்கமும், லோவ்லினா போர்கோஹைன், ஜதுமணி சிங், நரேந்தர் பெர்வால் ஆகியோர் வெள்ளிப் பதக்கமும் வென்றனர்.
பாரா ஆடவருக்கான குண்டு எறிதலில் (எப்-57) சோமன் ராணா தங்கமும், இதே பிரிவில் ஷுபம் ஜுயால் வெள்ளியும் பெற்றனர். ஆடவருக்கான டிரிபிள் ஜம்ப் பந்தயத்தில் தமிழக வீரர்கள் பிரவீன் சித்ரவேல் வெள்ளிப் பதக்கமும், செல்வ பிரபு வெண்கலமும் கைப்பற்றினர். மகளிர் 63 கிலோ ஜூடோவில் உன்னதி சர்மாவும், 5 ஆயிரம் மீட்டர் ஓட்டத்தில் குல்வீர் சிங்கும் வெண்கலம் பெற்றனர். இதனால் இந்தியா 13 தங்கம், 17 வெள்ளி, 9 வெண்கலம் என மொத்தம் 39 பதக்கங்களைப் பெற்று பதக்கப் பட்டியலில் 4-வது இடத்துக்கு முன்னேறியது.
இஷ்ரூப் நரங் இந்நிலையில் நேற்று கடைசி நாள் போட்டிகள் நடைபெற்றன. மகளிர் 78 கிலோ பிரிவு வெண்கலத்துக்கான போட்டியில் இந்திய வீராங்கனை இஷ்ரூப் நரங் தோல்வி கண்டு வெளியேறினார். கனடா வீராங்கனை கோரலி காட்பவுட் அவரை வீழ்த்தி வெண்கலத்தைக் கைப்பற்றினார். யஷ் கங்காஸ் ஆடவர் +100 கிலோ பிரிவு ஜூடோ கால் இறுதிக்கு முந்தைய சுற்றில் இந்திய ஜூடோ வீரர் யஷ் கங்காஸ், வேல்ஸ் வீரர் ஜோஷிவா ஒயிட்ஹவுஸிடம் தோல்வி கண்டு வெளியேறினார்.
அதேபோல் ஆடவர் +100 கிலோ பிரிவு கால் இறுதிக்கு முந்தைய சுற்றில் இந்திய வீரர் அவ்தார் சிங், சைப்ரஸின் அரிஸ்டோஸ் மைக்கேலிடம் தோல்வி கண்டார். சைக்கிளிங் ஆடவர் சைக்கிளிங் ஹீட் பிரிவில் இந்திய வீரர் ஹர்ஷ்வீர் செகான் 11-வது இடத்தைப் பிடித்து இறுதிச் சுற்றுக்கு முன்னேறத் தவறினார்.
இதேபோல் ஆடவர் 1,000 மீட்டர் சைக்கிளிங் பிரிவில் இந்திய வீரர் ரொனால்டோ சிங் லாய்தோன்ஜாம் 10-வது இடத்தைப் பிடித்து இறுதிச் சுற்று வாய்ப்பை இழந்தார்.இதேபோல் ஆடவர் 40 கிலோமீட்டர் பந்தயத்தில் இந்திய வீரர் தினேஷ் குமார் முதல் சுற்றிலேயே தோல்வி கண்டார்.
தேசியக் கொடியை ஏந்தி செல்கிறார் ஜாஸ்மின்
காமன்வெல்த் விளையாட்டுப் போட்டி நிறைவு விழாவின்போது இந்திய குத்துச்சண்டை வீராங்கனை ஜாஸ்மின் லம்போரியா தேசியக் கொடியை ஏந்தி இந்திய வீரர், வீராங்கனைகளை வழிநடத்திச் செல்வார் என அறிவிக்கப்பட்டுள்ளது. மகளிர் 57 கிலோ குத்துச்சண்டையில் ஜாஸ்மின் தங்கம் வென்றிருந்தார் என்பது குறிப்பிடத்தக்கது.
அகமதாபாத்தில் அடுத்த போட்டி: அடுத்த காமன்வெல்த் விளையாட்டுப் போட்டி குஜராத் மாநிலம் அகமதாபாத்தில் வரும் 2030-ல் நடைபெறவுள்ளது. கிளாஸ்கோ காமன்வெல்த் விளையாட்டுப் போட்டி நிறைவடைவதாக அதிகாரப்பூர்வமாக அறிவிக்கப்பட்டவுடன் போட்டிக்கான கொடி, இந்திய அதிகாரிகளிடம் ஒப்படைக்கப்படும்.
