கேப்டவுன் டெஸ்ட் போட்டியில் ஆஸ்திரேலியா வெற்றி பெற 5-ம் நாளான இன்று 288 ரன்களை எடுக்க வேண்டும்.
அப்படி எடுத்தால் தொடரை 2-1 என்று ஆஸ்திரேலியா வெல்லும். அதே வேளையில் தெம்பா பவுமா தன் கேப்டன்சியில் முதல் தொடரை இழப்பார். இல்லையெனில், அவரது தொடர் தோல்வியில்லாச் சாதனை தொடரும்.
4-ம் நாளான நேற்று தென் ஆப்பிரிக்கா 181 ரன்களுக்கு 5 விக்கெட்டுகளை இழந்து தடுமாறிக் கொண்டிருந்த வேளையில் ஆஸ்திரேலியாவுக்கு வெற்றி வாய்ப்புப் பிரகாசமாக இருந்தது.
ஆனால் போராட்டமே எங்கள் வரலாறு, எங்கள் கிரிக்கெட் வரலாறும் இதுதான் என்பதற்கு இணங்க ரியான் ரிக்கிள்டன் மற்றும் வியான் முல்டர் ஆகியோர் அபார சதங்களை எடுத்து பெரிய கூட்டணி அமைக்க, ஆஸ்திரேலியாவின் வெற்றிக் கனவுக்கு பெரும் சவால் ஏற்படுத்தப்பட்டுள்ளது.
2-வது இன்னிங்சில் 181/5-லிருந்து 387 ரன்கள் குவித்தது தென் ஆப்பிரிக்கா. இதன் மூலம் ஆஸ்திரேலியாவுக்கு 288 ரன்கள் வெற்றி இலக்கு நிர்ணயிக்கப்பட்டுள்ளது.
பிட்ச் கொஞ்சம் ஸ்பின் பந்து வீச்சுக்குச் சாதகமாகி விட்டது போல் தெரிகிறது. பவுன்ஸும் சீராக இருக்காது என்பதால் ஆஸ்திரேலிய வீரர் ஜாஷ் இன்லிஷ் சொன்னது போல், “கடைசி நாளில் 200 ரன்களை சேஸ் செய்வது என்பதே மிகவும் கடினமான காரியம்.”
4-ம் நாளான நேற்று 140/4 என்று தொடங்கிய தென் ஆப்பிரிக்கா முதல் இரண்டு செஷன்களில் ஒரு விக்கெட்டை மட்டுமே இழந்து வலுவாகச் சென்று கொண்டிருந்தது.
ஆனால், தேநீர் இடைவேளைக்குப் பிறகு ஆஸ்திரேலிய பந்துவீச்சாளர்களின் தாக்குதலால் அடுத்தடுத்து விக்கெட்டுகளை இழந்தது. இருப்பினும், அந்த அணி ஆட்டத்தின் கட்டுப்பாட்டை தக்கவைத்துக் கொண்டு, சனிக்கிழமை பரபரப்பான கடைசி நாளுக்கான சூழலை உருவாக்கியுள்ளது.
தென்னாப்பிரிக்க அணியில் வியான் முல்டர் 115 ரன்கள் குவித்து தனது 4-வது டெஸ்ட் சதத்தை எடுத்தார். ரியான் ரிக்கிள்டன் 101 ரன்கள் எடுத்தார்.
இருவரின் சிறப்பான ஆட்டத்தால், கேப்டவுனில் உள்ள நியூலேண்ட்ஸ் மைதானத்தில் 137 ஆண்டு கால டெஸ்ட் கிரிக்கெட் வரலாற்றில் வெற்றிகரமாக துரத்தப்பட்ட 2-வது அதிகபட்ச இலக்கை ஆஸ்திரேலியா எட்ட வேண்டிய நிலை ஏற்பட்டுள்ளது.
மேலும், 3 ரன்களுக்கும் அதிகமான ரன் ரேட்டில் இந்த இலக்கை துரத்த வேண்டியிருப்பதால், ஆஸ்திரேலியாவுக்கு மிகப் பெரிய சவால் காத்திருக்கிறது. அதேவேளையில், தென்னாப்பிரிக்க பந்துவீச்சாளர்கள் ஒன்றரை நாட்களுக்கும் மேலாக ஓய்வில் இருப்பதால், அவர்கள் முழு புத்துணர்ச்சியுடன் களமிறங்க உள்ளனர்.
4-வது நாள் ஆட்டத்தை 140/4 என்ற நிலையில் தொடங்கிய தென்னாப்பிரிக்கா, இரண்டு செஷன்களில் மேத்யூ பிரெட்ஸ்கே (43) விக்கெட்டை மட்டுமே இழந்தது.
பாட் கம்மின்ஸ் வீசிய பந்தை புல் ஷாட் ஆட முயன்ற பிரெட்ஸ்கே, எல்லைக்கோட்டில் மிட்செல் ஸ்டார்க்கிடம் கேட்ச் கொடுத்து ஆட்டமிழந்தார். இந்தத் தொடரில் தென்னாப்பிரிக்க வீரர்கள் எல்லைக்கோட்டில் கேட்ச் கொடுத்து ஆட்டமிழப்பது தொடர்கிறது.
ரிக்கிள்டன் - முல்டர் ஜோடி 6-வது விக்கெட்டுக்கு 154 ரன்கள் சேர்த்தது. இருவரும் அதிக ரிஸ்க் எடுக்காமல் நிதானமாக விளையாடி ரன்களைச் சேர்த்தனர். ஆஸ்திரேலிய சுழற்பந்து வீச்சாளர் நாதன் லயன் பந்துகளில் கணிசமான திருப்பமும், வேகப்பந்து வீச்சாளர்களின் பந்துகளில் சீரற்ற பவுன்ஸும் காணப்பட்டது.
ஆட்டத்தின் வேகத்தை அதிகரிக்க முயன்ற முல்டர் கடைசியாக ஆட்டமிழந்தார். கம்மின்ஸ் பந்துவீச்சில் எல்லைக்கோட்டில் மிட்செல் ஸ்டார்க் பிடித்த கேட்ச்சில் அவர் வெளியேறினார். இதையடுத்து தென்னாப்பிரிக்காவின் இன்னிங்ஸ் முடிவுக்கு வந்தது. கம்மின்ஸ் 2/71, நாதன் லயன் 2/101 என விக்கெட்டுகளை கைப்பற்றினர்.
“இந்தத் தொடர் மிகவும் சிறப்பானதாக அமைந்துள்ளது. மூன்று போட்டிகளிலும் இரு அணிகளும் மாறி மாறி ஆதிக்கம் செலுத்தியுள்ளன. ஒரு அணி முன்னிலை பெறும்போது மற்ற அணி போராடி மீண்டும் ஆட்டத்துக்குள் வந்துள்ளது.
சில தவறுகளும், சிறப்பான கிரிக்கெட்டும் இந்தத் தொடரில் இடம்பெற்றுள்ளன. நாளை தென்னாப்பிரிக்காவுக்கு சிறப்பான நாளாக அமையும் என்று நம்புகிறேன்” என்று ரிக்கிள்டன் கூறினார்.
டர்பனில் நடைபெற்ற முதல் டெஸ்டில் ஆஸ்திரேலியா 214 ரன்கள் வித்தியாசத்தில் வெற்றி பெற்றது. அதற்கு பதிலடி கொடுத்த தென்னாப்பிரிக்கா, கெபெர்ஹாவில் நடந்த 2-வது டெஸ்டில் இன்னிங்ஸ் மற்றும் 31 ரன்கள் வித்தியாசத்தில் அபார வெற்றி பெற்றது. இதனால் 3 போட்டிகள் கொண்ட தொடர் தற்போது 1-1 என சமநிலையில் உள்ளது.
இந்தப் போட்டியில் வெற்றி பெறும் அணி, டெஸ்ட் உலகத் தரவரிசையில் நம்பர்-1 இடத்தைப் பிடிக்கும். தற்போது அந்த முதலிடத்தை ஆஸ்திரேலியா வகித்து வருகிறது.
