டார்வின்: ஆஸ்திரேலியாவுக்கு எதிரான முதலாவது கிரிக்கெட் டெஸ்ட் போட்டியில் வங்கதேச அணி 9 விக்கெட் வித்தியாசத்தில் வெற்றி பெற்றது. இதன்மூலம் ஆஸ்திரேலியாவை அதன் சொந்த மண்ணில் வீழ்த்தி வரலாற்று வெற்றியை வங்கதேச அணி பதிவு செய்துள்ளது.
2 போட்டிகள் கொண்ட டெஸ்ட் தொடரில் விளையாடுவதற்காக வங்கதேச அணி ஆஸ்திரேலியாவில் சுற்றுப்பயணம் செய்து வருகிறது. இவ்விரு அணிகளுக்கு இடையிலான முதலாவது டெஸ்ட் போட்டி கடந்த 13-ம் தேதி டார்வினிலுள்ள மராரா மைதானத்தில் தொடங்கியது.
ஆஸ்திரேலியா முதல் இன்னிங்ஸில் 198 ரன்களுக்கு ஆட்டமிழந்தது. ஸ்டீவன் ஸ்மித் 71 ரன்கள் எடுத்தார். வங்கதேச வீரர் ஹசன் மஹ்மூத் அபாரமாக பந்துவீசி 6 விக்கெட்களைச் சாய்த்தார்.
இதையடுத்து முதல் இன்னிங்ஸை விளையாடிய வங்கதேச அணி 138 ஓவர்களில் 426 ரன்கள் குவித்து ஆட்டமிழந்தது. தன்ஸித் ஹசன் தமீம் 101 ரன்களும், கேப்டன் நஜ்முல் ஹொசைன் ஷான்டோ 84 ரன்களும், மெஹிதி ஹசன் மிராஸ் 65 ரன்களும் சேர்த்தனர். இதைத் தொடர்ந்து முதல் இன்னிங்ஸில் வங்கதேசம் 228 ரன்கள் முன்னிலை பெற்றது.
இதன் பின்னர் 2-வது இன்னிங்ஸை விளையாடிய ஆஸ்திரேலிய அணி 3-ம் நாள் ஆட்டத்தின் முடிவில் 53 ஓவர்களில் 4 விக்கெட்கள் இழப்புக்கு
161 ரன்கள் எடுத்திருந்தது. இந்நிலையில் நேற்றைய 4-ம் நாள் ஆட்டத்தை கேமரூன் கிரீன் 43 ரன்களுடனும், அலெக்ஸ் கேரி 19 ரன்களுடனும் தொடங்கினர்.
அலெக்ஸ் கேரி 30 ரன்கள் சேர்த்த நிலையில் ஆட்டமிழந்தார். பியூ வெப்ஸ்டர் 5, பாட் கம்மின்ஸ் 8, மிட்செல் ஸ்டார்க் 18, நேதன் லயன் 15 ரன்கள் சேர்த்தனர்.
ஒருமுனையில் விக்கெட்கள் விழுந்தாலும் கேமரூன் கிரீன் நிலைத்து நின்று விளையாடி சதமடித்தார். அவர் 201 பந்துகளில் 104 ரன்கள் (4 பவுண்டரி, ஒரு சிக்ஸர்) எடுத்து ஆட்டமிழந்தார். மெஹிதி ஹசன் மிராஸ், ஹசன் மஹ்மூத் ஆகியோரின் அபார பந்துவீச்சு காரணமாக ஆஸ்திரேலிய அணி, 2-ம் இன்னிங்ஸில் 284 ரன்களுக்கு ஆட்டமிழந்தது.
2-வது இன்னிங்ஸின்போது மெஹிதி ஹசன் 5 விக்கெட்களையும், ஹசன் மஹ்மூத் 3 விக்கெட்களையும், தஸ்கின் அகமது, தைஜுல் இஸ்லாம் ஆகியோர் தலா ஒரு விக்கெட்டையும் கைப்பற்றினர்.
இதைத் தொடர்ந்து 57 ரன்கள் எடுத்தால் வெற்றி என்ற இலக்குடன் வங்கதேசம் தனது 2-வது இன்னிங்ஸை தொடங்கியது. தொடக்க ஆட்டக்காரர் தன்ஸித் ஹசன் தமீம் ரன் கணக்கைத் தொடங்காமலேயே ஜோஷ் ஹேசில்வுட் பந்தில் ஆட்டமிழந்தார்.
இதையடுத்து 2-வது விக்கெட்டுக்கு ஜோடி சேர்ந்த ஷத்மன் இஸ்லாமும், மோமினுல் ஹக்கும் சிறப்பாக விளையாடி ரன்களைச் சேர்த்தனர். 14.2 ஓவர்களில் ஒரு விக்கெட் இழப்புக்கு 57 ரன்கள் எடுத்து வரலாற்று வெற்றியை வங்கதேச அணி பெற்றது.
ஷத்மன் இஸ்லாம் 25, மோமினுல் ஹக் 30 ரன்கள் சேர்த்து ஆட்டமிழக்காமல் இருந்தனர். இதைத் தொடர்ந்து 9 விக்கெட்கள் வித்தியாசத்தில் வங்கதேச அணி வெற்றி பெற்று தொடரில் 1-0 என்ற கணக்கில் முன்னிலை வகிக்கிறது.
2-வது டெஸ்ட்
இவ்விரு அணிகளுக்கு இடையிலான 2-வது டெஸ்ட் போட்டி வரும் 22-ம் தேதி மெக்கே நகரிலுள்ள கிரேட் பேரியர் ரீஃப் அரீனா மைதானத்தில் தொடங்கவுள்ளது.
ஆட்ட நாயகன் மஹ்மூத் தேர்வு
இந்த ஆட்டத்தில் முதல் இன்னிங்ஸில் 6 மற்றும் இரண்டாவது இன்னிங்ஸில் 3 என மொத்தம் 9 விக்கெட்களை கைப்பற்றிய வங்கதேச பந்து வீச்சாளர் ஹசன் மஹ்மூத் ஆட்ட நாயகன் விருதை வென்றார்.
ஆஸ்திரேலிய மண்ணில் முதல் வெற்றி
ஆஸ்திரேலிய அணிக்கு எதிரான டெஸ்ட் கிரிக்கெட் போட்டியில் வங்கதேச அணி, ஆஸ்திரேலிய மண்ணில் முதல் வெற்றியை இந்த ஆட்டம் மூலம் பதிவு செய்து வரலாறு படைத்துள்ளது.
கடந்த 31 ஆண்டுகளில் இந்திய கிரிக்கெட் அணி நீங்கலாக ஆசிய அணி ஒன்றிடம் ஆஸ்திரேலிய அணி அதன் சொந்த மண்ணில் டெஸ்ட் போட்டியில் தோல்வி அடைந்துள்ளது இதுவே முதல் முறையாகும்.
இந்தப் போட்டியில் 9 விக்கெட் வித்தியாசத்தில் வெற்றி பெற்ற வங்கதேச அணி, டெஸ்ட் போட்டிகளில் பெற்றுள்ள 2-வது மிகப்பெரிய வெற்றியாகும் இது. இதற்கு முன்பு ராவல்பிண்டியில் நடைபெற்ற டெஸ்ட் போட்டியில் பாகிஸ்தான் அணியை 10 விக்கெட் வித்தியாசத்தில் வங்கதேசம் வீழ்த்தியிருந்ததே மிகப்பெரிய வெற்றியாக உள்ளது.
மேலும், சேனா நாடுகளுக்கு (தென் ஆப்பிரிக்கா, இங்கிலாந்து, நியூஸிலாந்து, ஆஸ்திரேலியா) எதிரான டெஸ்ட் போட்டிகளில் 2-வது வெற்றியை வங்கதேச அணி பெற்றுள்ளது.
இதற்கு முன்பு 2022-ல் மவுண்ட் மவுங்கனியில் நடைபெற்ற போட்டியில் நியூஸிலாந்தை வங்கதேச அணி வென்றிருந்தது. அதுமட்டுமல்லாமல் ஆஸ்திரேலியாவுக்கு எதிராக 2-வது டெஸ்ட் போட்டியில் வங்கதேசம் வெற்றி கண்டுள்ளது. இதற்கு முன்பு ஆஸ்திரேலியாவுக்கு எதிராக 2017-ல் மிர்பூரில் நடைபெற்ற டெஸ்ட் போட்டியில் வங்கதேசம் வெற்றி கண்டிருந்தது.
