மெல்பர்ன்: ஆண்டின் முதல் கிராண்ட் ஸ்லாம் போட்டியான ஆஸ்திரேலிய ஓபன் டென்னிஸ் ஆஸ்திரேலியாவின் மெல்பர்ன் நகரில் நடைபெற்று வருகிறது. இதன் 2-வது நாளான நேற்று ஆடவர் ஒற்றையர் பிரிவு முதல் சுற்றில் 6-ம் நிலை வீரரான ஆஸ்திரேலியாவின் அலெக்ஸ் டி மினார் 6-2, 6-2, 6-3 என்ற நேர் செட் கணக்கில் அமெரிக்காவின் மெக்கன்சி மெக்டொனால்டை வீழ்த்தி 2-வது சுற்றுக்கு முன்னேறினார்.
7-ம் நிலை வீரரான கனடாவின் பெலிக்ஸ் ஆகர்-அலியாசிம், 46-ம் நிலை வீரரான போர்ச்சுகலின் நுனோ போர்ஹெஸுடன் மோதினார். இதில் நுனோ போர்ஹெஸ் 3-6, 6-4, 6-4 என்ற செட் கணக்கில் முன்னிலையில் இருந்த போது காயம் காரணமாக பெலிக்ஸ் ஆகர்-அலியாசிம் விலகினார். 4-ம் நிலை வீரரும் 10 முறை சாம்பியனுமான செர்பியாவின் நோவக் ஜோகோவிச், ஸ்பெயினின் பெட்ரோ மார்டினெஸுடன் மோதினார். இதில் ஜோகோவிச் 6-2, 6-2, 6-3 என்ற நேர் செட் கணக்கில் வெற்றி பெற்று 2-வது சுற்றில் நுழைந்தார்.
11-ம் நிலை வீரரான ரஷ்யாவின் டேனியல் மெத்வதேவ் 7-5, 6-2, 7-6 (7-2) என்ற செட் கணக்கில் நெதர்லாந்தின் ஜெஸ்பர்டி ஜாங்கையும், 13-ம் நிலை வீரரான ரஷ்யாவின் ஆந்த்ரே ரூப்லெவ் 6-4, 6-2, 6-3 என்ற செட் கணக்கில் இத்தாலியின் மேட்டியோ அர்னால்டியையும், 14-ம்
நிலை வீரரான ஸ்பெயினின் அலெஜான்ட்ரோ டேவிடோவிச் ஃபோகினா 6-2, 6-3, 6-3 என்ற செட் கணக்கில் ஆஸ்திரியாவின் ஃபிலிப் மிசோலிக்கையும், 19-ம் நிலை வீரரான அமெரிக்காவின் டாமி பால் 6-4, 6-3, 6-3 என்ற செட் கணக்கில் சகநாட்டைச் சேர்ந்த அலெக்சாண்டர் கோவாசெவிக்கையும் வீழ்த்தி 2-வது சுற்றில் நுழைந்தனர்.
சுவிட்சர்லாந்தின் ஸ்டான் வாவ்ரிங்கா 5-7, 6-3, 6-4, 7-6 (7-4) என்ற செட் கணக்கில் செர்பியாவின் லஸ்லா ஜெரியையும், 21-ம் நிலை வீரரான கனடாவின் டெனிஸ் ஷபோவலோவ் 6-3, 7-6 (7-3), 6-1 என்ற செட் கணக்கில் சீனாவின் யுஞ்சோகெட் புவையும், குரோஷியாவின் மரின்சிலிச் 6-0, 6-0, 7-6 (7-3) என்ற செட் கணக்கில் ஜெர்மனியின் டேனியல் அல்ட்மேயரையும் வீழ்த்தி 2-வது சுற்றில் நுழைந்தனர்.
மகளிர் ஒற்றையர் பிரிவு முதல் சுற்றில் 3-ம் நிலை வீராங்கனையான அமெரிக்காவின் கோகோ காஃப், உஸ்பெகிஸ்தானின் கமிலா ரகிமோவை எதிர்கொண்டார். இதில் கோகோ காஃப் 6-2, 6-3 என்ற நேர் செட் கணக்கில் வெற்றி பெற்று 2-வது சுற்றுக்கு முன்னேறினார். 4-ம் நிலை வீராங்கனையான அமெரிக்காவின் அமன்டா அனிசிமோவா 6-3, 6-2 என்ற செட் கணக்கில் சுவிட்சர்லாந்தின் சிமோனா வால்டெர்ட்டையும்,
6-ம் நிலை வீராங்கனையான அமெரிக்காவின் ஜெசிகா பெகுலா 6-2, 6-1 என்ற செட் கணக்கில் ரஷ்யாவின் அனஸ்டசியா ஜகரோவாவையும் வீழ்த்தினர்.
15-ம் நிலை வீராங்கனையான அமெரிக்காவின் எம்மா நவர்ரோ 6-3, 3-6, 3-6 என்ற செட் கணக்கில் போலந்தின் மெக்டா லின்னெட்டிடமும், 27-ம் நிலை வீராங்கனையும் முன்னாள் சாம்பியனுமான அமெரிக்காவின் சோபியா கெனின் 3-6, 2-6 என்ற செட் கணக்கில் சகநாட்டைச் சேர்ந்த பெய்டன் ஸ்டெர்ன்ஸிடமும் தோல்வி அடைந்தனர். 14-ம் நிலை வீராங்கனையான டென்மார்க்கின் கிளாரா டவுசன் 6-3, 6-3 என்ற நேர் செட் கணக்கில் ஹங்கேரியின் டல்மா கல்ஃபியையும், 19-ம் நிலை வீராங்கனையான செக்குடியரசின் கரோலினா முச்சோவா 6-3, 7-6 (8-6) என்ற செட் கணக்கில் ருமேனியாவின் ஜாக்லின் கிறிஸ்டியனையும் வீழ்த்தி 2-வது சுற்றுக்கு முன்னேறினர்.
2-ம் நிலை வீராங்கனையான போலந்தின் இகா ஸ்வியாடெக் 7-6 (7-5), 6-3 என்ற செட் கணக்கில் 130-ம் நிலை வீராங்கனையான சீனாவின் யு யுவானையும், 8-ம் நிலை வீராங்கனையான ரஷ்யாவின் மிர்ரா ஆண்ட்ரீவா 4-6, 6-3, 6-0 என்ற செட் கணக்கில் குரோஷியாவின் டோனா வெகிக்கையும், 17-ம் நிலை வீராங்கனையான அமெரிக்காவின் விக்டோரியா எம்போகோ 6-4, 6-1 என்ற செட் கணக்கில் ஆஸ்திரேலியாவின் எமர்சன் ஜோன்ஸையும், 13-ம் நிலை வீராங்கனையான செக்குடியரசின் லின்டா நோஸ்கோவா 6-3, 6-0 என்ற செட் கணக்கில் லத்வியாவின் தர்ஜா செமனிஸ்டாஜாவையும் வீழ்த்தி 2-வது சுற்றுக்கு முன்னேறினர்.
