மெல்பர்ன்: ஆண்டின் முதல் கிராண்ட் ஸ்லாம் போட்டியான ஆஸ்திரேலிய ஓபன் டென்னிஸ் வரும் 18-ம் தேதி ஆஸ்திரேலியாவின் மெல்பர்ன் நகரில் தொடங்குகிறது.
இந்நிலையில் இந்த போட்டிக்கான வீரர், வீராங்கனைகளின் தரவரிசை நேற்று அறிவிக்கப்பட்டது. ஆடவர் ஒற்றையர் பிரிவில் ஸ்பெயினின் கார்லோஸ் அல்கராஸுக்கு முதலிடம் வழங்கப்பட்டுள்ளது. 2 முறை சாம்பியனான இத்தாலியின் ஜன்னிக் சின்னருக்கு 2-வது இடமும் ஜெர்மனியின் அலெக்ஸாண்டர் ஜிவேரேவுக்கு 3-வது இடமும், 10 முறை சாம்பியனான செர்பியாவின் நோவக் ஜோகோவிச்சுக்கு 4-வது இடமும் கொடுக்கப்பட்டுள்ளது.
இத்தாலியின் லோரென்சோ முசெட்டி, ஆஸ்திரேலியாவின் அலெக்ஸ் டி மனார், கனடாவின் பெலிக்ஸ் ஆகர்-அலியாசிம், அமெரிக்காவின் பென் ஷெல்டன், டெய்லர் ஃபிரிட்ஸ், கஜகஸ்தானின் அலெக்சாண்டர் பப்ளிக் ஆகியோர் முறையே 5 முதல் 10-வது இடங்களில் உள்ளனர்.
மகளிர் ஒற்றையர் பிரிவில் பெலாரஸின் அரினா சபலென்கா, போலந்தின் இகா ஸ்வியாடெக், அமெரிக்காவின் கோ கோ காஃப் ஆகியோருக்கு முறையே முதல் 3 இடங்கள் கொடுக்கப்பட்டுள்ளன. நடப்பு சாம்பியனான அமெரிக்காவின் மேடிசன் கீஸுக்கு 9-வது இடம் வழங்கப்பட்டுள்ளது.
