மிட்செல் ஸ்டார்க்
துபாய்: ஐசிசி டெஸ்ட் கிரிக்கெட் பந்து வீச்சாளர்களுக்கான தரவரிசையில் ஆஸ்திரேலிய அணியின் வேகப்பந்து வீச்சாளரான மிட்செல் ஸ்டார்க் முதன்முறையாக முதலிடம் பிடித்துள்ளார்.
வங்கதேச அணிக்கு எதிராக சமீபத்தில் முடிவடைந்த 2 டெஸ்ட் போட்டிகள் கொண்ட தொடரில் மிட்செல் ஸ்டார்க் 12 விக்கெட்களை வீழ்த்தியிருந்தார். இதன் மூலம் இந்தியாவின் ஜஸ்பிரீத் பும்ரா, நியூஸிலாந்தின் மேட் ஹென்றி ஆகியோரை பின்னுக்குத்தள்ளி 2 இடங்கள் முன்னேறி முதலிடத்தை பிடித்துள்ளார் மிட்செல் ஸ்டார்க்.
36 வயதான இடதுகை வேகப்பந்து வீச்சாளரான மிட்செல் ஸ்டார்க் 872 புள்ளிகளுடன் முதலிடத்தில் உள்ளார். பும்ரா 862 புள்ளிகளுடன் முதலிடத்தில் இருந்து 2-வது இடத்துக்கு தள்ளப்பட்டுள்ளார். மேட் ஹென்றி 861 புள்ளிகளுடன் 2-வது இடத்தில் இருந்து 3-வது இடத்துக்கு இறங்கி உள்ளார்.
மிட்செல் ஸ்டார்க் ஐசிசி தரவரிசையில் முதலிடத்தை பிடிப்பது இதுவே முதன்முறையாகும். இதற்கு முன்னர் அதிகபட்சமாக கடந்த ஆண்டு 2-வது இடத்தை பிடித்திருந்தார்.
கடந்த ஜூலை மாதம் இங்கிலாந்து தொடரின் போது ஏற்பட்ட முழங்கால் காயம் காரணமாக இலங்கை தொடரிலிருந்து விலகிய பும்ரா, தற்போது இரண்டாவது இடத்திற்குச் சரிந்துள்ளார். பும்ரா இதுவரை மொத்தம் 697 நாட்கள் முதலிடத்தில் நீடித்துள்ளார். இது இந்திய பந்துவீச்சாளரின் மிக நீண்ட சாதனையாகும்.
இங்கிலாந்து அணியின் ஆலி ராபின்சன் 15 இடங்கள் முன்னேறி 11-வது இடத்தை பிடித்துள்ளார். பாகிஸ்தான் அணிக்கு எதிரான முதல் டெஸ்ட் போட்டியில் ஆலி ராபின்சன் 8 விக்கெட்களை கைப்பற்றியிருந்தார். இதே போட்டியில் 8 விக்கெட்கள் கைப்பற்றிய ஜோஷ் டங் 16 இடங்கள் முன்னேறி 17-வது இடத்தை அடைந்துள்ளார். இலங்கை அணிக்கு எதிரான முதல் டெஸ்ட் போட்டியில் 10 விக்கெட்கள் கைப்பற்றிய இந்தியாவின் மானவ் சுதார் 28 இடங்கள் முன்னேறி 48-வது இடம் பிடித்துள்ளார்.
இலங்கை அணியின் அசிதா பெர்னாண்டோ, பிரபாத் ஜெயசூரியா ஆகியோர் தலா 5 இடங்கள் முன்னேறி முறையே 15 மற்றும் 16-வது இடங்களில் உள்ளனர். ஆஸ்திரேலிய அணியின் சுழற்பந்து வீச்சாளரான நேதன் லயன் 2 இடங்கள் முன்னேறி 10-வது இடத்தையும், பாகிஸ்தானின் அலி உஸ்மான் 30 இடங்கள் முன்னேறி 67-வது இடத்தையும் பிடித்துள்ளனர்.
