டிராவிஸ் ஹெட்
சிட்னி: இங்கிலாந்துக்கு எதிரான 5-வது மற்றும் கடைசி கிரிக்கெட் டெஸ்ட் போட்டியில் ஆஸ்திரேலிய அணி முதல் இன்னிங்ஸில் 2 விக்கெட் இழப்புக்கு 166 ரன்கள் எடுத்துள்ளது. முன்னதாக இங்கிலாந்து அணி முதல் இன்னிங்ஸில் 384 ரன்களுக்கு ஆட்டமிழந்தது. ஜோ ரூட் அபாரமாக விளையாடி சதம் விளாசினார்.
ஆஸ்திரேலியா, இங்கிலாந்து அணிகளுக்கு இடையிலான ஆஷஸ் கிரிக்கெட் டெஸ்ட் தொடரில் ஆஸ்திரேலியா 3-1 என்ற கணக்கில் முன்னிலையில் உள்ளது. இந்நிலையில் கடைசி டெஸ்ட் போட்டி சிட்னி மைதானத்தில் கடந்த 4-ம் தேதி தொடங்கியது. பிங்க் பால் டெஸ்ட் போட்டியான இந்த ஆட்டத்தில் இங்கிலாந்து அணி முதலில் விளையாடியது.
முதல் நாள் ஆட்டத்தில் அந்த அணி 3 விக்கெட் இழப்புக்கு 211 ரன்கள் எடுத்திருந்தபோது வெளிச்சமின்மை காரணமாக நிறுத்தப்பட்டது. தொடர்ந்து மழை பெய்யவே முதல் நாள் ஆட்டம் அத்துடன் முடிவுக்கு வந்தது. இந்நிலையில் நேற்றைய 2-ம் நாள் ஆட்டத்தை ஜோ ரூட் 72 ரன்களுடனும், ஹாரி புரூக் 78 ரன்களுடனும் தொடங்கினர்.
மேலும் 6 ரன்கள் சேர்த்த நிலையில் ஹாரி புரூக், ஸ்காட் போலண்ட் பந்தில் ஆட்டமிழந்தார். அவர் 97 பந்துகளில் 84 ரன்கள் சேர்த்தார். இதையடுத்து ரூட்டுடன் ஜோடி சேர்ந்த, கேப்டன் பென் ஸ்டோக்ஸ், ரன் கணக்கைத் தொடங்காமலேயே மிட்செல் ஸ்டார்க் பந்தில் வீழ்ந்தார். இதைத் தொடர்ந்து ரூட்டுடன் விக்கெட் கீப்பர் ஜேமி ஸ்மித் இணைந்தார். அவர் நிதானமாக விளையாடி ரன்களை சேர்த்தார். இதனிடையே ஜோ ரூட் அபாரமாக விளையாடி டெஸ்ட் போட்டிகளில் தனது 41-வது சதத்தை பூர்த்தி செய்தார். அவர் 146 பந்துகளில் சதத்தை எட்டினார்.
ஜோ ரூட், ஜேமி ஸ்மித் ஜோடி அபாரமாக விளையாடி 6-வது விக்கெட்டுக்கு 94 ரன்களைச் சேர்ந்தது. ஜேமி ஸ்மித் 46 ரன்களை எடுத்திருந்தபோது, லபுஷேன் பந்தில் போலண்டிடம் கேட்ச் கொடுத்து ஆட்டமிழந்தார்.உணவு இடைவேளையின்போது இங்கிலாந்து அணி 6 விக்கெட் இழப்புக்கு 336 ரன்கள் எடுத்திருந்தது.
இதன் பின்னர் வந்த வீரர்கள் வில் ஜேக்ஸ் 27, பிரைடன் கார்ஸ் 1, ஜோஷ் 0 ரன்களில் ஆட்டமிழந்தனர். ஜோ ரூட் 160 ரன்கள்(242 பந்துகள், 15 பவுண்டரிகள்) சேர்த்து நேசர் பந்தில் அவுட்டானார். 97.3 ஓவர்களில் 384 ரன்களுக்கு இங்கிலாந்தின் முதல் இன்னிங்ஸ் முடிவுக்கு வந்தது.
இங்கிலாந்து அணி தரப்பில் மைக்கேல் நேசர் 4, மிட்செல் ஸ்டார்க், ஸ்காட் போலண்ட் ஆகியோர் தலா 2, கேமரூன் கிரீன், லபுஷேன் ஆகியோர் தலா ஒரு விக்கெட்டைக் கைப்பற்றினர். இதைத் தொடர்ந்து ஆஸ்திரேலிய அணி தனது முதல் இன்னிங்ஸை தொடங்கியது. தொடக்க ஆட்டக்காரர்களாக டிராவிஸ் ஹெட்டும், ஜேக் வெதரால்டும் களமிறங்கினர். அதிரடியாக ஆட முற்பட்ட வெதரால்டு 36 பந்துகளில் 21 ரன்கள் எடுத்த நிலையில் ஸ்டோக்ஸ் பந்தில் எல்பிடபிள்யூ முறையில் ஆட்டமிழந்தார்.
இதையடுத்து ஹெட்டுடன் ஜோடி சேர்ந்த, மார்னஸ் லபுஷேன் சிறப்பாக விளையாடி இன்னிங்ஸை கட்டமைத்தார். லபுஷேன் நிதானமாக விளையாடினாலும், டிராவிஸ் ஹெட் அதிரடியாக விளையாடி பவுண்டரிகளை பறக்கவிட்டு அரை சதம் கடந்தார்.அரை சதத்தை நெருங்கிய வேளையில் லபுஷேன், ஸ்டோக்ஸ் பந்தில் ஜேக்கப் பெத்தேலிடம் கேட்ச் கொடுத்து வீழ்ந்தார். அவர் 68 பந்துகளில் 48 ரன்களைச் சேர்த்திருந்தார்.
2-வது விக்கெட்டுக்கு இந்த ஜோடி 105 ரன்கள் சேர்த்திருந்தது. ஆட்டநேர இறுதியில் ஆஸ்திரேலிய அணி 34.1 ஓவர்களில் 2 விக்கெட் இழப்புக்கு 166 ரன்கள் எடுத்திருந்தது. ஹெட் 91 ரன்களுடனும், மைக்கேல் நேசர் ஒரு ரன்னுடனும் களத்தில் இருந்தனர்.இங்கிலாந்து கேப்டன் பென் ஸ்டோக்ஸ், 2 விக்கெட்களைக் கைப்பற்றினர்.218 ரன்கள் பின்தங்கிய நிலையில் இன்று 3-ம் நாள் ஆட்டத்தை ஆஸ்திரேலிய அணி விளையாடி வருகிறது. டெஸ்ட் கிரிக்கெட்டில் தனது 12-வது சதத்தை பதிவு செய்தார் டிராவிஸ் ஹெட். இந்த தொடரில் மொத்தமாக மூன்று சதங்களை அவர் பதிவு செய்தார்.
ரிக்கி பாண்டிங்கின் சாதனை சமன்: டெஸ்ட் போட்டிகளில் அதிக சதங்கள் குவித்தவர்கள் வரிசையில் இங்கிலாந்து வீரர் ஜோ ரூட், ஆஸ்திரேலிய முன்னாள் வீரர் ரிக்கி பாண்டிங்குடன் இணைந்துள்ளார்.
நேற்றைய போட்டியில் ஜோ ரூட் தனது 41-வது சதத்தை விளாசினார். மேலும் இந்த ஆஷஸ் தொடரில் அவர் அடித்த 2-வது சதமாகும் இது.
அதிக சதங்கள் குவித்தவர்கள் வரிசையில் இந்திய ஜாம்பவான் சச்சின் டெண்டுல்கர் (51 சதங்கள்) முதலிடத்திலும், தென் ஆப்பிரிக்க வீரர் ஜாக்கஸ் காலிஸ் (45 சதங்கள்) 2-வது இடத்திலும், ஆஸ்திரேலிய வீரர் ரிக்கி பாண்டிங் (41 சதங்கள்) 3-வது இடத்திலும் உள்ளனர். இந்த வரிசையில் தற்போது ரிக்கி பாண்டிங்குடன் ஜோ ரூட் 41 சதங்களுடன் இணைந்துள்ளார்.
அதிக 150 பிளஸ் ஸ்கோர்: மேலும், டெஸ்ட் போட்டிகளில் அதிக 150 பிளஸ் ஸ்கோர்களைக் குவித்தவர்கள் வரிசையிலும் ஜோ ரூட் இணைந்துள்ளார். ஜோ ரூட் 17 முறை 150-க்கும் அதிகமான ரன்களை டெஸ்ட் போட்டிகளில் சேர்த்துள்ளார்.
இந்த வரிசையில் 20 முறை 150-க்கும் அதிகமான ரன்களை எடுத்து சச்சின் டெண்டுல்கர் முதலிடமும், 19 முறை எடுத்து பிரையன் லாரா 2-ம் இடமும், 19 முறை 150 பிளஸ் ஸ்கோர் எடுத்து குமார் சங்கக்காரா 3-ம் இடமும், 18 முறை 150 பிளஸ் ஸ்கோர் குவித்து டான் பிராட்மேன் 4-வது இடத்திலும் உள்ளனர். ஜோ ரூட் இந்த வரிசையில் 5-வது இடத்தில் இருக்கிறார்.
அதேபோல் 2021-ம் ஆண்டுக்குப் பிறகு அதிக அளவில் டெஸ்ட் போட்டிகளில் ஜோ ரூட் சதமடித்துள்ளார். 2021-க்குப் பிறகு ஜோ ரூட் 24 சதங்களை டெஸ்ட் போட்டிகளில் விளாசியுள்ளார்.
