பெர்த்: இங்கிலாந்து அணிக்கு எதிரான ஆஷஸ் டெஸ்ட் கிரிக்கெட் தொடரின் முதல் போட்டியில் டிராவிஸ் ஹெட்டின் அதிரடியான சதத்தால் ஆஸ்திரேலிய அணி 8 விக்கெட்கள் வித்தியாசத்தில் வெற்றி பெற்றது.
பெர்த் நகரில் நடைபெற்று வந்த இந்த டெஸ்ட் போட்டியில் டாஸ் வென்று பேட் செய்த இங்கிலாந்து அணி மிட்செல் ஸ்டார்க்கின் வேகப்பந்து வீச்சை தாக்குப்பிடிக்க முடியாமல் 32.5 ஓவர்களில் 172 ரன்களுக்கு ஆட்டமிழந்தது. அதிகபட்சமாக ஹாரி புரூக் 52, ஆலி போப் 46, ஜேமி ஸ்மித் 33 ரன்கள் சேர்த்தனர். ஆஸ்திரேலிய அணி தரப்பில் மிட்செல் ஸ்டார்க் 7 விக்கெட்கள் வீழ்த்தியிருந்தார்.
இதையடுத்து விளையாடிய ஆஸ்திரேலிய அணி முதல் நாள் ஆட்டத்தின் முடிவில் 39 ஓவர்களில் 9 விக்கெட்கள் இழப்புக்கு 123 ரன்கள் எடுத்தது. நேதன் லயன் 3 ரன்களுடனும், பிரெண்டன் டாகெட் ரன் ஏதும் எடுக்காமலும் களத்தில் இருந்தனர். நேற்று 2-வது நாள் ஆட்டத்தை தொடர்ந்து விளையாடிய ஆஸ்திரேலிய அணி 45.2 ஓவர்களில் 132 ரன்களுக்கு ஆட்டமிழந்தது.
நேதன் லயன் 4 ரன்களில் பிரைடன் கார்ஸ் பந்தில் நடையை கட்டினார். பிரெண்டன் டாகெட் 7 ரன்களுடன் ஆட்டமிழக்காமல் இருந்தார். இங்கிலாந்து அணி தரப்பில் பென் ஸ்டோக்ஸ் 5, பிரைடன் கார்ஸ் 3, ஜோப்ரா ஆர்ச்சர் 2 விக்கெட்களை வீழ்த்தினர்.
40 ரன்கள் முன்னிலையுடன் 2-வது இன்னிங்ஸை விளையாடிய இங்கிலாந்து அணி மீண்டும் ஒரு முறை ஆஸ்திரேலிய வேகப்பந்து வீச்சை தாக்குப்பிடிக்க முடியாமல் 34.4 ஓவர்களில் 164 ரன்களுக்கு சுருண்டது. ஸாக் கிராலி 0, பென் டக்கெட் 28, ஆலி போப் 33, ஜோ ரூட் 8, ஹாரி புரூக் 0, கேப்டன் பென் ஸ்டோக்ஸ் 2, ஜேமி ஸ்மித் 15, கஸ் அட்கின்சன் 37, பிரைடன் கார்ஸ் 20, ஜோப்ரா ஆர்ச்சர் 5 ரன்களில் நடையை கட்டினர். மார்க் வுட் 4 ரன்களுடன் ஆட்டமிழக்காமல் இருந்தார். ஆஸ்திரேலிய அணி சார்பில் ஸ்காட் போலண்ட் 4 விக்கெட்களையும் மிட்செல் ஸ்டார்க், பிரெண்டன் டாகெட் ஆகியோர் தலா 3 விக்கெட்களையும் வீழ்த்தினர். இங்கிலாந்து அணி 104 ரன்களுக்கு எல்லாம் 7 விக்கெட்களை பறிகொடுத்திருந்தது. பின்வரிசை வீரர்களான கஸ் அட்கின்சன் 32 பந்துகளில், 2 சிக்ஸர்கள், 2 பவுண்டரிகளுடன் 37 ரன்களும், பிரைடன் கார்ஸ் 20 பந்துகளில், 2 சிக்ஸர்கள், ஒரு பவுண்டரியுடன் 20 ரன்களும் விளாசியதன் காரணமாக இங்கிலாந்து அணியால் 150 ரன்களை கடக்க முடிந்திருந்தது.
205 ரன்கள் இலக்குடன் பேட் செய்த ஆஸ்திரேலிய அணி டிராவிஸ் ஹெட்டின் அதிரடியால் 28.2 ஓவர்களிலேயே 2 விக்கெட்களை மட்டும் இழந்து வெற்றி பெற்றது. தொடக்க வீரராக களமிறங்கிய டிராவிஸ் ஹெட் 69 பந்துகளில், 4 சிக்ஸர்கள், 12 பவுண்டரிகளுடன் சதம் விளாசினார். இது சர்வதேச டெஸ்ட் அரங்கில் அவரது 10-வது சதமாக அமைந்தது. அதிரடியாக விளையாடிய டிராவிஸ் ஹெட் 83 பந்துகளில், 4 சிக்ஸர்கள், 16 பவுண்டரிகளுடன் 123 ரன்கள் விளாசிய நிலையில் பிரைடன் கார்ஸ் பந்தில் ஆட்டமிழந்தார்.
மற்றொரு தொடக்க வீரரான ஜேக் வெதரால்டு 23 ரன்களில் வெளியேறினார். தனது 24-வது அரை சதத்தை கடந்த மார்னஸ் லபுஷேன் 49 பந்துகளில், ஒரு சிக்ஸர், 6 பவுண்டரிகளுடன் 51 ரன்களும், கேப்டன் ஸ்டீவ் ஸ்மித் 2 ரன்களும் சேர்த்து ஆட்டமிழக்காமல் இருந்தனர். இரு இன்னிங்ஸையும் சேர்த்து 10 விக்கெட்கள் வீழ்த்திய மிட்செல் ஸ்டார்க் ஆட்ட நாயகனாக தேர்வானார். 8 விக்கெட்கள் வித்தியாசத்தில் வெற்றி பெற்ற ஆஸ்திரேலிய அணி 5 ஆட்டங்கள் கொண்ட ஆஷஸ் டெஸ்ட் கிரிக்கெட் தொடரில் 1-0 என முன்னிலை வகிக்கிறது. 2-வது டெஸ்ட் போட்டி வரும் டிசம்பர் 4-ம் தேதி பிரிஸ்பனில் தொடங்குகிறது.
104 வருடங்களுக்கு பிறகு… - பெர்த்தில் நடைபெற்ற ஆஷஸ் டெஸ்ட் கிரிக்கெட் தொடரின் முதல் போட்டி 2 நாட்களில் முடிவடைந்தது. ஆஷஸ் தொடரில் 2 நாட்களில் ஒரு டெஸ்ட் போட்டி முடிவடைவது இது 6-வது முறையாகும்.
1888-ம் ஆண்டில் லார்ட்ஸ், தி ஓவல், மான்செஸ்டர் ஆகிய மைதானங்களில் நடைபெற்ற போட்டிகளும் 2 நாட்களில் முடிவடைந்திருந்தது.
மேலும் 1890-ம் ஆண்டு தி ஓவல் மைதானத்திலும், 1921-ம் ஆண்டு நாட்டிங்ஹாமிலும் நடைபெற்ற டெஸ்ட் போட்டிகளும் 2 நாட்களில் முடிவுக்கு வந்திருந்தன. இந்த வரிசையில் தற்போது 104 வருடங்களுக்கு பிறகு ஆஷஸ் தொடரின் போட்டி 2 நாட்களில் நிறைவு பெற்றுள்ளது. மேலும் ஆஸ்திரேலிய மண்ணில் நடைபெற்ற ஆஷஸ் டெஸ்ட் போட்டி 2 நாட்களில் முடிவடைவது இது முதல் முறையாகும்.
