அலெக்ஸ் கேரி
அடிலெய்டு: இங்கிலாந்து அணிக்கு எதிரான ஆஷஸ் டெஸ்ட் கிரிக்கெட் தொடரின் 3-வது போட்டியின் முதல் இன்னிங்ஸில் ஆஸ்திரேலிய அணி 371 ரன்கள் எடுத்து ஆல் அவுட் ஆனது. அலெக்ஸ் கேரி 106 ரன்களும், உஸ்மான் கவாஜா 82 ரன்களும் விளாசினர்.
அடிலெய்டில் நேற்று தொடங்கிய இந்த டெஸ்ட் போட்டியில் டாஸ் வென்ற ஆஸ்திரேலிய அணி பேட்டிங்கை தேர்வு செய்தது. இந்த போட்டிக்கான விளையாடும் லெவனை ஆஸ்திரேலியா நேற்று முன்தினமே அறிவித்து இருந்தது. இதில் ஸ்டீவ் ஸ்மித் இடம் பெற்றிருந்தார். இந்நிலையில் நேற்று போட்டி தொடங்குவதற்கு முன்னதாக உடல்நலமின்மை காரணமாக ஸ்மித் விலகினார். இதனால் உஸ்மான் கவாஜா அணியில் சேர்க்கப்பட்டார்.
பேட்டிங்கை தொடங்கிய ஆஸ்திரேலிய அணி தொடக்கத்தில் தடுமாறியது. ஜேக் வெதரால்டு 27 பந்துகளில், 4 பவுண்டரிகளுடன் 18 ரன்கள் எடுத்த நிலையில் ஜோப்ரா ஆர்ச்சர் வீசிய பவுன்ஸரை விளாச முயன்ற போது விக்கெட் கீப்பர் ஜேமி ஸ்மித்திடம் கேட்ச் ஆனது. நிதானமாக விளையாடிய டிராவிஸ் ஹெட் 28 பந்துகளில், 10 ரன்கள் சேர்த்த நிலையில் பிரைன் கார்ஸ் பந்தை பாயின்ட் திசையில் அடித்த போது ஸாக் கிராவ்லி பாய்ந்து ஒற்றை கையால் பிடித்து அசத்தினார்.
33 ரன்களுக்கு 2 விக்கெட்களை இழந்த நிலையில் மார்னஸ் லபுஷேன், உஸ்மான் கவாஜா ஜோடி பார்ட்னர்ஷிப்பை கட்டமைத்தது. 61 ரன்கள் சேர்த்த இந்த ஜோடியை ஜோப்ரா ஆர்ச்சர் பிரித்தார். மார்னஸ் லபுஷேன் 40 பந்துகளில், 19 ரன்கள் எடுத்த நிலையில் ஜோப்ரா ஆர்ச்சர் வீசிய பந்தை கால்களை நகர்த்தாமல் லெக் திசையில் அடிக்க முயன்ற போது மிட் விக்கெட் திசையில் பிரைடன் கார்ஸிடம் எளிதாக கேட்ச் ஆனது.
இதையடுத்து களமிறங்கிய கேமரூன் கிரீன் ரன் ஏதும் எடுக்காத நிலையில் ஜோப்ரா ஆர்ச்சர் பந்தில் ஆட்டமிழந்தார். இந்த இரு விக்கெட்களும் ஓரே ஓவரில் சரிந்திருந்தது. இதன் பின்னர் கவாஜாவுடன் இணைந்த விக்கெட் கீப்பர் பேட்ஸ்மேனான அலெக்ஸ் கேரி அழுத்தமின்றி சீராக ரன்கள் சேர்த்தார். தனது 27-வது அரை சதத்தை கடந்த கவாஜா 126 பந்துகளில், 10 பவுண்டரிகளுடன் 82 ரன்கள் எடுத்த நிலையில் வில் ஜேக்ஸ் வீசிய பந்தை ஸ்வீப் ஷாட் விளையாடிய போது டீப் ஸ்கொயர் லெக் திசையில் நின்ற ஜோஷ் டங்கிடம் கேட்ச் ஆனது.
5-வது விக்கெட்டுக்கு கவாஜா, அலெக்ஸ் கேரி ஜோடி 138 பந்துகளில், 91 ரன்கள் சேர்த்தது. இதையடுத்து களமிறங்கிய ஜோஷ் இங்லிஷ் 32 ரன்களில் ஜோஷ் டங் பந்தில் போல்டானார். அவரைத் தொடர்ந்து கேப்டன் பாட் கம்மின்ஸ் 13 ரன்களில் பிரைன் கார்ஸ் பந்தில் வெளியேறினார். சிறப்பாக விளையாடி தனது 3-வது சதத்தை அடித்த அலெக்ஸ் கேரி 143 பந்துகளில், ஒரு சிக்ஸர், 8 பவுண்டரிகளுடன் 106 ரன்கள் எடுத்த நிலையில் வில் ஜேக்ஸ் பந்தில் ஆட்டமிழந்தார்.
நேற்றைய முதல் நாள் ஆட்டத்தின் முடிவில் ஆஸ்திரேலிய அணி 83 ஓவர்களில் 8 விக்கெட் இழப்புக்கு 326 ரன்கள் குவித்தது. மிட்செல் ஸ்டார்க் 63 பந்துகளில், 4 பவுண்டரிகளுடன் 33 ரன்களும், நேதன் லயன் ரன் ஏதும் சேர்க்காமல் களத்தில் இருந்தனர். இங்கிலாந்து அணி தரப்பில் ஜோப்ரா ஆர்ச்சர் 3 விக்கெட்களை வீழ்த்தினார். பிரைடன் கார்ஸ், வில் ஜேக்ஸ் ஆகியோர் தலா 2 விக்கெட்களையும், ஜோஷ் டங் ஒரு விக்கெட்டையும் கைப்பற்றினர்.
இரண்டாம் நாள் ஆட்டத்தில் மேலும் 45 ரன்கள் எடுத்து நிலையில் ஆஸ்திரேலிய அணி ஆட்டமிழந்தது. தொடர்ந்து இங்கிலாந்து அணி முதல் இன்னிங்ஸை தொடங்கியது. மத்திய உணவு நேர இடைவேளையின் போது 3 விக்கெட்டுகள் இழப்புக்கு 59 ரன்கள் எடுத்திருந்தது இங்கிலாந்து அணி.
56 ஆயிரம் ரசிகர்கள்: அடிலெய்டில் நேற்று தொடங்கிய ஆஷஸ் டெஸ்ட் தொடரின் 3-வது போட்டியை காண்பதற்காக மைதானத்துக்கு 56,298 பேர் வருகை தந்திருந்தனர்.
5 ரன்னில் தப்பித்த கவாஜா: ஆஸ்திரேலிய அணியின் பேட்ஸ்மேனான உஸ்மான் கவாஜா 5 ரன்களில் இருந்த போது 2-வது சிலிப் திசையில் கொடுத்த கேட்ச்சை ஹாரி புரூக் தவறவிட்டார். இதற்கான பலனை இங்கிலாந்து அணி அனுபவித்தது. ஏனெனில் அவர், லபுஷேன் மற்றும் அலெக்ஸ் கேரியுடன் இணைந்து வலுவான பார்ட்னர் ஷிப்களை அமைத்து அணிக்கு பலம் சேர்த்தார்.
கருப்பு பட்டை அணிந்த வீரர்கள்: அடிலெய்டில் நேற்று தொடங்கிய 3-வது டெஸ்ட் போட்டியில் ஆஸ்திரேலியா, இங்கிலாந்து அணி வீரர்கள் கருப்பு பட்டை அணிந்து கலந்து கொண்டனர். கடந்த 14-ம் தேதி சிட்னி போண்டி கடற்கரையில் நிகழ்ந்த தீவிரவாத தாக்குதலில் 16 பேர் இறந்திருந்தனர். இவர்களுக்கு அஞ்சலி செலுத்தும் வகையில் இரு அணி வீரர்களும் கருப்பு பட்டை அணிந்திருந்தனர்.
