சென்னை: ஹாக்கி இந்தியா லீக் போட்டியில் அக்கார்ட் தமிழ்நாடு டிராகன்ஸ் அணி வெற்றியைப் பெற்றுள்ளது.
இந்தப் போட்டி சென்னை எழும்பூரிலுள்ள மேயர் ராதா கிருஷ்ணன் மைதானத்தில் நேற்று நடைபெற்றது. இதில் தமிழ்நாடு டிராகன்ஸ் அணி 3-2 என்ற கோல் கணக்கில் சிறப்பாக விளையாடி சூர்மா ஹாக்கி கிளப் அணியை வென்றது.
ஆட்டம் தொடங்கிய 9-வது நிமிடத்திலேயே தமிழ்நாடு டிராகன்ஸ் அணி வீரர் செல்வராஜ் கனகராஜ் ஒரு கோல் அடித்தார். இதையடுத்து 1-0 என்ற கணக்கில் தமிழ்நாடு டிராகன்ஸ் முன்னிலை பெற்றது.
இதைத் தொடர்ந்து 13-வது நிமிடத்தில் தமிழ்நாடு டிராகன்ஸ் வீரர் பிளேக்கோவர்ஸ் ஒரு கோலடித்து 2-0 என முன்னிலையை ஏற்படுத்தினார்.
ஆனால் அதே நிமிடத்திலேயே சூர்மா அணி வீரர் ஹர்மன் பிரீத் சிங் ஒரு கோலடிக்க 2-1 என்ற நிலை ஏற்பட்டது. ஆனால் 23-வது நிமிடத்தில் தமிழ்நாடு டிராகன்ஸ் அணியின் உத்தம் சிங் ஒரு கோலடித்து அணிக்கு 3-1 என்ற கணக்கில் முன்னிலையை ஏற்படுத்தினார்.
ஆட்டத்தின் 39-வது நிமிடத்தில் சூர்மா அணியின் மணீந்தர் சிங் ஒரு கோலடித்தார். இருந்த போதும் இறுதி வரை இந்த நிலை நீடிக்கவே 3-2 என்ற கணக்கில் தமிழ்நாடு டிராகன்ஸ் அணி அபார வெற்றி கண்டது.
