ஆசிய கோப்பை | இந்தியா - பாகிஸ்தான் அணிகள் மீண்டும் பலப்பரீட்சை

துபாய்: ஆசிய கோப்பை கிரிக்கெட் தொடரில் இரண்டாவது முறையாக பாகிஸ்தான் அணியுடன் பலப்பரீட்சை நடக்கவிருக்கிறது இந்திய அணி.

15-வது ஆசிய கோப்பை கிரிக்கெட் தொடர் ஐக்கிய அரபு அமீரகத்தில் கடந்த 27-ம் தேதி தொடங்கி நடைபெற்று வருகிறது. செப்டம்பர் 11-ம் தேதி வரை நடைபெறும் இந்த தொடரில் லீக் போட்டிகள் இன்றுடன் நிறைவடைந்த நிலையில் நாளை முதல் சூப்பர் 4 சுற்று போட்டிகள் நடக்கவுள்ளது. இந்தியா, பாகிஸ்தான் குரூப் ஏ பிரிவிலும், இலங்கை மற்றும் ஆப்கானிஸ்தான் குரூப் பி பிரிவிலும் இடம்பெற்றுள்ளன.

ஒவ்வொரு பிரிவிலும் இடம் பெற்றுள்ள அணிகள் மற்ற அணிகளுடன் தலா ஒரு முறை மோதி புள்ளிகள் அடிப்படையில் முதல் இரு இடங்களை பிடிக்கும் அணிகள் சூப்பர் 4 சுற்றுக்கு முன்னேறியுள்ளன. நாளை தொடங்கும் சூப்பர் 4 சுற்றில் நான்கு அணிகளும் தலா ஒரு முறை மோதவுள்ளன. இதில் முதல் இரு இடத்தை பிடிக்கும் அணி இறுதிப் போட்டியில் பலப்பரீட்சை நடத்தும். சூப்பர் 4 சுற்று செப்டம்பர் 3-ம் தேதி முதல் 9-ம் தேதி வரை நடைபெறுகிறது.

இரண்டாம் முறையாக பாகிஸ்தான் உடன் மோதும் இந்தியா:

லீக் சுற்றில் தனது முதல் ஆட்டத்தில் பாகிஸ்தானை எதிர்கொண்டது இந்தியா. துபாயில் நடைபெற்ற இந்த ஆட்டத்தில் பாகிஸ்தான் அணியை 5 விக்கெட்கள் வித்தியாசத்தில் தோற்கடித்தது இந்திய அணி. 148 ரன்கள் இலக்கை விரட்டிய இந்திய அணி 2 பந்துகளை மீதம் வைத்து 19.4 ஓவர்களில் வெற்றி கண்டது. ரவீந்திர ஜடேஜா 29 பந்துகளில், 2 சிக்ஸர்கள், 2 பவுண்டரிகளுடன் 35 ரன்களும், ஹர்திக் பாண்டியா 17 பந்துகளில், ஒரு சிக்ஸர், 4 பவுண்டரிகளுடன் 33 ரன்கள் விளாசி அணியின் வெற்றிக்கு முக்கிய பங்களிப்பை வழங்கினர். இந்த ஜோடி 4-வது விக்கெட்டுக்கு 52 ரன்கள் சேர்த்தது.

முகமது நவாஸ் வீசிய கடைசி ஓவரில் வெற்றிக்கு 7 ரன்களே தேவையாக இருந்த நிலையில் முதல் பந்தில் ஜடேஜா போல்டானார். ஒரு கட்டத்தில் 3 பந்துகளுக்கு 6 ரன்கள் தேவையாக இருந்த நிலையில் லாங்-ஆன் திசையில் சிக்ஸர் விளாசி வெற்றியை வசப்படுத்தினார் ஹர்திக் பாண்டியா. இதனால் இந்தப் போட்டி அனைவராலும் ரசிக்கப்பட்ட ஒன்றாக அமைந்தது.

தற்போது இந்தியா - பாகிஸ்தான் அணிகள் மீண்டும் மோதும் வாய்ப்பு வந்துள்ளது. குரூப் ஏ பிரிவில் இடம்பெற்றிருந்த இரண்டு அணிகளுமே சூப்பர் 4 சுற்றுக்கு தகுதிபெற்றுள்ளதால் நாளை மறுதினம் நடைபெறும் ஆட்டத்தில் இரண்டு அணிகளுமே பலப்பரீட்சை நடத்தவுள்ளன. இது எதிர்பார்ப்பை ஏற்படுத்தியுள்ளது.

‘ஹாட்ரிக் விருந்து’

ஆசிய கோப்பையில் இந்தியா - பாகிஸ்தான் அணிகள் இரண்டு முறை மோதவுள்ளது உறுதியாகியுள்ள நிலையில் ஹாட்ரிக் மோதல் ஏற்படவும் வாய்ப்புள்ளது. சூப்பர் 4 சுற்றில் இரு அணிகளும் முதல் இரு இடங்களுக்குள் வந்தால் இறுதிப் போட்டிக்கு தகுதிபெற முடியும். அப்படி நடந்தால் ரசிகர்களுக்கு ‘ஹாட்ரிக்‘ விருந்துதான்.