சர்வதேச டெஸ்ட் தரவரிசையில் 2-வது இடத்தில் இருக்கும் இந்திய அணி, நியூஸிலாந்துக்கு எதிரான இரு போட்டிகள் கொண்ட டெஸ்ட் தொடரை வென்றாலோ அல்லது சமனில் முடித்தாலோ மட்டுமே அந்த இடத்தை தக்கவைத்துக்கொள்ள முடியும்.
இந்திய-நியூஸிலாந்து அணிகள் இடையிலான இரு போட்டிகள் கொண்ட டெஸ்ட் தொடரின் முதல் போட்டி ஆக்லாந்தில் நாளை தொடங்குகிறது. இந்தத் தொடரை இந்தியா 2-0 என்ற கணக்கில் வெல்லும்பட்சத்தில் அதன் தரவரிசையில் எவ்வித மாற்றமும் இருக்காது என்றாலும், கூடுதலாக ஒரு ரேட்டிங் புள்ளி மட்டும் கிடைக்கும். அதாவது இந்திய அணி 118 ரேட்டிங் புள்ளிகளைப் பெறும்.
ஒருவேளை நியூஸிலாந்துக்கு எதிரான தொடரை இந்தியா 1-0 என்ற கணக்கில் வென்றால் 5 ரேட்டிங் புள்ளிகளை இழக்கும். 3-வது இடத்தில் இருக்கும் ஆஸ்தி ரேலியாவைவிட கூடுதலாக ஒரு ரேட்டிங் புள்ளியை பெற்றிருக்கும். ஆனால் தரவரிசையில் எவ்வித மாற்றமும் இருக்காது. இந்தத் தொடர் 1-1 என்ற கணக்கிலோ அல்லது 0-0 என்ற கணக்கிலோ டிராவில் முடியுமானால் இந்தியா 2-வது இடத்தையும், நியூஸிலாந்து 8-வது இடத்தையும் தக்கவைத்துக் கொள்ளும்.
நியூஸிலாந்து 1-0 என்ற கணக்கில் தொடரை வென் றால் மேற்கிந்தியத் தீவுகளை பின்னுக்குத் தள்ளி 7-வது இடத்தைப் பிடிக்கும். நியூஸி லாந்து 2-0 என்ற கணக்கில் வென்று, இலங்கை-வங்கதேசம் அணிகளுக்கு இடையிலான டெஸ்ட் தொடர் 1-1 என்ற கணக்கில் டிராவில் முடிந்தால், நியூஸிலாந்து 6-வது இடத்தை பிடிக்கும். இலங்கை 7-வது இடத்துக்கு தள்ளப்படும்.
தரவரிசையில் 11-வது இடத்தில் உள்ள இந்தியாவின் சேதேஷ்வர் புஜாரா, 11-வது இடத்தில் உள்ள இந்தியாவின் கோலி ஆகியோர் தரவரிசையில் முன்னேற்றம் காண இந்தத் தொடர் நல்ல வாய்ப்பாகும். முழு பார்மில் இருக்கும் கோலி, நியூஸிலாந்து தொடரின் முடிவில் முதல் 10 இடங்களுக்குள் வருவதற்கு பிரகாசமான வாய்ப்புள்ளது.