T20 WC-க்கு நீலம் + ஆரஞ்சு நிற கலவை: இந்திய அணியின் ஜெர்சி அறிமுகம்

தரம்சாலா: எதிர்வரும் டி20 உலகக் கோப்பை தொடருக்கான இந்திய கிரிக்கெட் அணியின் ஜெர்சி அறிமுகம் செய்யப்பட்டுள்ளது. இதனை அடிடாஸ் நிறுவனம் சமூக வலைதளத்தில் பகிர்ந்துள்ளது. இந்திய அணியின் இந்த புதிய டி20 ஜெர்சி நீலம் மற்றும் ஆரஞ்சு நிற கலவையில் வெளியாகி உள்ளது.

வரும் ஜூன் 1 முதல் 29-ம் தேதி வரையில் அமெரிக்கா மற்றும் மேற்கு இந்தியத் தீவுகளில் டி20 உலகக் கோப்பை நடைபெற உள்ளது. இந்தியா உட்பட 20 அணிகள் இந்த தொடரில் பங்கேற்கிறது. மொத்தம் 55 போட்டிகள். குரூப் சுற்று, சூப்பர் 8 சுற்று, நாக் அவுட் என போட்டிகள் நடைபெற உள்ளது.

இந்திய அணி ‘குரூப்-ஏ’ பிரிவில் இடம்பெற்றுள்ளது. இதே பிரிவில் பாகிஸ்தான் அணியும் அங்கம் வகிக்கிறது. அண்மையில் இந்த தொடருக்கான இந்திய அணி அறிவிக்கப்பட்டது. கிரிக்கெட் விமர்சகர்கள், முன்னாள் வீரர்கள் மற்றும் ரசிகர்கள் என பல தரப்பில் இருந்து அணித் தேர்வு கலவையான விமர்சனங்களை பெற்று இருந்தது குறிப்பிடத்தக்கது.

இந்தச் சூழலில் இந்திய அணியின் ஜெர்சியை அடிடாஸ் அறிமுகம் செய்துள்ளது. தரம்சாலாவில் உள்ள இமாச்சல் பிரதேச கிரிக்கெட் சங்க மைதானத்தில் கேப்டன் ரோகித் சர்மா, குல்தீப் யாதவ், ஜடேஜா ஆகியோர் முன்னிலையில் இந்த புதிய ஜெர்சியை விமரிசையாக அறிமுகம் செய்தது.

இந்திய அணி: ரோகித் சர்மா, விராட் கோலி, யஷஸ்வி ஜெய்ஸ்வால், சூர்யகுமார் யாதவ், ரவீந்திர ஜடேஜா, ஜஸ்ப்ரீத் பும்ரா, ரிஷப் பந்த், சஞ்சு சாம்சன், ஹர்திக் பாண்டியா, ஷிவம் துபே, அக்சர் படேல், குல்தீப் யாதவ், யுஸ்வேந்திர சஹால், அர்ஷ்தீப் சிங், சிராஜ்.