உலகக் கோப்பை கிரிக்கெட்டில் இந்தியா - பாகிஸ்தான் உள்ளிட்ட 9 ஆட்டங்கள் மாற்றி அமைப்பு

துபாய்: உலகக் கோப்பை கிரிக்கெட் தொடரில் இந்தியா - பாகிஸ்தான் உள்ளிட்ட 9 ஆட்டங்கள் நடைபெறும் தேதிகள் மாற்றி அமைக்கப்பட்டுள்ளன.

ஐசிசி ஒருநாள் போட்டி கிரிக்கெட் உலகக் கோப்பை தொடர் வரும் அக்டோபர் 5-ம் தேதி இந்தியாவில் தொடங்குகிறது. இந்நிலையில் இதில் இந்தியா - பாகிஸ்தான் மோதும் லீக் ஆட்டங்கள் உட்பட 9 போட்டிகளின் தேதி மாற்றி அமைக்கப்பட்டுள்ளது. இதை ஐசிசி அதிகாரப்பூர்வமாக அறிவித்துள்ளது.

இதன்படி இந்தியா - பாகிஸ்தான் அணிகள் மோதும் லீக் ஆட்டம் அக்டோபர் 15-ம் தேதிக்கு பதிலாக ஒருநாள் முன்னதாக 14-ம் தேதி நடைபெறும் என தெரிவிக்கப்பட்டுள்ளது. போட்டி ஏற்கெனவே அறிவிக்கப்பட்டபடி அகமதாபாத்தில் நரேந்திர மோடி மைதானத்திலேயே நடைபெறும்.

இங்கிலாந்து - ஆப்கானிஸ்தான் மோதும் போட்டி அக்டோபர் 14-ம் தேதிக்கு பதிலாக ஒருநாள் தாமதமாக 15-ம் தேதி நடைபெறும். பாகிஸ்தான் - இலங்கை அணிகள் ஹைதராபாத்தில் அக்டோபர் 12-ம் தேதி மோத இருந்த ஆட்டம் இரு நாட்கள் முன்னதாக 10-ம் தேதி நடத்தப்பட உள்ளது. ஆஸ்திரேலியா - தென் ஆப்பிரிக்கா அணிகள் லக்னோவில் அக்டோபர் 13-ம் தேதி மோத இருந்த ஆட்டம் ஒருநாள் முன்னதாக 12-ம் தேதி நடைபெறுகிறது.

இதேபோன்று நியூஸிலாந்து - வங்கதேசம் அணிகள் அக்டோபர் 14-ம் தேதி சென்னை சேப்பாக்கம் மைதானத்தில் மோதுவதாக இருந்தது. இந்த ஆட்டம் காலையில் நடைபெறும் என அறிவிக்கப்பட்டிருந்தது. தற்போது இந்த போட்டி ஒருநாள் முன்னதாக 13-ம் தேதி பகலிரவாக நடைபெறும் என தெரிவிக்கப்பட்டுள்ளது.

அக்டோபர் 10-ம் தேதி இங்கிலாந்து - வங்கதேசம் அணிகள் மோதும் ஆட்டம் தரம்சாலாவில் பகலிரவாக நடைபெறும் என முன்னர் தெரிவிக்கப்பட்டிருந்தது. தற்போது இந்த ஆட்டம் காலை 10.30 மணிக்கு நடைபெறும் என அறிவிக்கப்பட்டுள்ளது. லீக் சுற்றின் இறுதிப் பகுதியில் நவம்பர் 11-ம் தேதிஇரு ஆட்டங்கள் நடைபெறுகின்றன. ஆஸ்திரேலியா - வங்கதேசம் அணிகள் நவம்பர்12-ம் தேதி புனேவில் மோதுவதாக இருந்தன.இந்த ஆட்டம் தற்போது ஒருநாள் முன்னதாக 11-ம் தேதி காலை 10.30 மணிக்கு நடைபெறும் என தெரிவிக்கப்பட்டுள்ளது.

இதே நாளில் இங்கிலாந்து - பாகிஸ்தான் அணிகள் மோதும் ஆட்டம் கொல்கத்தாவில் பிற்பகல் 2 மணிக்கு நடைபெறுகிறது. இறுதியாக இந்தியா - நெதர்லாந்து அணிகள் மோதும் தொடரின் கடைசி லீக் ஆட்டம் நவ.11-ம் தேதிக்கு பதிலாக ஒருநாள் தாமதமாக 12-ம் தேதி பகலிரவு ஆட்டமாக பெங்களூருவில் நடைபெறும் என தெரிவிக்கப்பட்டுள்ளது.