தூத்துக்குடி: திருச்செந்தூர் சுப்பிரமணிய சுவாமி திருக்கோயில் கந்தசஷ்டி விழாவில் சூரசம்ஹாரம் இன்று மாலை நடைபெறுகிறது. இதையடுத்து கடற்கரையில் லட்சக்கணக்கான பக்தர்கள் குவிந்துள்ளனர்.
கந்தசஷ்டி விழா: முருக பெருமானின் ஆறுபடை வீடுகளில் இரண்டாம் படை வீடான திருச்செந்தூரில் ஆண்டு தோறும் நடைபெறும் விழாக்களில் கந்தசஷ்டி விழா முக்கியமானதாகும். சூரபத்மனை, முருக பெருமான் வதம் செய்த இடம் என்பதால் இங்கு நடைபெறும் சூரசம்ஹாரம் உலக பிரசித்தி பெற்றதாகும். இந்த ஆண்டு கந்தசஷ்டி விழா கடந்த 10-ம் தேதி யாக சாலை பூஜையுடன் தொடங்கியது.
இதனை தொடர்ந்து தினமும் காலை 3 மணிக்கு கோயில் நடை திறக்கப்பட்டு, விஸ்வரூப தரிசனம், உதயமார்த்தாண்ட அபிஷேகம், யாக சாலை பூஜை, மூலவருக்கு உச்சி கால பூஜை, ஜெயந்திநாதருக்கு யாக சாலையில் தீபாராதனை, தங்கச் சப்பரத்தில் ஜெயந்திநாதர் யாக சாலையில் இருந்து எழுந்தருளி, வேல் வகுப்பு, வீரவாள் வகுப்பு பாடல்களுடன் சண்முக விலாசம் சேருதல், திருவாவடுதுறை சஷ்டி மண்டபத்தில் ஜெயந்திநாதருக்கு அபிஷேகம், தங்க ரதத்தில் கிரி வீதி உலா போன்ற பல்வேறு சிறப்பு வழிபாடுகள் நடைபெற்றன.
சூரசம்ஹாரம்: விழாவின் முக்கிய நிகழ்ச்சியான சூரசம்ஹாரம் 6-ம் திருநாளான இள்று நடைபெறுகிறது. இதனை முன்னிட்டு அதிகாலை 1 மணிக்கு கோயில் நடை திறக்கப்பட்டு, விஸ்வரூப தீபாராதனை, உதயமார்த்தாண்ட அபிஷேகம் மற்றும் இதர கால வேளை பூஜைகள் நடைபெற்றன. தொடர்ந்து யாக சாலை பூஜைகள் தொடங்கின. காலை 9 மணிக்கு பூர்ணாகுதி தீபாராதனை, அதனை தொடர்ந்து சுவாமி, அம்மனுக்கு அபிஷேகம், அலங்காரம் நடைபெற்றது.
பகலில் மூலவருக்கு உச்சிக் கால தீபாராதனையும், யாக சாலையில் சுவாமிக்கு மகா தீபாராதனையும் நடைபெற்றது. பின்னர் தங்கச் சப்பரத்தில் சுவாமி ஜெயந்திநாதர் யாக சாலையில் இருந்து எழுந்தருளி வேல் வகுப்பு, வீரவாள் வகுப்பு முதலிய பாடல்களுடன், மேளவாத்தியங்களுடன் சண்முக விலாசம் சேர்ந்தார். அங்கு சிறப்பு தீபாராதனை நடைபெற்றது. பிற்பகல் 2 மணியளவில் திருவாவடுதுறை ஆதீன சஷ்டி மண்டபத்தில் சுவாமி ஜெயந்திநாதருக்கு அபிஷேகம், அங்காரம் நடைபெற்றது.
மக்கள் வெள்ளம்: தொடர்ந்து மாலையில் சுவாமி ஜெயந்திநாதர், சூரபத்மனை வதம் செய்வதற்காக போர்க்கோலம் பூண்டு சஷ்டி மண்டபத்தில் இருந்து கடற்கரைக்கு புறப்படுகிறார். முன்னதாக சிவன் கோயிலிருந்து சூரபத்மன் எழுந்தருளி உள்மாட வீதி, ரதவீதிகள் சுற்றி கோயில் கடற்கரைக்கு படை பரிவாரங்களுடன் வந்து சேரூகிறார். தொடர்ந்து சூரசம்ஹாரம் தொடங்கியது. முதலில், கஜ முகத்துடன் வந்த சூரபத்மன், சுவாமி ஜெயந்திநாதர் தனது வெள்ளி வேலால் வதம் செய்கிறார். இரண்டாவதாக சிங்க முகத்துடன் வந்த சூரனையும், மூன்றாவதாக சுயரூபத்துடனும் போரிட்ட சூரபத்மனை சுவாமி வதம் செய்தார். பின்னர் மாமரமாக மாறிய சூரனை சேவலாகவும், மயிலாகவும் மாற்றி தன்னுள் ஆட்கொள்கிறார்.
விரதம் நிறைவு: சூரசம்ஹாரத்தை காண லட்சக்கணக்கான பக்தர்கள் கடற்கரையில் கூடியுள்ளனர். கடலா கடல் அலையா என வியக்கும் வண்ணம் கடற்கரை முழுவதும் மனித தலைகளாக காட்சியளித்தன. சூரசம்ஹாரம் முடிந்ததும் பக்தர்கள் கடலில் புனித நீராடி விரதத்தை நிறைவு செய்வர். சூரசம்ஹாரம் முடிந்தும் வள்ளி, தெய்வானையுடன் சுவாமி ஜெயந்திநாதர் சந்தோச மண்டபத்தில் எழுந்தருளினார். அங்கு சுவாமிக்கும், அம்பாளுக்கும் அலங்கார தீபாரதனை நடைபெறுகிறது. சுவாமி பூஞ்சப்பரத்தில் கிரிபிரகாரம் உலா வந்து திருக்கோயில் சேர்கிறார். இரவு 108 மகாதேவர் சன்னதி முன்பு சாயா அபிஷேகம் நடைபெற்று பக்தர்களுக்கு சஷ்டி பூஜை தகடுகள் கட்டப்படுகிள்றன.
பலத்த பாதுகாப்பு: சூரசம்ஹாரத்தை முன்னிட்டு திருநெல்வேலி சரக டிஜஜி திருநாவுக்கரசு, தூத்துக்குடி எஸ்பி சிவபிரசாத் ஆகியோர் தலைமையில் 4,100 போலீஸார் பாதுகாப்புப் பணியில் ஈடுபடுத்தப்பட்டுள்ளனர். கடற்கரையில் பல்வேறு இடங்களில் கண்காணிப்பு கோபுரங்கள் அமைக்கப்பட்டு போலீஸார், பைனாகுலர் மூலம் கடற்கரையை கண்காணித்தனர். மேலும் முக்கிய இடங்களில் கண்காணிப்பு கேமிராக்களும் பொருத்தப்பட்டிருந்தன. மேலும் போலீசார் தொடர்ந்து ஒலிபெருக்கி மூலம் பக்தர்களுக்கு அறிவிப்புகளையும்.
எச்சரிக்கைகளையும் விழிப்புணர்வு தகவல்களையும் வெளியிட்டுக் கொண்டே இருந்தனர். பக்தர்கள் வசதிக்காக கோயிலை சுற்றி பல்வேறு இடங்களில் பிரமாண்ட எல்இடி திரைகள் அமைக்கப்பட்டுள்ளன. கடற்கரை பகுதி முழுவதும் ட்ரோன் கேமிராக்கள் மூலம் கண்காணிக்கப்பட்டன. கடற்கரையில் தீயணைப்பு மற்றும் மீட்பு படையினர் மீட்பு படகு மற்றும் மிதவைகளுடன் தற்காப்பு பணியில் ஈடுபட்டனர். மெரைன் போலீஸார் கடற்கரை பகுதியில் படகு மூலம் ரோந்து சுற்றி வந்தனர்.
சூரசம்ஹாரத்தை முன்னிட்டு திருச்செந்தூர் நகரமே நேற்று மாலையில் மனித தலைகளாக காட்சியளித்தது. அனைத்து பணிகளையும் ஒருங்கிணைக்க தமிழகம் முழுவதும் இருந்து இந்து சமய அறநிலையத்துறையை சேர்ந்த இணை ஆணையர்கள். துணை ஆணையர்கள். உதவி ஆணையர்கள் சிறப்பு அதிகாரிகளாக நியமிக்கப்பட்டு பணியில் ஈடுபட்டனர்.
நாளை திருக்கல்யாணம்: கந்தசஷ்டி விழாவில் 7-ம் நாளான நாளை (நவ.16) திருக்கல்யாணம் நடைபெறுகிறது. இதனை முன்னிட்டு நாளை அதிகாலை 5 மணிக்கு தெய்வானை அம்மன் தபசு காட்சிக்கு எழுந்தருளி முக்கிய வீதிகள் வழியாக தெப்பகுளம் அருகே உள்ள முருகமடத்தை சென்று சேருகிறார். அங்கு மாலை 6.30 மணிக்கு சுவாமி குமரவிடங்கபெருமான் காட்சி கொடுத்ததும் தெற்கு ரத வீதி சந்திப்பில் தோள் மாலை மாற்றும் வைபவம் நடைபெறுகிறது.
இரவு 11 மணிக்கு மேல் திருக்கல்யாண மண்டபத்தில் சுவாமி குமரவிடங்கபெருமான்- தெய்வானை அம்மன் திருக்கல்யாண நிகழ்ச்சி நடைபெறுகிறது. ஏற்பாடுகளை கோயில் அறங்காவலர் குழு தலைவர் அருள்முருகன், இணை ஆணையர் அருணாச்சலம் மற்றும் திருக்கோயில் அலுவலர்கள் செய்துள்ளனர்.