ஹிப் ஹாப் ஆதி நடிப்பில் வெளிவந்த ‘மீசைய முறுக்கு 2’ படம், தீபாவளி வாரத்தில் நவம்பர் 6-ம் தேதி ஓடிடியில் வெளியாக இருக்கிறது.
ஹிப் ஹாப் ஆதி, இயக்கி, கதாநாயகனாக நடித்திருக்கும் படம், ‘மீசைய முறுக்கு 2’. இதில், சைத்ரா ஆச்சர், கேதிகா ஷர்மா, ரம்யா ரங்கநாதன் ஆகியோர் கதாநாயகிகளாக நடித்துள்ளனர். இவர்களுடன் ஹர்ஷத் கான், கருணாஸ், நாசர், ஆடுகளம் நரேன், கருணாகரன் உள்ளிட்ட பலர் முக்கிய கதாபாத்திரங்களில் நடித்துள்ளனர்.
“மீசைய முறுக்கு என்னுடைய வாழ்க்கையை அடிப்படையாகக் கொண்ட பயோபிக். ஆனால், ‘மீசைய முறுக்கு 2’ இசை, இசைக் கலைஞர்கள் மற்றும் அவர்களது வாழ்க்கையைப் பற்றிய உலகளாவிய கதை. இசையைத் தங்களது வாழ்க்கைப் பாதையாகத் தேர்ந்தெடுக்கும் மனிதர்களின் கனவுகள், போராட்டங்கள், பயணங்கள் மற்றும் உணர்வுகளை இப்படம் பேசுகிறது” என ஹிப் ஹாப் ஆதி தெரிவித்திருந்தார்.
இந்தப் படத்தை அவ்னி மூவீஸ் மற்றும் பென்ஸ் மீடியா சார்பில் குஷ்பு சுந்தர், ஏ.சி.எஸ். அருண்குமார் தயாரித்துள்ளனர். செப்டம்பர் 25-ம் தேதி திரையரங்குகளில் வெளியான இந்தப் படத்தின் ஓடிடி வெளியீட்டு தேதி தற்போது அறிவிக்கப்பட்டுள்ளது. இந்தப் படம் தீபாவளியை முன்னிட்டு நவம்பர் 6-ம் தேதி சோனி லைவ் தமிழ் ஓடிடியில் வெளியாக இருக்கிறது.
இந்தத் தகவலை சோனி லிவ் தமிழ் அதன் சமூகவலைதள பக்கத்தில் பகிர்ந்துள்ளது. அதில், ‘உற்சாகம் நிறைந்த தீபாவளிக்கு தயாராகுங்கள். ‘மீசைய முறுக்கு 2’ படம் நவம்பர் 6-ம் தேதி முதல் சோனி லிவ் தமிழில் ஒளிபரப்பாக உள்ளது’ எனத் தெரிவித்துள்ளது.
