பிரியங்கா சோப்ரா, ரிச்சர்ட் மேடன், ஸ்டான்லி டுச்சி உள்பட பலர் நடித்து 2023-ம் ஆண்டு வெளியான வெப் தொடர், ‘சிட்டாடல்’. ஸ்பை த்ரில்லர் வெப்தொடரான இதை நீயூட்டன் தாமஸ், ஜெஸிக்கா யு ஆகியோர் இயக்கியிருந்தனர்.
இத்தொடர் வெற்றி பெற்றதை அடுத்து இதன் அடுத்த சீசன் இப்போது உருவாகியுள்ளது. பிரபல ஹாலிவுட் இயக்குநர்களான ரூஸோ சகோதரர்கள் இதைத் தயாரித்துள்ளனர். 7 எபிசோடுகளை கொண்ட இந்த வெப் தொடர் அமேசான் பிரைம் வீடியோவில் நேற்று வெளியானது. இதில் பிரியங்கா சோப்ரா, ரிச்சர்ட் மேடன் முதன்மை கதாபாத்திரங்களில் நடித்துள்ளனர்.
இந்நிலையில், இத்தொடரின் கதையையும் முக்கிய திருப்பங்களையும் இணையதளங்களில் பகிர வேண்டாம் என்று அந்தத் தொடரின் தயாரிப்பாளர்களான ரூசோ சகோதரர்கள் மற்றும் பிரியங்கா சோப்ரா ஆகியோர் சமூக வலைதளம் மூலம் கேட்டுக் கொண்டுள்ளனர்.
“இந்தத் தொடருக்காக மிகவும் கடினமாக உழைத்திருக்கிறோம். கதையின் சஸ்பென்ஸ் திரையில் வெளிப்படும்போதுதான் சுவாரஸியம் குறையாமல் இருக்கும். தயவுசெய்து அது எதையும் வெளியே கசிய விடாதீர்கள்” என்று சமூக வலைதளத்தில் பதிவிட்டுள்ளனர்.
இதற்கிடையே, ‘சிட்டாடல் 2’ பற்றிய பேச்சுக்கள் இருந்தாலும் மார்வெல் ரசிகர்கள் ரூசோ சகோதரர்களின் ‘அவெஞ்சர்ஸ்: டூம்ஸ்டே’ படத்தின் ட்ரெய்லர் அல்லது அப்டேட் எப்போது வரும் என்று சமூக வலை தளங்களில் கேட்டு வருகின்றனர்.
