பிரியங்கா மோகன் நாயகியாக நடித்துள்ள படம், ‘மேட் இன் கொரியா’. ரா.கார்த்திக் இயக்கியுள்ள இதை ரைஸ் ஈஸ்ட் என்டர்டெயின்மென்ட் சார்பில் நிதி சாகர் தயாரித்துள்ளார். நெட்ஃபிளிக்ஸ் தளத்தில் வெளியாகும் இதன் கதை கொரியாவில் நடக்கிறது.
தமிழ்நாட்டின் சிறிய ஊரில் தனது அன்றாட வாழ்க்கையைத் தாண்டி, ஒருநாள் தென் கொரியாவுக்குப் பயணம் செய்ய வேண்டும் என்ற கனவு செண்பாவுக்கு இருக்கிறது. அந்த கனவு நனவாகும் வாழ்க்கைப் பயணத்தைச் சொல்லும் கதை இது.
இதுபற்றி இயக்குநர் ரா.கார்த்திக் கூறும்போது, “கொரிய கலாச்சாரத்தின் மீது சிறுவயது முதலே ஈர்ப்பு கொண்டவளான செண்பா அதை அனுபவித்துப் பார்க்க விரும்புகிறாள்.
சியோலில் எதிர்பாராத விதமாக அவளுக்கு அந்த அனுபவம் கிடைக்கிறது. ஆனால், அவள் கற்பனை செய்ததை விட யதார்த்தம் பல சவால்களை அவள் முன் நிறுத்துகிறது. அதைத்தாண்டி அவளின் சுயத்தை கண்டுபிடிக்கும் நெகிழ்ச்சியான இந்தப் பயணமே ‘மேட் இன் கொரியா’.
கொரிய மற்றும் தமிழ்க் கலாச்சாரங்களுக்கு இடையில் ஒரே மாதிரியான ஆழமான வரலாற்று ஒற்றுமைகள் என்னை ஈர்த்தன. அந்த ஆர்வமே என் மனதுக்கு நெருக்கமான இந்த நம்பிக்கையூட்டும் கதையை சொல்லத் தூண்டியது” என்று தெரிவித்துள்ளார்.நெட்ஃபிளிக்ஸ் தளத்தில் மார்ச் 12 முதல் இப்படம் ப்ரீமியர் ஆகிறது.
