பவன் கல்யாண் நடித்துள்ள ‘ப்ரோ’ திரைப்படம் ஆகஸ்ட் 25-ஆம் தேதி ஓடிடியில் வெளியாகும் என அறிவிக்கப்பட்டுள்ளது.
சமுத்திரக்கனி இயக்கத்தில் தம்பி ராமையா நடித்த படம் ‘வினோதய சித்தம்’. கடந்த 2021-ஆம் ஆண்டு நேரடியாக ஓடிடியில் வெளியான இப்படம் விமர்சன ரீதியாக பெரும் வரவேற்பை பெற்றது. இப்படத்தை தெலுங்கில் ரீமேக் செய்துள்ளார் சமுத்திரக்கனி. தமிழில் சமுத்திரக்கனி நடித்த கதாபாத்திரத்தில் பவன் கல்யாண், தம்பி ராமையா கதாபாத்திரத்தில் சாய் தேஜ் நடித்துள்ளனர்.
தெலுங்கு ரசிகர்களுக்காக பல்வேறு மாற்றங்களுடன் தயாரான இப்படம் கடந்த ஜூலை 28-ஆம் தேதி திரையரங்குகளில் வெளியானது. படத்துக்கு தமன் இசையமைத்திருந்தார். கலவையான விமர்சனங்களை பெற்ற இப்படம் 3 நாட்கள் ரூ.87 கோடி வரை வசூலித்துள்ளதாக தகவல் வெளியானது.
இந்நிலையில், படம் வரும் 25-ம் தேதி நெட்ஃப்ளிக்ஸ் ஓடிடியில் வெளியாகும் என அறிவிக்கப்பட்டுள்ளது. மேலும், படத்தை தெலுங்கு தவிர்த்து, தமிழ், இந்தி, மலையாளம், கன்னடம் ஆகிய மொழிகளில் காணமுடியும் என தெரிவிக்கப்பட்டுள்ளது.