எல்லாவற்றுக்கும் காலநிலை மாற்றம் காரணமல்ல! - ‘தமிழ்நாடு வெதர்மேன்’ பிரதீப் ஜான் | கருத்துப் பேழை சந்திப்பு

புரிபடாத சொல்லாடல்களின் கூட்டுக்கலவையாகத் தொனிக்கும் வானிலை அறிக்கையை ஜனரஞ்சகமாக மாற்றியவர் வானிலைப் பதிவரான (Weather Blogger) பிரதீப் ஜான். சாதாரணர்களின் விருப்பத் தேடலாக வானிலை அறிக்கையை மாற்றியிருக்கும் ‘தமிழ்நாடு வெதர்மேன்’ பிரதீப் ஜானுடன் பேசியதிலிருந்து....வானிலை அறிக்கையைச் சுயமாக ஆராய்ந்து வெளியிடும் யோசனை எப்படி உதித்தது?‘தமிழ்நாடு வெதர்மேன் பிளாக்ஸ்பாட்’ வழியாக வானிலை வலைப்பதிவுகளை 2008இல் எழுதத் தொடங்கினேன். பின்னர் தமிழ்நாடு வெதர்மேன் ஃபேஸ்புக் பக்கத்தைத் தொடங்கினேன். 2015 அக்டோபர் வரை 500 பார்வையாளர்கள்தான் இருந்தார்கள். அந்த நவம்பர் மாதம் நெய்வேலியில் 12 மணி நேரம் தொடர் கனமழை பொழிந்து 500 மி.மீ. மழை பதிவானது. ஆனால், ஊடகங்களில் இது பேசுபொருளாகவில்லை. நான் சென்னையில் வசித்தாலும் பிற ஊர்களில் உள்ள வானிலைப் பதிவர்களுடன் தொடர்பில் இருப்பேன். இதனால், அன்றைய நெய்வேலி மழை நிலவரம் குறித்து வரைபடம் போட்டு, ஒவ்வொரு மணி நேரத்துக்கு இடையில் சமூக ஊடகத்தில் சுவாரசியமாகவும் எளிமையாகவும் பதிவுசெய்தேன்.அதன் பிறகு, 2015 டிசம்பர் சென்னைப் பெருவெள்ளம் வந்தது. நடப்பது என்ன என்பது குறித்து மக்களுக்குப் பதற்றம் உண்டானபோது, வானிலை குறித்த தொடர் பதிவுகள், வரைபடங்களின் வழியாக அவர்களுக்கு விழிப்புணர்வு ஏற்படுத்துவதை வழக்கமாக்கிக் கொண்டேன்..உங்களுடைய வேலைக்கும், தன்னார்வ வானிலைப் பதிவு சேவைக்கும் இடையில் ஏதேனும் தொடர்புள்ளதா?நகர்ப்புற வளர்ச்சி தொடர்பாக நான் பணிபுரிவதால், நூற்றுக்கும் அதிகமான நீர்நிலைகளின் நிலவரம், ஏரிகளின் கொள்ளளவு, எந்த ஏரி எதனுடன் இணைப்பில் உள்ளது என்பது உள்ளிட்ட தகவல்களை நன்கு அறிவேன். எனவே, எப்போது மழைக்கு அஞ்ச வேண்டும், எப்போது அஞ்சத் தேவையில்லை என்பதைத் தெளிவான கண்ணோட்டத்துடன் விளக்க முடிகிறது. என்னுடைய தொழில்முறை வேலை வானிலை ஆய்வுக்குப் பெரிதும் உதவுகிறது..வானிலை பற்றிய புரிதல் தமிழக மக்களுக்கு முன்னைக் காட்டிலும் அதிகரித்திருக்கிறதா?பிற மாநிலத்தவர்களைவிடத் தமிழ்நாட்டு மக்களுக்கு மேலடுக்குச் சுழற்சி, காற்றழுத்தப் பகுதி, காற்று குவிதல், ரேடாரை எப்படிக் கண்காணிப்பது முதலான விவரங்கள் தற்போது நன்றாகவே தெரியும். எனக்கு இவற்றை எல்லாம் 1990களில் சொல்லித்தர யாருமில்லை. இப்போது என்னைப் போன்றோர், மேகங்கள் எப்படிக் குவிகின்றன, வறண்ட காற்று எந்தத் திசையில் வீசுகிறது, காற்றழுத்தத் தாழ்வு மண்டலம் கரையைக் கடக்கும் விதம் போன்றவற்றை வரைபடம் கொண்டு ஆதாரத்துடன் விளக்குவதால் மக்களுக்கு வானிலை மாற்றம் குறித்த விழிப்புணர்வு அதிகரித்துள்ளது..இந்திய வானிலை ஆய்வு மையம் (ஐஎம்டி) மேற்கொள்ளக்கூடிய ஆய்வு முறைக்கும் நீங்கள் பயன்படுத்தும் தரவுகளுக்கும் இடையில் வேறுபாடு உண்டா?ஐஎம்டி வெளியிடும் விளக்கப்படத்தை எனது ஆய்வுக்குப் பயன்படுத்துவதில்லை. நடுத்தர அளவிலான வானிலை முன்னறிவிப்புகளுக்கான ஐரோப்பிய மையம் (ECMWF), உலகளாவிய முன்னறிவிப்பு அமைப்பு (GFS) ஆகிய சர்வதேச வானிலை மாதிரிகளைத்தான் பயன்படுத்துகிறேன். மாதம் ரூ.3,000 கட்டணம் செலுத்தினால் இதுபோன்ற இணையத்தளங்களின் வழியாக வானிலைத் தரவுகளைப் பதிவிறக்கம் செய்து கொள்ளலாம்..தட்பவெப்பநிலை கணிப்பில் ஏற்பட்டுள்ள அண்மைக் கால முன்னேற்றங்கள் என்னென்ன?2015க்கு முன்பு, பின்பு என இதைப் பிரிக்கலாம். சென்னையைப் பொறுத்தவரை, முன்பு மழையின் அளவைச் சேகரித்து அளவிடும் மழைமானி கருவி நிறுவப்பட்ட நிலையங்கள் நுங்கம்பாக்கம், மீனம்பாக்கத்தில் மட்டுமே இருந்தன. இன்று சென்னை மாநகராட்சி, பேரிடர் மேலாண்மையின்கீழ் தமிழ்நாடு முழுவதும் 600க்கும் மேற்பட்ட மழைமானி நிலையங்கள் நிறுவப்பட்டிருக்கின்றன. இவை துல்லியமான தகவல்களைப் பெற உதவுகின்றன. அதேநேரம், வானிலைக் கணிப்பு கூடுதல் சவாலான செயலாக நாளுக்கு நாள் மாறி வருகிறது. அண்மையில் வந்த சில புயல்கள் வானிலை ஆய்வில் கணித்தபடி கடந்து செல்லாமல் மெல்ல நகரும் புயல்களாகச் (Slow-moving cyclone) செயல்பட்டன. வழக்கமான புயல்களைவிட மிக மெதுவாக நகர்ந்து, ஒரே இடத்தில் நீண்ட நேரம் நீடித்து, கனமழை, பலத்த காற்று, வெள்ளப்பெருக்கு போன்ற தாக்கங்களை ஏற்படுத்தின..அண்மைக் காலத்தில் புயல்களின் எண்ணிக்கையும் அதனால் ஏற்படக்கூடிய பாதிப்புகளும் அதிகரிக்கக் காரணம் காலநிலை மாற்றமா?பிரிட்டிஷ் ஆட்சிக் காலத்தில் இருந்து வானிலைத் தரவுகளைத் தொகுக்கும் முறை சென்னையில் பின்பற்றப்படுகிறது. இவற்றைக் கொண்டு, 1813களில் இருந்து தமிழ்நாட்டில் ஏற்பட்ட மழைப்பொழிவு தொடர்பான தரவுகளை ஆராய்ந்து வருகிறேன். சென்னையில் வடகிழக்குப் பருவமழையானது காற்றழுத்தத் தாழ்வு காரணமாகப் புயலுடன் கூடிய பெருமழையாகத்தான் நெடுங்காலமாக இருந்து வந்திருக்கிறது. 2000க்குப் பிறகு அதிதீவிர மழைப்பொழிவு, மெல்ல நகரும் புயல்களின் எண்ணிக்கை அதிகரித்திருக்கிறது.அவசரப்பட்டு இதற்கெல்லாம் காலநிலை மாற்றத்தின் மீது பழி சுமத்திவிட முடியாது. குறைந்தபட்சம் 30 ஆண்டு கால மழைப்பொழிவைத் தொடர்ச்சியாக ஆய்வுக்கு உட்படுத்திய பிறகே இதை அறிவியல்பூர்வமாக உறுதிசெய்ய முடியும்..இந்தப் போக்கைக் கண்டு பீதி அடையாமல் மக்கள் புரிந்துகொள்ள வேண்டியது என்ன?எல்லாக் கனமழைக்கும், மழையினால் ஏற்படும் பாதிப்புகளுக்கும் காலநிலை மாற்றத்தை மட்டுமே குறைசொல்லக் கூடாது. நகரமயமாதல் முக்கியக் காரணி. 20 ஆண்டுகளுக்கு முன்பு முடிச்சூரில் வெள்ளப்பெருக்கு ஏற்பட்டால் பாதிப்படைய அங்கு அதிகம் ஆளில்லை. இன்றோ முடிச்சூர் செல்லும் வழியிலுள்ள தாழ்வான பகுதிகளில் மக்கள்தொகை பெருகிவிட்டது. வேளச்சேரியைப் போன்று இதுவும் நீர்நிலையின் வழித்தடத்தில் உள்ள பகுதி என்பதால், மழைப்பொழிவால் ஆண்டுதோறும் அங்குள்ள மக்கள் தத்தளிப்பதைத் தவிர்க்க முடியாது. அக்கம்பக்கத்தில் உள்ள நகரியத்தில் ஏற்பட்ட மாற்றங்களால் மழைநீர் ஓட்டத்தின் வழித்தடம் மாறியிருக்கவும் வாய்ப்புள்ளது.முறையான நகர்ப்புறத் திட்டமிடல், நீர்ப்பிடிப்புப் பகுதிகளைத் தொடர்ச்சியாகப் பராமரித்தல், காலநிலை மாற்றத்துக்கு நம்மைத் தகவமைத்துக்கொள்ளுதல் ஆகியவற்றில் கவனம் செலுத்துவதே சரியான அணுகுமுறையாக இருக்கும்.- தொடர்புக்கு: susithra.m@hindutamil.co.in.இலக்கியம் தகவல்களைத் திரிக்கக் கூடாது! - காட்டுயிர் எழுத்தாளர் ச.முகமது அலி | கருத்துப் பேழை சந்திப்பு

எல்லாவற்றுக்கும் காலநிலை மாற்றம் காரணமல்ல! - ‘தமிழ்நாடு வெதர்மேன்’ பிரதீப் ஜான் | கருத்துப் பேழை சந்திப்பு

அதிகம் வாசித்தவை...