கால்நடைகளைக் குணப்படுத்த சித்த மருத்துவம் சிறந்தது! - பேராசிரியர் புண்ணியமூர்த்தி நடேசன்

நம்முடைய தமிழ் மரபிலேயே எல்லா வீடுகளிலும் கைமருத்துவம் இருக்கிறது. நோயற்ற வாழ்வு வாழ்வதற்கு அந்த மரபைப் பின்பற்றி, என்னுடைய அம்மாச்சி சந்திரகாசம்மாள் அனைவருக்கும் அதைப் பயிற்றுவித்தவர். வீட்டில் உள்ளவர்களின் சின்ன சின்ன உடல் உபாதைகளுக்கு அவர் கைமருத்துவம் செய்து குணப்படுத்திவிடுவார். வீட்டில் நிறையக் கால்நடைகள் இருந்தன. வீட்டைச் சுற்றி அவ்வளவு அரிய மூலிகைகள் முளைத்துக் கிடக்கும்.

மூலிகைகளைப் பற்றிச் சொல்லி, அவற்றின் பலனையும் அவற்றை எப்படிப் பயன்படுத்துவது என்பதையும் சொல்லிச் சொல்லியே அவர் சிகிச்சை கொடுப்பார். இன்று கறவை மாடுகளுக்கு வரும் ‘மடி நோய்’க்குக் கண்கண்ட தீர்வாக, சோற்றுக் கற்றாழை, சுண்ணாம்பு, மஞ்சள்பொடிக் கலவை இருப்பதாகப் பலன் பெற்ற மக்கள் கூறுகிறார்கள். இந்தக் கலவையை நான் கண்டறிந்தது என்னுடைய பாட்டி தனக்குச் செய்துகொண்ட ஒரு சிகிச்சையின் தாக்கத்திலிருந்துதான்.