புதுடெல்லி: ராஜஸ்தானில் தொகுதி மேம்பாட்டு நிதியில் லஞ்சம் வாங்க முயன்று சிக்கிய 3 எம்எல்ஏக்களின் பதவி பறிக்கப்படும் அபாயம் ஏற்பட்டுள்ளது.
இந்த மூவரிடமும் ராஜஸ்தானின் ‘தெய்னிக் பாஸ்கர்’ நாளேடு தனித்தனியாக ‘ஸ்ட்ரிங் ஆப்ரேஷன்’ நடத்தியது. இதற்காக, பெயரளவில் ஒரு நிறுவனத்தை தொடங்கி இருந்தது. இந்த மூவரும் தங்கள் தொகுதி மேம்பாட்டு நிதி பணிகளுக்காக பல லட்சம் லஞ்சமாகக் கேட்டுள்ளனர்.
இது தொடர்பாக கடந்த டிசம்பர் 14-ல் செய்தி வெளியாகி இருந்தது. இந்த நடவடிக்கையில், ஆளும் பாஜகவின் ரேவந்த ராம் டங்கா, எதிர்க்கட்சியான காங்கிரஸின் அனிதா ஜாதவ், சுயேச்சை எம்எல்ஏவான ரிது பனாவத் ஆகியோர் சிக்கியுள்ளனர்.
பாஜகவின் டங்கா ரூ.50 லட்சம் பணிக்கு 40% லஞ்சமாகக் கேட்டுள்ளார். காங்கிரஸின் அனிதா ஜாதவ் ரூ.50,000 பெற்றுக்கொண்டு ரூ.80 லட்சம் மதிப்பிலான பணி அளிக்க மாவட்ட ஆட்சியருக்கு சிபாரிசு கடிதம் அளித்துள்ளார். சுயேச்சை எம்எல்ஏ ரிது, லஞ்சத் தொகையாக ரூ.40 லட்சம் நிர்ணயித்துள்ளார்.
இதைத் தொடர்ந்து அப்பணி தொடர்பான அதிகாரிகளும் தனியாக அந்த நிறுவனத்திடம் லஞ்சத் தொகைக்கு பேரம் பேசியுள்ளனர். இந்த வகையில் லஞ்சத்தொகை சுமார் 70 சதவீதம் போக மக்களுக்கான பணிக்கு 30 சதவீதமே மிஞ்சும் நிலை ஏற்பட்டது. இவர்கள் லஞ்சம் கேட்கும் காட்சிப் பதிவுகள் ஊடகத்தில் மிகத் தெளிவாக வெளியாகின.
இதையடுத்து, ராஜஸ்தானின் முதலமைச்சர் பஜன் லால் சர்மா லஞ்சம் கேட்ட அதிகாரிகள் மீது விசாரணைக்கு உத்தரவிட்டுள்ளார். சட்டப்பேரவை சபாநாயகர் வாசுதேவ் தேவ்னானி, எம்எல்ஏக்கள் மீது விசாரணைக்கு உத்தரவிட்டுள்ளார். பாஜக மற்றும் காங்கிரஸ் கட்சிகளும் தங்கள் எம்எல்ஏக்களுக்கு நோட்டீஸ் அனுப்பி, விளக்கம் கேட்டுள்ளன.
சபாநாயகர் உத்தரவின் பேரில் ராஜஸ்தான் சட்டப்பேரவையின் நெறிமுறைகள் குழு விசாரணை செய்ய உள்ளது. பாஜக மூத்த எம்எல்ஏ கைலாஷ் சந்த வர்மா தலைமையிலான இக்குழுவால், 3 எம்எல்ஏக்களும் குற்றவாளிகள் என முடிவு எடுக்கப்படும் வாய்ப்புகள் அதிகம் என எதிர்பார்க்கப்படுகிறது. இதனால் சபாநாயகரால் இந்த மூவரும் எம்எல்ஏ பதவியிலிருந்து நீக்கப்படும் அபாயம் ஏற்பட்டுள்ளது.
