புதுடெல்லி: 1960-களின் மத்தியில் கேம்பிரிட்ஜ் நகரில் உள்ள ஒரு சிறிய கிரேக்க உணவகத்தில் ராஜீவ்காந்தியைத் தற்செயலாகச் சந்தித்ததையும், முதல் பார்வையிலேயே அவர்மீது ஈர்ப்பு ஏற்பட்டதையும் சோனியா காந்தி நினைவு கூர்ந்துள்ளார்.
அவரது புத்தகமான ‘பிலாங்கிங்: ஏ ஜர்னி ஆஃப் லவ்’ (Belonging: A Journey of Love) நவம்பர் 10-ம் தேதி வெளியாகிறது.
புத்தகத்தின் முன்னோட்ட வீடியோவை தனது எக்ஸ் தளத்தில் பகிர்ந்துள்ள சோனியா, “ராஜீவும் நானும் அன்பு, மகிழ்ச்சி, நினைவுகள் நிறைந்த ஓர் உலகத்தை உருவாக்கினோம். நவம்பர் 10 அன்று அந்த உலகத்தை உங்களுடன் பகிர்ந்து கொள்கிறேன்” என்று குறிப்பிட்டுள்ளார்.
இந்தியா உள்ளிட்ட பல நாடுகளின் மாணவர்கள் அதிகம் கூடும் ‘வார்சிட்டி’ (Varsity) உணவகத்தில், பொது நண்பர் ஒருவர் மூலம் இருவரும் அறிமுகமாயினர்.
அப்போது இங்கிலாந்தில், குறிப்பாகத் தனக்குப் பழக்கமான இத்தாலிய உணவு போன்றவை கிடைக்கும் இடங்களை சோனியா தேடிக்கொண்டிருந்தார். “அந்தக் காலத்தில் இங்கிலாந்தில் உணவு மோசமாக இருக்கும். இப்போதுபோல் அதிக உணவகங்கள் அப்போது இல்லை” என்கிறார் அவர்.
ஆனால் அந்தச் சந்திப்பு, உணவுத் தேடலைத் தாண்டி வாழ்நாள் முழுவதும் நினைவில் நிற்கும் ஒன்றாக மாறியது.
“அவரை முதன்முதலில் சந்தித்தபோதே, இவருடன் இருக்க வேண்டும் என்று எனக்கு உடனடியாகத் தோன்றியது. பின்னர், அவருக்கும் அதே உணர்வுதான் என்பதை அறிந்தேன்” என்கிறார் சோனியா.
ராஜீவின் தோற்றத்தைவிட அவரது மென்மையான இயல்பே தன்னைக் கவர்ந்ததாகவும் அவர் கூறுகிறார். “மிகவும் மென்மையான தோற்றம் கொண்டவர். நிச்சயமாக மிக அழகானவரும்கூட. ஆனால் அந்த மென்மைதான் வெளிப்பட்டு என் மனதைத் தொட்டது” என்று அவர் நினைவுகூர்கிறார்.
இருவரின் உறவும் நட்பாகவே தொடங்கியது. விருந்துகள், சுற்றுலா இடங்களுக்குச் சென்ற பயணங்கள் என மாணவ வாழ்க்கையின் அன்றாட அனுபவங்களை இருவரும் பகிர்ந்துகொண்டனர். சக மாணவர்களுடன் காதலர் தின விருந்தில் கலந்துகொண்டதையும் சோனியா குறிப்பிடுகிறார். அரசியல் புகழுக்கு முந்தைய அந்த எளிய இளமைக் கால நினைவுகளையும், பழைய புகைப்படங்களையும் அந்த வீடியோ அழகாக நினைவு கூர்கிறது.
இருவரும் 1968-ல் திருமணம் செய்துகொண்டனர். ராஜீவ் காந்தி 1984 முதல் 1989 வரை இந்தியப் பிரதமராகப் பதவி வகித்தார். 1991 மே மாதம் தமிழ்நாட்டில் தேர்தல் பிரசாரத்தின்போது படுகொலை செய்யப்பட்டார்.
இத்தாலியில் பிறந்த சோனியா, காங்கிரஸ் கட்சியின் மிக முக்கியத் தலைவர்களில் ஒருவராக உயர்ந்தவர். சில நாள்களுக்கு முன்பு இன்ஸ்டாகிராமிலும் இணைந்த அவர், அங்கும் தனது நூல் குறித்துப் பகிர்ந்துள்ளார்.
