திருவனந்தபுரம்: சபரிமலை ஐயப்பன் கோயிலில் பிரசித்தி பெற்ற அரவணை பாயசம் பிரசாதத்துக்கு தட்டுப்பாடு ஏற்பட்டதால் மாநில அரசுக்கும் திருவிதாங்கூர் தேவஸ்தான வாரியத்துக்கும் இடையே மோதல் ஏற்பட்டுள்ளது.
கேரளாவில் உள்ள சபரிமலை ஐயப்பன் கோயில் கன்னி மாதப் பூஜைக்காக திறக்கப்பட்டது. பக்தர்கள் கூட்டம் அலைமோதிய நிலையில், போதுமான அரவணை பாயசம் இருப்பு இல்லாததால் விநியோகம் கடுமையாகக் கட்டுப்படுத்தப்பட்டது. இதனால் பக்தர்கள் நீண்ட நேரம் காத்திருக்க நேரிட்டது.
சபரிமலையில் கன்னி மாதப் பூஜைக்கு பக்தர்கள் கூட்டம் எதிர்பார்த்ததை விட அதிகமாக வந்ததால், தயாரிக்கப்பட்ட 2.6 லட்சம் அரவணை பாயச டின்கள் விரைவாகத் தீர்ந்து, நேற்று 14,000 டின்களுக்கும் குறைவான இருப்பு மட்டுமே மிஞ்சியது. பிரசாதத் தட்டுப்பாட்டைக் கட்டுப்படுத்த, ஒவ்வொரு பக்தருக்கும் ஒரு டின் அரவணை பாயசம் மற்றும் மூன்று பாக்கெட் அப்பம் மட்டுமே வழங்கப்பட்டதுடன், கவுன்ட்டர்களும் தற்காலிகமாக மூடப்பட்டன.
ஆலையில் பழுதுபார்ப்புப் பணிகள் நடப்பதால் உற்பத்தி நிறுத்தப்பட்டதே தட்டுப்பாட்டுக்குக் காரணம் என்று வாரியம் கூறுகிறது. ஆனால், கோயில் நடை திறந்திருக்கும் முக்கிய நாட்களில் ஆலையை மூடிவிட்டு பராமரிப்புப் பணி செய்ததைக் குறிப்பிட்டு தேவஸ்தான அமைச்சர் கே.முரளீதரன் அதிகாரிகளைக் கடுமையாகக் கண்டித்துள்ளார்.
இதுபற்றி தங்களுக்கு முன்னரே தகவல் தெரிவிக்காத அதிகாரிகள் மீது உயர் நீதிமன்றத்தில் நடவடிக்கை எடுப்பது குறித்து ஆலோசித்து வருவதாகவும் அவர் கூறினார்.
இதற்கிடையே, வரும் மண்டல-மகரவிளக்கு சீசனின்போது இதேபோன்ற பெரிய நெருக்கடி ஏற்படுவதைத் தவிர்ப்பதற்காகவே தற்போது அவசரமாக ஆலையை நவீனப்படுத்தும் பணிகள் மேற்கொள்ளப்படுவதாக திருவிதாங்கூர் தேவஸ்தான வாரியம் விளக்கம் அளித்துள்ளது.
எனினும், திட்டமிடல் இல்லாத இந்த திடீர் முடக்கம் காரணமாக சுமார் 3.2 லட்சம் அலகுகள் மட்டுமே தயாரிக்கப்பட்டு, வாரியத்துக்கு பல கோடி ரூபாய் வரை இழப்பு ஏற்பட்டுள்ளதாக தேவஸ்தான ஊழியர் சங்கங்கள் அதிருப்தி தெரிவித்துள்ளன. இந்தப் பிரச்சினை குறித்து முதல்வர் வி.டி. சதீசன் உடன் விரிவான ஆலோசனைகளை நடத்தி, சபரிமலை நிர்வாகப் பணிகளையும் பிரசாத விநியோகத்தையும் கண்காணிக்கத் தனியாக ஒரு சிறப்புக்குழுவை உருவாக்குவது குறித்தும் அரசு பரிசீலித்து வருகிறது.
