நேற்றைய போராட்டத்தின்போது ஆகாஷ்வாணி பவனுக்குள் தர்ணா போராட்டத்தில் ஈடுபட்ட ராகுல், பிரியங்கா
புதுடெல்லி: தலைமைத் தேர்தல் ஆணையர் ஞானேஷ் குமார் பதவி விலக வலியுறுத்தி டெல்லியில் நேற்று நடைபெற்ற போராட்டத்தின்போது ஆகாஷ்வாணி பவனுக்குள் அத்துமீறி நுழைந்ததாக ராகுல் காந்தி, பிரியங்கா காந்தி உள்ளிட்டோர் மீது டெல்லி போலீஸார் வழக்குப்பதிவு செய்துள்ளனர்.
தலைமைத் தேர்தல் ஆணையர் ஞானேஷ் குமார் பதவி விலக வலியுறுத்தி இண்டியா கூட்டணி எம்பிக்கள் பங்கேற்ற பேரணி டெல்லியில் நேற்று நடைபெற்றது. மக்களவை எதிர்க்கட்சித் தலைவர் ராகுல் காந்தி, காங்கிரஸ் தலைவர் மல்லிகார்ஜுன கார்கே, காங்கிரஸ் பொதுச்செயலாளர் பிரியங்கா காந்தி, சமாஜ்வாதி தலைவர் அகிலேஷ் யாதவ், திரிணமூல் காங்கிரஸ் பொதுச்செயலாளர் அபிஷேக் பானர்ஜி உள்ளிட்ட எதிர்க்கட்சி எம்பிக்கள் சுமார் 300 பேர் இதில் பங்கேற்றனர்.
நாடாளுமன்ற வளாகத்தில் இருந்து 3 கி.மீ. தொலைவுக்கு அவர்கள் பேரணியாகச் சென்றனர். அகில இந்திய வானொலி நிலையம் (ஆகாஷ்வாணி) அருகில் போலீஸார் தடுப்புகளை அமைத்து எதிர்க்கட்சி எம்பிக்கள், தலைவர்கள், தொண்டர்களை தடுத்து நிறுத்தினர்.
ராகுல் காந்தி, பிரியங்கா காந்தி உள்ளிட்டோர் தடுப்புகளின் மீது ஏறி கோஷமிட்டனர். பின்னர் அகில இந்திய வானொலி நிலைய வளாகத்தில் ராகுல் காந்தி உள்ளிட்டோர் தர்ணாவில் ஈடுபட்டனர். அவர்களை டெல்லி போலீஸார் வேனில் ஏற்றினர். எனினும், ராகுலும் பிரியங்காவும் வேனில் இருந்து இறங்கி மீண்டும் வானொலி நிலைய வளாகத்தில் நுழைந்தனர்.
ராகுல் காந்தி, பிரியங்கா காந்தி, 50 எம்பிக்கள் உட்பட 250 பேர் வானொலி நிலைய வளாகத்தில் தொடர் தர்ணாவில் ஈடுபட்டனர். சுமார் 9 மணி நேரத்துக்கும் மேலாக அவர்களின் தர்ணா நீடித்தது. இரவு 8 மணி அளவில் டெல்லி போலீஸார் அவர்களை கைது செய்து அங்கிருந்து வலுக்கட்டாயமாக வெளியேற்றினர்.
இந்நிலையில், அத்துமீறி நுழைந்தது தொடர்பாக ஆகாஷ்வாணி ஊழியர்கள் அளித்த புகாரின் அடிப்படையில் ராகுல் காந்தி, பிரியங்கா காந்தி உள்பட 10 எம்பிக்கள் மற்றும் பலர் மீது டெல்லி போலீஸார் குற்றவியல் வழக்கு பதிவு செய்துள்ளனர்.
இது குறித்து டெல்லி காவல்துறை அதிகாரி ஒருவர், “குறைந்தது 10 எம்பிக்கள் மற்றும் அடையாளம் காணக்கூடிய பிற நபர்களின் பெயர்கள் புகாரில் குறிப்பிடப்பட்டுள்ளன. குற்றவியல் அத்துமீறல் பிரிவின் கீழ் வழக்குப் பதிவு செய்யப்பட்டு விசாரணை நடைபெற்று வருகிறது” எனக் குறிப்பிட்டார்.
ராகுல் காந்தி ஆகாஷ்வாணி பவனுக்குள் அத்துமீறி நுழைந்தார் என்ற குற்றச்சாட்டை காங்கிரஸ் எம்பி இம்ரான் மசூத் மறுத்துள்ளார்.
இது தொடர்பாக செய்தியாளர்களிடம் பேசிய அவர், “ராகுல் காந்தி எதிர்க்கட்சித் தலைவர். அவருடன் எம்பிக்களும் இருந்தனர். அவர் வலுக்கட்டயமாக நுழையவில்லை. அந்த அமைப்புகள் எந்த ஒரு அரசியல் கட்சிக்கும் சொந்தமானவை அல்ல. அவை நாட்டுக்கு சொந்தமானவை.
முதல் தகவல் அறிக்கை பதிவு செய்யப்பட்டாலும் அது எதிர்க்கட்சிகளின் போராட்டங்களைத் தடுக்காது. முதல் தகவல் அறிக்கைக்கு அஞ்சி நாங்கள் பின்வாங்கிவிடுவோம் என அவர்கள் தவறாக நினைக்கக்கூடாது.
போராட்டத்தில் ஈடுபட்டவர்களை தலைமைத் தேர்தல் ஆணையர் உள்ளிட்டோர் சந்திக்கத் தயாராக இல்லை. இனி, நாங்கள் அவர்கள் வீடுகளுக்குச் சென்று அங்கு அமர்ந்து போராடுவோம்.” என தெரிவித்தார்.
